সূক্ত 55

55.1

২২ প্রজাপতির্বৈশ্বামিত্রঃ, প্রজাপতির্বাচ্যো বা। বিশ্বে দেবাঃ। ত্রিষ্টুপ্।

উষসঃ পূর্বা অধ যদ্ ব্যূষুর্মহদ্ বি জজ্ঞে অক্ষরং পদে গোঃ ।
ব্রতা দেবানামুপ নু প্রভূষন্ মহদ্ দেবানামসুরত্বমেকম্ ॥১॥

মো ষূ ণো অত্র জুহুরন্ত দেবা মা পূর্বে অগ্নে পিতরঃ পদজ্ঞাঃ ।
পুরাণ্যোঃ সদ্মনোঃ কেতুরন্তর্মহদ্ দেবানামসুরত্বমেকম্ ॥২॥

বি মে পুরুত্রা পতয়ন্তি কামাঃ শম্যচ্ছা দীদ্যে পূর্ব্যাণি ।
সমিদ্ধে অগ্নাবৃতমিদ্ বদেম মহদ্ দেবানামসুরত্বমেকম্ ॥৩॥

সমানো রাজা বিভৃতঃ পুরুত্রা শয়ে শয়াসু প্রয়ুতো বনানু ।
অন্যা বত্সং ভরতি ক্ষেতি মাতা মহদ্ দেবানামসুরত্বমেকম্ ॥৪॥

আক্ষিৎ পূর্বাস্বপরা অনূরুৎ সদ্যো জাতাসু তরুণীষ্বন্তঃ ।
অন্তর্বতীঃ সুবতে অপ্রবীতা মহদ্ দেবানামসুরত্বমেকম্ ॥৫॥

শয়ুঃ পরস্তাদধ নু দ্বিমাতা ঽবন্ধনশ্চরতি বত্স একঃ ।
মিত্রস্য তা বরুণস্য ব্রতানি মহদ্ দেবানামসুরত্বমেকম্ ॥৬॥

দ্বিমাতা হোতা বিদথেষু সম্রালন্বগ্রং চরতি ক্ষেতি বুধ্নঃ ।
প্র রণ্যানি রণ্যবাচো ভরন্তে মহদ্ দেবানামসুরত্বমেকম্ ॥৭॥

শূরস্যেব যুধ্যতো অন্তমস্য প্রতীচীনং দদৃশে বিশ্বমায়ৎ ।
অন্তর্মতিশ্চরতি নিষ্ষিধং গোর্মহদ্ দেবানামসুরত্বমেকম্ ॥৮॥

নি বেবেতি পলিতো দূত আস্বন্তর্মহাংশ্চরতি রোচনেন ।
বপূংষি বিভ্রদভি নো বি চষ্টে মহদ্ দেবানামসুরত্বমেকম্ ॥৯॥

বিষ্ণুর্গোপাঃ পরমং পাতি পাথঃ প্রিয়া ধামান্যমৃতা দধানঃ ।
অগ্নিষ্টা বিশ্বা ভুবনানি বেদ মহদ্ দেবানামসুরত্বমেকম্ ॥১০॥

নানা চক্রাতে যম্যা৩বপূংষি তয়োরন্যদ্ রোচতে কৃষ্ণমন্যৎ ।
শ্যাবী চ যদরুষী চ স্বসারৌ মহদ্ দেবানামসুরত্বমেকম্ ॥১১॥

মাতা চ যত্র দুহিতা চ ধেনূ সবর্দুঘে ধাপয়েতে সমীচী ।
ঋতস্য তে সদসীলে অন্তর্মহদ্ দেবানামসুরত্বমেকম্ ॥১২॥

অন্যস্যা বত্সং রিহতী মিমায় কয়া ভুবা নি দধে ধেনুরূধঃ ।
ঋতস্য সা পয়সাপিন্বতেলা মহদ্দেবানামসুরত্বমেকম্ ॥১৩॥

পদ্যা বস্তে পুরুরূপা বপূংষ্যূর্ধ্বা তস্থৌ ত্র্যবিং রেরিহাণা ।
ঋতস্য সদ্ম বি চরামি বিদ্বান্ মহদ্ দেবানামসুরত্বমেকম্ ॥১৪॥

পদে ইব নিহিতে দস্মে অন্তস্তয়োরন্যদ্ গুহ্যমাবিরন্যৎ ।
সধ্রীচীনা পথ্যা৩ সা বিষূচী মহদ্ দেবানামসুরত্বমেকম্ ॥১৫॥

আ ধেনবো ধুনয়ন্তামশিশ্বীঃ সবর্দুঘাঃ শশয়া অপ্রদুগ্ধাঃ ।
নব্যানব্যা যুবতয়ো ভবন্তীর্মহদ্ দেবানামসুরত্বমেকম্ ॥১৬॥

যদন্যাসু বৃষভো রোরবীতি সো অন্যস্মিন্ যূথে নি দধাতি রেতঃ ।
স হি ক্ষপাবান্ ত্স ভগঃ স রাজা মহদ্ দেবানামসুরত্বমেকম্ ॥১৭॥

বীরস্য নু স্বশ্ব্যং জনাসঃ প্র নু বোচাম বিদুরস্য দেবাঃ ।
ষোলহা যুক্তাঃ পঞ্চপঞ্চা বহন্তি মহদ্ দেবানামসুরত্বমেকম্ ॥১৮॥

দেবস্ত্বষ্টা সবিতা বিশ্বরূপঃ পুপোষ প্রজাঃ পুরুধা জজান ।
ইমা চ বিশ্বা ভুবনান্যস্য মহদ্ দেবানামসুরত্বমেকম্ ॥১৯॥

মহী সমৈরচ্চম্বা সমীচী উভে তে অস্য বসুনা ন্যৃষ্টে ।
শৃণ্বে বীরো বিন্দমানো বসূনি মহদ্ দেবানামসুরত্বমেকম্ ॥২০॥

ইমাং চ নঃ পৃথিবীং বিশ্বধায়া উপ ক্ষেতি হিতমিত্রো ন রাজা ।
পুরঃসদঃ শর্মসদো ন বীরা মহদ্ দেবানামসুরত্বমেকম্ ॥২১॥

নিষ্ষিধ্বরীস্ত ওষধীরুতাপো রয়িং ত ইন্দ্র পৃথিবী বিভর্তি ।
সখায়স্তে বামভাজঃ স্যাম মহদ্ দেবানামসুরত্বমেকম্ ॥২২॥