সূক্ত 59

59.1

৯ গাথিনো বিশ্বামিত্রঃ। মিত্রঃ। ত্রিষ্টুপ্, ৬-৯ গায়ত্রী।

মিত্রো জনান্ যাতয়তি ব্রুবাণো মিত্রো দাধার পৃথিবীমুত দ্যাম্ ।
মিত্রঃ কৃষ্টীরনিমিষাভি চষ্টে মিত্রায় হব্যং ঘৃতবজ্জুহোত ॥১॥

59.2

প্র স মিত্র মর্তো অস্তু প্রয়স্বান্ যস্ত আদিত্য শিক্ষতি ব্রতেন ।
ন হন্যতে ন জীয়তে ত্বোতো নৈনমংহো অশ্নোত্যন্তিতো ন দূরাৎ ॥২॥

59.3

অনমীবাস ইলয়া মদন্তো মিতজ্ঞবো বরিমন্না পৃথিব্যাঃ ।
আদিত্যস্য ব্রতমুপক্ষিয়ন্তো বয়ং মিত্রস্য সুমতৌ স্যাম ॥৩॥

59.4

অয়ং মিত্রো নমস্যঃ সুশেবো রাজা সুক্ষত্রো অজনিষ্ট বেধাঃ ।
তস্য বয়ং সুমতৌ যজ্ঞিয়স্যাঽপি ভদ্রে সৌমনসে স্যাম ॥৪॥

59.5

মহাঁ আদিত্যো নমসোপসদ্যো যাতয়জ্জনো গৃণতে সুশেবঃ ।
তস্মা এতত্পন্যতমায় জুষ্টমগ্নৌ মিত্রায় হবিরা জুহোত ॥৫॥

59.6

মিত্রস্য চর্ষণীধৃতোঽবো দেবস্য সানসি । দ্যুম্নং চিত্রশ্রবস্তমম্ ॥৬॥

59.7

অভি যো মহিনা দিবং মিত্রো বভূব সপ্রথাঃ । অভি শ্রবোভিঃ পৃথিবীম্ ॥৭॥

59.8

মিত্রায় পঞ্চ যেমিরে জনা অভিষ্টিশবসে । স দেবান্ বিশ্বান্ বিভর্তি ॥৮॥

59.9

মিত্রো দেবেষ্বায়ুষু জনায় বৃক্তবর্হিষে । ইষ ইষ্টব্রতা অকঃ ॥৯॥