সূক্ত 62

62.1

১৮ গাথিনো বিশ্বামিত্রঃ ১৬-১৮ জমদগ্নির্বা।১-৩ ইন্দ্রাবরুণৌ, ৪-৬ বৃহস্পতিঃ, ৭-৯ পূষা, ১০-১২ সবিতা, ১৩-১৫ সোমঃ, ১৬-১৮ মিত্রাবরুণৌ। গায়ত্রী, ১-৩ ত্রিষ্টুপ্।

ইমা উ বাং ভৃময়ো মন্যমানা যুবাবতে ন তুজ্যা অভূবন্ ।
ক্ব১ ত্যদিন্দ্রাবরুণা যশো বাং যেন স্মা সিনং ভরথঃ সখিভ্যঃ ॥১॥

62.2

অয়মু বাং পুরুতমো রয়ীয়ঞ্ছশ্বত্তমমবসে জোহবীতি ।
সজোষাবিন্দ্রাবরুণা মরুদ্ভির্দিবা পৃথিব্যা শৃণুতং হবং মে ॥২॥

62.3

অস্মে তদিন্দ্রাবরুণা বসু ষ্যাদস্মে রয়ির্মরুতঃ সর্ববীরঃ ।
অস্মান্ বরূত্রীঃ শরণৈরবন্ত্বস্মান্ হোত্রা ভারতী দক্ষিণাভিঃ ॥৩॥

62.4

বৃহস্পতে জুষস্ব নো হব্যানি বিশ্বদেব্য । রাস্ব রত্নানি দাশুষে ॥৪॥

62.5

শুচিমর্কৈর্বৃহস্পতিমধ্বরেষু নমস্যত । অনাম্যোজ আ চকে ॥৫॥

62.6

বৃষভং চর্ষণীনাং বিশ্বরূপমদাভ্যম্ । বৃহস্পতিং বরেণ্যম্ ॥৬॥

62.7

ইয়ং তে পূষন্নাঘৃণে সুষ্টুতির্দেব নব্যসী । অস্মাভিস্তুভ্যং শস্যতে ॥৭॥

62.8

তাং জুষস্ব গিরং মম বাজয়ন্তীমবা ধিয়ম্ । বধূয়ুরিব যোষণাম্ ॥৮॥

62.9

যো বিশ্বাভি বিপশ্যতি ভুবনা সং চ পশ্যতি । স নঃ পূষাবিতা ভুবৎ ॥৯॥

62.10

তৎ সবিতুর্বরেণ্যং ভর্গো দেবস্য ধীমহি । ধিয়ো যো নঃ প্রচোদয়াৎ ॥১০॥

62.11

দেবস্য সবিতুর্বয়ং বাজয়ন্তঃ পুরংধ্যা । ভগস্য রাতিমীমহে ॥১১॥

62.12

দেবং নরঃ সবিতারং বিপ্রা যজ্ঞৈঃ সুবৃক্তিভিঃ । নমস্যন্তি ধিয়েষিতাঃ ॥১২॥

62.13

সোমো জিগাতি গাতুবিদ্ দেবানামেতি নিষ্কৃতম্ । ঋতস্য যোনিমাসদম্ ॥১৩॥

62.14

সোমো অস্মভ্যং দ্বিপদে চতুষ্পদে চ পশবে । অনমীবা ইষস্করৎ ॥১৪॥

62.15

অস্মাকমায়ুর্বর্ধয়ন্নভিমাতীঃ সহমানঃ । সোমঃ সধস্থমাসদৎ ॥১৫॥

62.16

আ নো মিত্রাবরুণা ঘৃতৈর্গব্যূতিমুক্ষতম্ । মধ্বা রজাংসি সুক্রতূ ॥১৬॥

62.17

উরুশংসা নমোবৃধা মহ্না দক্ষস্য রাজথঃ । দ্রাঘিষ্ঠাভিঃ শুচিব্রতা ॥১৭॥

62.18

গৃণানা জমদগ্নিনা যোনাবৃতস্য সীদতম্ । পাতং সোমমৃতাবৃধা ॥১৮॥