Sukta 58

58.1

9 gathino vishvamitrah, ashvinau, trishtup

धे॒नुः प्र॒त्नस्य॒ काम्यं॒ दुहा॑ना॒ ऽन्तः पु॒त्रश्च॑रति॒ दक्षि॑णायाः ।
आ द्यो॑त॒निं व॑हति शु॒भ्रया॑मो॒षस॒ः स्तोमो॑ अ॒श्विना॑वजीगः ॥१॥

Dhenuh pratnasya kamyam duhana ntah putrashcharati dakshinayah
A dyotanim vahati shubhrayamoshasah stomo ashvinavajigah

सु॒युग् व॑हन्ति॒ प्रति॑ वामृ॒तेनो॒र्ध्वा भ॑वन्ति पि॒तरे॑व॒ मेधा॑ः ।
जरे॑थाम॒स्मद् वि प॒णेर्म॑नी॒षां यु॒वोरव॑श्चकृ॒मा या॑तम॒र्वाक् ॥२॥

Suyug vahanti prati vamritenordhva bhavanti pitareva medhah
Jarethamasmad vi panermanisham yuvoravashchakrima yatamarvak

सु॒युग्भि॒रश्वै॑ः सु॒वृता॒ रथे॑न॒ दस्रा॑वि॒मं शृ॑णुतं॒ श्लोक॒मद्रे॑ः ।
किम॒ङ्ग वां॒ प्रत्यव॑र्तिं॒ गमि॑ष्ठा॒ ऽऽहुर्विप्रा॑सो अश्विना पुरा॒जाः ॥३॥

Suyugbhirashvaih suvrita rathena dasravimam shrinutam shlokamadreh
Kimanga vam pratyavartim gamishtha hurvipraso ashvina purajah

आ म॑न्येथा॒मा ग॑तं॒ कच्चि॒देवै॒र्विश्वे॒ जना॑सो अ॒श्विना॑ हवन्ते ।
इ॒मा हि वां॒ गोऋ॑जीका॒ मधू॑नि॒ प्र मि॒त्रासो॒ न द॒दुरु॒स्रो अग्रे॑ ॥४॥

A manyethama gatam kachchidevairvishve janaso ashvina havante
Ima hi vam gorijika madhuni pra mitraso na dadurusro agre

ति॒रः पु॒रू चि॑दश्विना॒ रजां॑स्याङ्गू॒षो वां॑ मघवाना॒ जने॑षु ।
एह या॑तं प॒थिभि॑र्देव॒यानै॒र्दस्रा॑वि॒मे वां॑ नि॒धयो॒ मधू॑नाम् ॥५॥

Tirah puru chidashvina rajansyangusho vam maghavana janeshu
Eha yatam pathibhirdevayanairdasravime vam nidhayo madhunam

पु॒रा॒णमोक॑ः स॒ख्यं शि॒वं वां॑ यु॒वोर्न॑रा॒ द्रवि॑णं ज॒ह्नाव्या॑म् ।
पुन॑ः कृण्वा॒नाः स॒ख्या शि॒वानि॒ मध्वा॑ मदेम स॒ह नू स॑मा॒नाः ॥६॥

Puranamokah sakhyam shivam vam yuvornara dravinam jahnavyam
Punah krinvanah sakhya shivani madhva madema saha nu samanah

अश्वि॑ना वा॒युना॑ यु॒वं सु॑दक्षा नि॒युद्भि॑श्च स॒जोष॑सा युवाना ।
नास॑त्या ति॒रोअ॑ह्न्यं जुषा॒णा सोमं॑ पिबतम॒स्रिधा॑ सुदानू ॥७॥

Ashvina vayuna yuvam sudaksha niyudbhishcha sajoshasa yuvana
Nasatya tiroahnyam jushana somam pibatamasridha sudanu

अश्वि॑ना॒ परि॑ वा॒मिष॑ः पुरू॒चीरी॒युर्गी॒र्भिर्यत॑माना॒ अमृ॑ध्राः ।
रथो॑ ह वामृत॒जा अद्रि॑जूत॒ः परि॒ द्यावा॑पृथि॒वी या॑ति स॒द्यः ॥८॥

Ashvina pari vamishah puruchiriyurgirbhiryatamana amridhrah
Ratho ha vamritaja adrijutah pari dyavaprithivi yati sadyah

अश्वि॑ना मधु॒षुत्त॑मो यु॒वाकु॒ः सोम॒स्तं पा॑त॒मा ग॑तं दुरो॒णे ।
रथो॑ ह वां॒ भूरि॒ वर्प॒ः करि॑क्रत् सु॒ताव॑तो निष्कृ॒तमाग॑मिष्ठः ॥९॥

Ashvina madhushuttamo yuvakuh somastam patama gatam durone
Ratho ha vam bhuri varpah karikrat sutavato nishkritamagamishthah