Sukta 61

61.1

7 gathino vishvamitrah, usha, trishtup

उषो॒ वाजे॑न वाजिनि॒ प्रचे॑ता॒ः स्तोमं॑ जुषस्व गृण॒तो म॑घोनि ।
पु॒रा॒णी दे॑वि युव॒तिः पुरं॑धि॒रनु॑ व्र॒तं च॑रसि विश्ववारे ॥१॥

Usho vajena vajini prachetah stomam jushasva grinato maghoni
Purani devi yuvatih purandhiranu vratam charasi vishvavare

उषो॑ दे॒व्यम॑र्त्या॒ वि भा॑हि च॒न्द्रर॑था सू॒नृता॑ ई॒रय॑न्ती ।
आ त्वा॑ वहन्तु सु॒यमा॑सो॒ अश्वा॒ हिर॑ण्यवर्णां पृथु॒पाज॑सो॒ ये ॥२॥

Usho devyamartya vi bhahi chandraratha sunrita irayanti
A tva vahantu suyamaso ashva hiranyavarnam prithupajaso ye

उष॑ः प्रती॒ची भुव॑नानि॒ विश्वो॒र्ध्वा ति॑ष्ठस्य॒मृत॑स्य के॒तुः ।
स॒मा॒नमर्थं॑ चरणी॒यमा॑ना च॒क्रमि॑व नव्य॒स्या व॑वृत्स्व ॥३॥

Ushah pratichi bhuvanani vishvordhva tishthasyamritasya ketuh
Samanamartham charaniyamana chakramiva navyasya vavritsva

अव॒ स्यूमे॑व चिन्व॒ती म॒घोन्यु॒षा या॑ति॒ स्वस॑रस्य॒ पत्नी॑ ।
स्व१र्जन॑न्ती सु॒भगा॑ सु॒दंसा॒ आन्ता॑द् दि॒वः प॑प्रथ॒ आ पृ॑थि॒व्याः ॥४॥

Ava syumeva chinvati maghonyusha yati svasarasya patni
Sva1rjananti subhaga sudansa antad divah papratha a prithivyah

अच्छा॑ वो दे॒वीमु॒षसं॑ विभा॒तीं प्र वो॑ भरध्वं॒ नम॑सा सुवृ॒क्तिम् ।
ऊ॒र्ध्वं म॑धु॒धा दि॒वि पाजो॑ अश्रे॒त् प्र रो॑च॒ना रु॑रुचे र॒ण्वसं॑दृक् ॥५॥

Achchha vo devimushasam vibhatim pra vo bharadhvam namasa suvriktim
Urdhvam madhudha divi pajo ashret pra rochana ruruche ranvasandrik

ऋ॒ताव॑री दि॒वो अ॒र्कैर॑बो॒ध्या रे॒वती॒ रोद॑सी चि॒त्रम॑स्थात् ।
आ॒य॒तीम॑ग्न उ॒षसं॑ विभा॒तीं वा॒ममे॑षि॒ द्रवि॑णं॒ भिक्ष॑माणः ॥६॥

Ritavari divo arkairabodhya revati rodasi chitramasthat
Ayatimagna ushasam vibhatim vamameshi dravinam bhikshamanah

ऋ॒तस्य॑ बु॒ध्न उ॒षसा॑मिष॒ण्यन् वृषा॑ म॒ही रोद॑सी॒ आ वि॑वेश ।
म॒ही मि॒त्रस्य॒ वरु॑णस्य मा॒या च॒न्द्रेव॑ भा॒नुं वि द॑धे पुरु॒त्रा ॥७॥

Ritasya budhna ushasamishanyan vrisha mahi rodasi a vivesha
Mahi mitrasya varunasya maya chandreva bhanum vi dadhe purutra