সূক্ত 58

58.1

৯ গাথিনো বিশ্বামিত্রঃ। অশ্বিনৌ। ত্রিষ্টুপ্।

ধেনুঃ প্রত্নস্য কাম্যং দুহানা ঽন্তঃ পুত্রশ্চরতি দক্ষিণায়াঃ ।
আ দ্যোতনিং বহতি শুভ্রয়ামোষসঃ স্তোমো অশ্বিনাবজীগঃ ॥১॥

সুয়ুগ্ বহন্তি প্রতি বামৃতেনোর্ধ্বা ভবন্তি পিতরেব মেধাঃ ।
জরেথামস্মদ্ বি পণের্মনীষাং যুবোরবশ্চকৃমা যাতমর্বাক্ ॥২॥

সুয়ুগ্ভিরশ্বৈঃ সুবৃতা রথেন দস্রাবিমং শৃণুতং শ্লোকমদ্রেঃ ।
কিমঙ্গ বাং প্রত্যবর্তিং গমিষ্ঠা ঽঽহুর্বিপ্রাসো অশ্বিনা পুরাজাঃ ॥৩॥

আ মন্যেথামা গতং কচ্চিদেবৈর্বিশ্বে জনাসো অশ্বিনা হবন্তে ।
ইমা হি বাং গোঋজীকা মধূনি প্র মিত্রাসো ন দদুরুস্রো অগ্রে ॥৪॥

তিরঃ পুরূ চিদশ্বিনা রজাংস্যাঙ্গূষো বাং মঘবানা জনেষু ।
এহ যাতং পথিভির্দেবয়ানৈর্দস্রাবিমে বাং নিধয়ো মধূনাম্ ॥৫॥

পুরাণমোকঃ সখ্যং শিবং বাং যুবোর্নরা দ্রবিণং জহ্নাব্যাম্ ।
পুনঃ কৃণ্বানাঃ সখ্যা শিবানি মধ্বা মদেম সহ নূ সমানাঃ ॥৬॥

অশ্বিনা বায়ুনা যুবং সুদক্ষা নিয়ুদ্ভিশ্চ সজোষসা যুবানা ।
নাসত্যা তিরোঅহ্ন্যং জুষাণা সোমং পিবতমস্রিধা সুদানূ ॥৭॥

অশ্বিনা পরি বামিষঃ পুরূচীরীয়ুর্গীর্ভির্যতমানা অমৃধ্রাঃ ।
রথো হ বামৃতজা অদ্রিজূতঃ পরি দ্যাবাপৃথিবী যাতি সদ্যঃ ॥৮॥

অশ্বিনা মধুষুত্তমো যুবাকুঃ সোমস্তং পাতমা গতং দুরোণে ।
রথো হ বাং ভূরি বর্পঃ করিক্রৎ সুতাবতো নিষ্কৃতমাগমিষ্ঠঃ ॥৯॥