সূক্ত 61

61.1

৭ গাথিনো বিশ্বামিত্রঃ। উষা। ত্রিষ্টুপ্।

উষো বাজেন বাজিনি প্রচেতাঃ স্তোমং জুষস্ব গৃণতো মঘোনি ।
পুরাণী দেবি যুবতিঃ পুরংধিরনু ব্রতং চরসি বিশ্ববারে ॥১॥

61.2

উষো দেব্যমর্ত্যা বি ভাহি চন্দ্ররথা সূনৃতা ঈরয়ন্তী ।
আ ত্বা বহন্তু সুয়মাসো অশ্বা হিরণ্যবর্ণাং পৃথুপাজসো যে ॥২॥

61.3

উষঃ প্রতীচী ভুবনানি বিশ্বোর্ধ্বা তিষ্ঠস্যমৃতস্য কেতুঃ ।
সমানমর্থং চরণীয়মানা চক্রমিব নব্যস্যা ববৃত্স্ব ॥৩॥

61.4

অব স্যূমেব চিন্বতী মঘোন্যুষা যাতি স্বসরস্য পত্নী ।
স্ব১র্জনন্তী সুভগা সুদংসা আন্তাদ্ দিবঃ পপ্রথ আ পৃথিব্যাঃ ॥৪॥

61.5

অচ্ছা বো দেবীমুষসং বিভাতীং প্র বো ভরধ্বং নমসা সুবৃক্তিম্ ।
ঊর্ধ্বং মধুধা দিবি পাজো অশ্রেৎ প্র রোচনা রুরুচে রণ্বসংদৃক্ ॥৫॥

61.6

ঋতাবরী দিবো অর্কৈরবোধ্যা রেবতী রোদসী চিত্রমস্থাৎ ।
আয়তীমগ্ন উষসং বিভাতীং বামমেষি দ্রবিণং ভিক্ষমাণঃ ॥৬॥

61.7

ঋতস্য বুধ্ন উষসামিষণ্যন্ বৃষা মহী রোদসী আ বিবেশ ।
মহী মিত্রস্য বরুণস্য মায়া চন্দ্রেব ভানুং বি দধে পুরুত্রা ॥৭॥