Sukta 2

2.1

20 vamadevo gautamah, agnih, trishtup

यो मर्त्ये॑ष्व॒मृत॑ ऋ॒तावा॑ दे॒वो दे॒वेष्व॑र॒तिर्नि॒धायि॑ ।
होता॒ यजि॑ष्ठो म॒ह्ना शु॒चध्यै॑ ह॒व्यैर॒ग्निर्मनु॑ष ईर॒यध्यै॑ ॥१॥

Yo martyeshvamrita ritava devo deveshvaratirnidhayi
Hota yajishtho mahna shuchadhyai havyairagnirmanusha irayadhyai

2.2

इ॒ह त्वं सू॑नो सहसो नो अ॒द्य जा॒तो जा॒ताँ उ॒भयाँ॑ अ॒न्तर॑ग्ने ।
दू॒त ई॑यसे युयुजा॒न ऋ॑ष्व ऋजुमु॒ष्कान् वृष॑णः शु॒क्राँश्च॑ ॥२॥

Iha tvam suno sahaso no adya jato jatam ubhayam antaragne
Duta iyase yuyujana rishva rijumushkan vrishanah shukranshcha

2.3

अत्या॑ वृध॒स्नू रोहि॑ता घृ॒तस्नू॑ ऋ॒तस्य॑ मन्ये॒ मन॑सा॒ जवि॑ष्ठा ।
अ॒न्तरी॑यसे अरु॒षा यु॑जा॒नो यु॒ष्माँश्च॑ दे॒वान् विश॒ आ च॒ मर्ता॑न् ॥३॥

Atya vridhasnu rohita ghritasnu ritasya manye manasa javishtha
Antariyase arusha yujano yushmanshcha devan visha a cha martan

2.4

अ॒र्य॒मणं॒ वरु॑णं मि॒त्रमे॑षा॒मिन्द्रा॒विष्णू॑ म॒रुतो॑ अ॒श्विनो॒त ।
स्वश्वो॑ अग्ने सु॒रथ॑ः सु॒राधा॒ एदु॑ वह सुह॒विषे॒ जना॑य ॥४॥

Aryamanam varunam mitrameshamindravishnu maruto ashvinota
Svashvo agne surathah suradha edu vaha suhavishe janaya

2.5

गोमाँ॑ अ॒ग्नेऽवि॑माँ अ॒श्वी य॒ज्ञो नृ॒वत्स॑खा॒ सद॒मिद॑प्रमृ॒ष्यः ।
इळा॑वाँ ए॒षो अ॑सुर प्र॒जावा॑न्दी॒र्घो र॒यिः पृ॑थुबु॒ध्नः स॒भावा॑न् ॥५॥

Gomam agnevimam ashvi yagyo nrivatsakha sadamidapramrishyah
Ilavam esho asura prajavandirgho rayih prithubudhnah sabhavan

2.6

यस्त॑ इ॒ध्मं ज॒भर॑त् सिष्विदा॒नो मू॒र्धानं॑ वा त॒तप॑ते त्वा॒या ।
भुव॒स्तस्य॒ स्वत॑वाँः पा॒युर॑ग्ने॒ विश्व॑स्मात्सी सीमघाय॒त उ॑रुष्य ॥६॥

Yasta idhmam jabharat sishvidano murdhanam va tatapate tvaya
Bhuvastasya svatavanh payuragne vishvasmatsi simaghayata urushya

2.7

यस्ते॒ भरा॒दन्नि॑यते चि॒दन्नं॑ नि॒शिष॑न्म॒न्द्रमति॑थिमु॒दीर॑त् ।
आ दे॑व॒युरि॒नध॑ते दुरो॒णे तस्मि॑न् र॒यिर्ध्रु॒वो अ॑स्तु॒ दास्वा॑न् ॥७॥

Yaste bharadanniyate chidannam nishishanmandramatithimudirat
A devayurinadhate durone tasmin rayirdhruvo astu dasvan

2.8

यस्त्वा॑ दो॒षा य उ॒षसि॑ प्र॒शंसा॑त् प्रि॒यं वा॑ त्वा कृ॒णव॑ते ह॒विष्मा॑न् ।
अश्वो॒ न स्वे दम॒ आ हे॒म्यावा॒न् तमंह॑सः पीपरो दा॒श्वांस॑म् ॥८॥

Yastva dosha ya ushasi prashansat priyam va tva krinavate havishman
Ashvo na sve dama a hemyavan tamanhasah piparo dashvansam

2.9

यस्तुभ्य॑मग्ने अ॒मृता॑य॒ दाश॒द् दु॒व॒स्त्वे कृ॒णव॑ते य॒तस्रु॑क् ।
न स रा॒या श॑शमा॒नो वि यो॑ष॒न्नैन॒मंह॒ः परि॑ वरदघा॒योः ॥९॥

Yastubhyamagne amritaya dashad duvastve krinavate yatasruk
Na sa raya shashamano vi yoshannainamanhah pari varadaghayoh

2.10

यस्य॒ त्वम॑ग्ने अध्व॒रं जुजो॑षो दे॒वो मर्त॑स्य॒ सुधि॑तं॒ ररा॑णः ।
प्री॒तेद॑स॒द्धोत्रा॒ सा य॑वि॒ष्ठाऽसा॑म॒ यस्य॑ विध॒तो वृ॒धास॑ः ॥१०॥

Yasya tvamagne adhvaram jujosho devo martasya sudhitam raranah
Pritedasaddhotra sa yavishthasama yasya vidhato vridhasah

2.11

चित्ति॒मचि॑त्तिं चिनव॒द् वि वि॒द्वान् पृ॒ष्ठेव॑ वी॒ता वृ॑जि॒ना च॒ मर्ता॑न् ।
रा॒ये च॑ नः स्वप॒त्याय॑ देव॒ दितिं॑ च॒ रास्वादि॑तिमुरुष्य ॥११॥

Chittimachittim chinavad vi vidvan prishtheva vita vrijina cha martan
Raye cha nah svapatyaya deva ditim cha rasvaditimurushya

2.12

क॒विं श॑शासुः क॒वयोऽद॑ब्धा निधा॒रय॑न्तो॒ दुर्या॑स्वा॒योः ।
अत॒स्त्वं दृश्याँ॑ अग्न ए॒तान् प॒ड्भिः प॑श्ये॒रद्भु॑ताँ अ॒र्य एवै॑ः ॥१२॥

Kavim shashasuh kavayodabdha nidharayanto duryasvayoh
Atastvam drishyam agna etan padbhih pashyeradbhutam arya evaih

2.13

त्वम॑ग्ने वा॒घते॑ सु॒प्रणी॑तिः सु॒तसो॑माय विध॒ते य॑विष्ठ ।
रत्नं॑ भर शशमा॒नाय॑ घृष्वे पृ॒थु श्च॒न्द्रमव॑से चर्षणि॒प्राः ॥१३॥

Tvamagne vaghate supranitih sutasomaya vidhate yavishtha
Ratnam bhara shashamanaya ghrishve prithu shchandramavase charshaniprah

2.14

अधा॑ ह॒ यद् व॒यम॑ग्ने त्वा॒या प॒ड्भिर्हस्ते॑भिश्चकृ॒मा त॒नूभि॑ः ।
रथं॒ न क्रन्तो॒ अप॑सा भु॒रिजो॑र्ऋतं ये॑मुः सु॒ध्य॑ आशुषा॒णाः ॥१४॥

Adha ha yad vayamagne tvaya padbhirhastebhishchakrima tanubhih
Ratham na kranto apasa bhurijorritam yemuh sudhya ashushanah

2.15

अधा॑ मा॒तुरु॒षस॑ः स॒प्त विप्रा॒ जाये॑महि प्रथ॒मा वे॒धसो॒ नॄन् ।
दि॒वस्पु॒त्रा अङ्गि॑रसो भवे॒माद्रिं॑ रुजेम ध॒निनं॑ शु॒चन्त॑ः ॥१५॥

Adha maturushasah sapta vipra jayemahi prathama vedhaso nrin
Divasputra angiraso bhavemadrim rujema dhaninam shuchantah

2.16

अधा॒ यथा॑ नः पि॒तर॒ः परा॑सः प्र॒त्नासो॑ अग्न ऋ॒तमा॑शुषा॒णाः ।
शुचीद॑य॒न् दीधि॑तिमुक्थ॒शास॒ः क्षामा॑ भि॒न्दन्तो॑ अरु॒णीरप॑ व्रन् ॥१६॥

Adha yatha nah pitarah parasah pratnaso agna ritamashushanah
Shuchidayan didhitimukthashasah kshama bhindanto arunirapa vran

2.17

सु॒कर्मा॑णः सु॒रुचो॑ देव॒यन्तोऽयो॒ न दे॒वा जनि॑मा॒ धम॑न्तः ।
शु॒चन्तो॑ अ॒ग्निं व॑वृ॒धन्त॒ इन्द्र॑मू॒र्वं गव्यं॑ परि॒षद॑न्तो अग्मन् ॥१७॥

Sukarmanah surucho devayantoyo na deva janima dhamantah
Shuchanto agnim vavridhanta indramurvam gavyam parishadanto agman

2.18

आ यू॒थेव॑ क्षु॒मति॑ प॒श्वो अ॑ख्यद् दे॒वानां॒ यज्जनि॒मान्त्यु॑ग्र ।
मर्ता॑नां चिदु॒र्वशी॑रकृप्रन् वृ॒धे चि॑द॒र्य उप॑रस्या॒योः ॥१८॥

A yutheva kshumati pashvo akhyad devanam yajjanimantyugra
Martanam chidurvashirakripran vridhe chidarya uparasyayoh

2.19

अक॑र्म ते॒ स्वप॑सो अभूम ऋ॒तम॑वस्रन्नु॒षसो॑ विभा॒तीः ।
अनू॑नम॒ग्निं पु॑रु॒धा सु॑श्च॒न्द्रं दे॒वस्य॒ मर्मृ॑जत॒श्चारु॒ चक्षु॑ः ॥१९॥

Akarma te svapaso abhuma ritamavasrannushaso vibhatih
Anunamagnim purudha sushchandram devasya marmrijatashcharu chakshuh

2.20

ए॒ता ते॑ अग्न उ॒चथा॑नि वे॒धोऽवो॑चाम क॒वये॒ ता जु॑षस्व ।
उच्छो॑चस्व कृणु॒हि वस्य॑सो नो म॒हो रा॒यः पु॑रुवार॒ प्र य॑न्धि ॥२०॥

Eta te agna uchathani vedhovochama kavaye ta jushasva
Uchchhochasva krinuhi vasyaso no maho rayah puruvara pra yandhi