সূক্ত 60

60.1

৭ গাথিনো বিশ্বামিত্রঃ। ঋভবঃ, ৫-৭ ইন্দ্র ঋভবশ্চ । জগতী।

ইহেহ বো মনসা বন্ধুতা নর উশিজো জগ্মুরভি তানি বেদসা ।
যাভির্মায়াভিঃ প্রতিজূতিবর্পসঃ সৌধন্বনা যজ্ঞিয়ং ভাগমানশ ॥১॥

60.2

যাভিঃ শচীভিশ্চমসাঁ অপিংশত যয়া ধিয়া গামরিণীত চর্মণঃ ।
যেন হরী মনসা নিরতক্ষত তেন দেবত্বমৃভবঃ সমানশ ॥২॥

60.3

ইন্দ্রস্য সখ্যমৃভবঃ সমানশুর্মনোর্নপাতো অপসো দধন্বিরে ।
সৌধন্বনাসো অমৃতত্বমেরিরে বিষ্ট্বী শমীভিঃ সুকৃতঃ সুকৃত্যয়া ॥৩॥

60.4

ইন্দ্রেণ যাথ সরথং সুতে সচাঁ অথো বশানাং ভবথা সহ শ্রিয়া ।
ন বঃ প্রতিমৈ সুকৃতানি বাঘতঃ সৌধন্বনা ঋভবো বীর্যাণি চ ॥৪॥

60.5

ইন্দ্র ঋভুভির্বাজবদ্ভিঃ সমুক্ষিতং সুতং সোমমা বৃষস্বা গভস্ত্যোঃ ।
ধিয়েষিতো মঘবন্ দাশুষো গৃহে সৌধন্বনেভিঃ সহ মত্স্বা নৃভিঃ ॥৫॥

60.6

ইন্দ্র ঋভুমান্ বাজবান্ মত্স্বেহ নোঽস্মিন্ ত্সবনে শচ্যা পুরুষ্টুত ।
ইমানি তুভ্যং স্বসরাণি যেমিরে ব্রতা দেবানাং মনুষশ্চ ধর্মভিঃ ॥৬॥

60.7

ইন্দ্র ঋভুভির্বাজিভির্বাজয়ন্নিহ স্তোমং জরিতুরুপ যাহি যজ্ঞিয়ম্ ।
শতং কেতেভিরিষিরেভিরায়বে সহস্রণীথো অধ্বরস্য হোমনি ॥৭॥