সূক্ত 56

56.1

৮ প্রজাপতির্বৈশ্বামিত্রঃ, প্রজাপতির্বাচ্যো বা। বিশ্বে দেবাঃ। ত্রিষ্টুপ্।

ন তা মিনন্তি মায়িনো ন ধীরা ব্রতা দেবানাং প্রথমা ধ্রুবাণি ।
ন রোদসী অদ্রুহা বেদ্যাভির্ন পর্বতা নিনমে তস্থিবাংসঃ ॥১॥

56.2

ষড্ ভারাঁ একো অচরন্ বিভর্ত্যৃতং বর্ষিষ্ঠমুপ গাব আগুঃ ।
তিস্রো মহীরুপরাস্তস্থুরত্যা গুহা দ্বে নিহিতে দর্শ্যেকা ॥২॥

56.3

ত্রিপাজস্যো বৃষভো বিশ্বরূপ উত ত্র্যুধা পুরুধ প্রজাবান্ ।
ত্র্যনীকঃ পত্যতে মাহিনাবান্ ত্স রেতোধা বৃষভঃ শশ্বতীনাম্ ॥৩॥

56.4

অভীক আসাং পদবীরবোধ্যাদিত্যানামহ্বে চারু নাম ।
আপশ্চিদস্মা অরমন্ত দেবীঃ পৃথগ্ ব্রজন্তীঃ পরি ষীমবৃঞ্জন্ ॥৪॥

56.5

ত্রী ষধস্থা সিন্ধবস্ত্রিঃ কবীনামুত ত্রিমাতা বিদথেষু সম্রাট্ ।
ঋতাবরীর্যোষণাস্তিস্রো অপ্যাস্ত্রিরা দিবো বিদথে পত্যমানাঃ ॥৫॥

56.6

ত্রিরা দিবঃ সবিতর্বার্যাণি দিবেদিব আ সুব ত্রির্নো অহ্নঃ ।
ত্রিধাতু রায় আ সুবা বসূনি ভগ ত্রাতর্ধিষণে সাতয়ে ধাঃ ॥৬॥

56.7

ত্রিরা দিবঃ সবিতা সোষবীতি রাজানা মিত্রাবরুণা সুপাণী ।
আপশ্চিদস্য রোদসী চিদুর্বী রত্নং ভিক্ষন্ত সবিতুঃ সবায় ॥৭॥

56.8

ত্রিরুত্তমা দূণশা রোচনানি ত্রয়ো রাজন্ত্যসুরস্য বীরাঃ ।
ঋতাবান ইষিরা দূলভাসস্ত্রিরা দিবো বিদথে সন্তু দেবাঃ ॥৮॥