Sukta 59

59.1

9 gathino vishvamitrah, mitrah, trishtup, 6-9 gayatri

मि॒त्रो जना॑न् यातयति ब्रुवा॒णो मि॒त्रो दा॑धार पृथि॒वीमु॒त द्याम् ।
मि॒त्रः कृ॒ष्टीरनि॑मिषा॒भि च॑ष्टे मि॒त्राय॑ ह॒व्यं घृ॒तव॑ज्जुहोत ॥१॥

Mitro janan yatayati bruvano mitro dadhara prithivimuta dyam
Mitrah krishtiranimishabhi chashte mitraya havyam ghritavajjuhota

59.2

प्र स मि॑त्र॒ मर्तो॑ अस्तु॒ प्रय॑स्वा॒न् यस्त॑ आदित्य॒ शिक्ष॑ति व्र॒तेन॑ ।
न ह॑न्यते॒ न जी॑यते॒ त्वोतो॒ नैन॒मंहो॑ अश्नो॒त्यन्ति॑तो॒ न दू॒रात् ॥२॥

Pra sa mitra marto astu prayasvan yasta aditya shikshati vratena
Na hanyate na jiyate tvoto nainamanho ashnotyantito na durat

59.3

अ॒न॒मी॒वास॒ इळ॑या॒ मद॑न्तो मि॒तज्ञ॑वो॒ वरि॑म॒न्ना पृ॑थि॒व्याः ।
आ॒दि॒त्यस्य॑ व्र॒तमु॑पक्षि॒यन्तो॑ व॒यं मि॒त्रस्य॑ सुम॒तौ स्या॑म ॥३॥

Anamivasa ilaya madanto mitagyavo varimanna prithivyah
Adityasya vratamupakshiyanto vayam mitrasya sumatau syama

59.4

अ॒यं मि॒त्रो न॑म॒स्य॑ः सु॒शेवो॒ राजा॑ सुक्ष॒त्रो अ॑जनिष्ट वे॒धाः ।
तस्य॑ व॒यं सु॑म॒तौ य॒ज्ञिय॒स्याऽपि॑ भ॒द्रे सौ॑मन॒से स्या॑म ॥४॥

Ayam mitro namasyah sushevo raja sukshatro ajanishta vedhah
Tasya vayam sumatau yagyiyasyapi bhadre saumanase syama

59.5

म॒हाँ आ॑दि॒त्यो नम॑सोप॒सद्यो॑ यात॒यज्ज॑नो गृण॒ते सु॒शेव॑ः ।
तस्मा॑ ए॒तत्पन्य॑तमाय॒ जुष्ट॑म॒ग्नौ मि॒त्राय॑ ह॒विरा जु॑होत ॥५॥

Maham adityo namasopasadyo yatayajjano grinate sushevah
Tasma etatpanyatamaya jushtamagnau mitraya havira juhota

59.6

मि॒त्रस्य॑ चर्षणी॒धृतोऽवो॑ दे॒वस्य॑ सान॒सि । द्यु॒म्नं चि॒त्रश्र॑वस्तमम् ॥६॥

Mitrasya charshanidhritovo devasya sanasi, dyumnam chitrashravastamam

59.7

अ॒भि यो म॑हि॒ना दिवं॑ मि॒त्रो ब॒भूव॑ स॒प्रथा॑ः । अ॒भि श्रवो॑भिः पृथि॒वीम् ॥७॥

Abhi yo mahina divam mitro babhuva saprathah, abhi shravobhih prithivim

59.8

मि॒त्राय॒ पञ्च॑ येमिरे॒ जना॑ अ॒भिष्टि॑शवसे । स दे॒वान् विश्वा॑न् बिभर्ति ॥८॥

Mitraya pancha yemire jana abhishtishavase, sa devan vishvan bibharti

59.9

मि॒त्रो दे॒वेष्वा॒युषु॒ जना॑य वृ॒क्तब॑र्हिषे । इष॑ इ॒ष्टव्र॑ता अकः ॥९॥

Mitro deveshvayushu janaya vriktabarhishe, isha ishtavrata akah