সূক্ত 1

1.1

২০ বামদেবো গৌতমঃ। অগ্নিঃ, ২-৫ অগ্নীবরুণৌ বা। ত্রিষ্টুপ্, ১ অগ্নিঃ, ২ অতিজগতী, ৩ ধৃতিঃ।

ত্বাং হ্যগ্নে সদমিত্সমন্যবো দেবাসো দেবমরতিং ন্যেরির ইতি ক্রত্বা ন্যেরিরে ।
অমর্ত্যং যজত মর্ত্যেষ্বা দেবমাদেবং জনত প্রচেতসং বিশ্বমাদেবং জনত প্রচেতসম্ ॥১॥

1.2

স ভ্রাতরং বরুণমগ্ন আ ববৃত্স্ব দেবাঁ অচ্ছা সুমতী যজ্ঞবনসং জ্যেষ্ঠং যজ্ঞবনসম্ ।
ঋতাবানমাদিত্যং চর্ষণীধৃতং রাজানং চর্ষণীধৃতম্ ॥২॥

1.3

সখে সখায়মভ্যা ববৃত্স্বাশুং ন চক্রং রথ্যেব রংহ্যাস্মভ্যং দস্ম রংহ্যা ।
অগ্নে মৃলীকং বরুণে সচা বিদো মরুত্সু বিশ্বভানুষু ।
তোকায় তুজে শুশুচান শং কৃধ্যস্মভ্যং দস্ম শং কৃধি ॥৩॥

1.4

ত্বং নো অগ্নে বরুণস্য বিদ্বান্ দেবস্য হেলোঽব যাসিসীষ্ঠাঃ ।
যজিষ্ঠো বহ্নিতমঃ শোশুচানো বিশ্বা দ্বেষাংসি প্র মুমুগ্ধ্যস্মৎ ॥৪॥

1.5

স ত্বং নো অগ্নেঽবমো ভবোতী নেদিষ্ঠো অস্যা উষসো ব্যুষ্টৌ ।
অব যক্ষ্ব নো বরুণং ররাণো বীহি মৃলীকং সুহবো ন এধি ॥৫॥

1.6

অস্য শ্রেষ্ঠা সুভগস্য সংদৃগ্ দেবস্য চিত্রতমা মর্ত্যেষু ।
শুচি ঘৃতং ন তপ্তমঘ্ন্যায়াঃ স্পার্হা দেবস্য মংহনেব ধেনোঃ ॥৬॥

1.7

ত্রিরস্য তা পরমা সন্তি সত্যা স্পার্হা দেবস্য জনিমান্যগ্নেঃ ।
অনন্তে অন্তঃ পরিবীত আগাচ্ছুচিঃ শুক্রো অর্যো রোরুচানঃ ॥৭॥

1.8

স দূতো বিশ্বেদভি বষ্টি সদ্মা হোতা হিরণ্যরথো রংসুজিহ্বঃ ।
রোহিদশ্বো বপুষ্যো বিভাবা সদা রণ্বঃ পিতুমতীব সংসৎ ॥৮॥

1.9

স চেতয়ন্মনুষো যজ্ঞবন্ধুঃ প্র তং মহ্যা রশনয়া নয়ন্তি ।
স ক্ষেত্যস্য দুর্যাসু সাধন্ দেবো মর্তস্য সধনিত্বমাপ ॥৯॥

1.10

স তূ নো অগ্নির্নয়তু প্রজানন্নচ্ছা রত্নং দেবভক্তং যদস্য ।
ধিয়া যদ্ বিশ্বে অমৃতা অকৃণ্বন্ দ্যৌষ্পিতা জনিতা সত্যমুক্ষন্ ॥১০॥

1.11

স জায়ত প্রথমঃ পস্ত্যাসু মহো বুধ্নে রজসো অস্য যোনৌ ।
অপাদশীর্ষা গুহমানো অন্তা ঽঽয়োয়ুবানো বৃষভস্য নীলে ॥১১॥

1.12

প্র শর্ধ আর্ত প্রথমং বিপন্যাঁ ঋতস্য যোনা বৃষভস্য নীলে ।
স্পার্হো যুবা বপুষ্যো বিভাবা সপ্ত প্রিয়াসোঽজনয়ন্ত বৃষ্ণে ॥১২॥

1.13

অস্মাকমত্র পিতরো মনুষ্যা অভি প্র সেদুর্ঋতমাশুষাণাঃ ।
অশ্মব্রজাঃ সুদুঘা বব্রে অন্তরুদুস্রা আজন্নুষসো হুবানাঃ ॥১৩॥

1.14

তে মর্মৃজত দদৃবাংসো অদ্রিং তদেষামন্যে অভিতো বি বোচন্ ।
পশ্বয়ন্ত্রাসো অভি কারমর্চন্ বিদন্ত জ্যোতিশ্চকৃপন্ত ধীভিঃ ॥১৪॥

1.15

তে গব্যতা মনসা দৃধ্রমুব্ধং গা যেমানং পরি ষন্তমদ্রিম্ ।
দৃলহং নরো বচসা দৈব্যেন ব্রজং গোমন্তমুশিজো বি বব্রুঃ ॥১৫॥

1.16

তে মন্বত প্রথমং নাম ধেনোস্ত্রিঃ সপ্ত মাতুঃ পরমাণি বিন্দন্ ।
তজ্জানতীরভ্যনূষত ব্রা আবির্ভুবদরুণীর্যশসা গোঃ ॥১৬॥

1.17

নেশৎ তমো দুধিতং রোচত দ্যৌরুদ্দেব্যা উষসো ভানুরর্ত ।
আ সূর্যো বৃহতস্তিষ্ঠদজ্রাঁ ঋজু মর্তেষু বৃজিনা চ পশ্যন্ ॥১৭॥

1.18

আদিৎ পশ্চা বুবুধানা ব্যখ্যন্নাদিদ্ রত্নং ধারয়ন্ত দ্যুভক্তম্ ।
বিশ্বে বিশ্বাসু দুর্যাসু দেবা মিত্র ধিয়ে বরুণ সত্যমস্তু ॥১৮॥

1.19

অচ্ছা বোচেয় শুশুচানমগ্নিং হোতারং বিশ্বভরসং যজিষ্ঠম্ ।
শুচ্যূধো অতৃণন্ন গবামন্ধো ন পূতং পরিষিক্তমংশোঃ ॥১৯॥

1.20

বিশ্বেষামদিতির্যজ্ঞিয়ানাং বিশ্বেষামতিথির্মানুষাণাম্ ।
অগ্নির্দেবানামব আবৃণানঃ সুমৃলীকো ভবতু জাতবেদাঃ ॥২০॥