সূক্ত 54

54.1

২২ প্রজাপতির্বৈশ্বামিত্রঃ, প্রজাপতির্বাচ্যো বা। বিশ্বে দেবাঃ। ত্রিষ্টুপ্।

ইমং মহে বিদথ্যায় শূষং শশ্বৎ কৃত্ব ঈড্যায় প্র জভ্রুঃ ।
শৃণোতু নো দম্যেভিরনীকৈঃ শৃণোত্বগ্নির্দিব্যৈরজস্রঃ ॥১॥

মহি মহে দিবে অর্চা পৃথিব্যৈ কামো ম ইচ্ছঞ্চরতি প্রজানন্ ।
যয়োর্হ স্তোমে বিদথেষু দেবাঃ সপর্যবো মাদয়ন্তে সচায়োঃ ॥২॥

যুবোর্ঋতং রোদসী সত্যমস্তু মহে ষু ণঃ সুবিতায় প্র ভূতম্ ।
ইদং দিবে নমো অগ্নে পৃথিব্যৈ সপর্যামি প্রয়সা যামি রত্নম্ ॥৩॥

উতো হি বাং পূর্ব্যা আবিবিদ্র ঋতাবরী রোদসী সত্যবাচঃ ।
নরশ্চিদ্ বাং সমিথে শূরসাতৌ ববন্দিরে পৃথিবি বেবিদানাঃ ॥৪॥

কো অদ্ধা বেদ ক ইহ প্র বোচদ্দেবাঁ অচ্ছা পথ্যা৩ কা সমেতি ।
দদৃশ্র এষামবমা সদাংসি পরেষু যা গুহ্যেষু ব্রতেষু ॥৫॥

কবির্নৃচক্ষা অভি ষীমচষ্ট ঋতস্য যোনা বিঘৃতে মদন্তী ।
নানা চক্রাতে সদনং যথা বেঃ সমানেন ক্রতুনা সংবিদানে ॥৬॥

সমান্যা বিয়ুতে দূরেঅন্তে ধ্রুবে পদে তস্থতুর্জাগরূকে ।
উত স্বসারা যুবতী ভবন্তী আদু ব্রুবাতে মিথুনানি নাম ॥৭॥

বিশ্বেদেতে জনিমা সং বিবিক্তো মহো দেবান্ বিভ্রতী ন ব্যথেতে ।
এজদ্ ধ্রুবং পত্যতে বিশ্বমেকং চরৎ পতত্রি বিষুণং বি জাতম্ ॥৮॥

সনা পুরাণমধ্যেম্যারান্মহঃ পিতুর্জনিতুর্জামি তন্নঃ ।
দেবাসো যত্র পনিতার এবৈরুরৌ পথি ব্যুতে তস্থুরন্তঃ ॥৯॥

ইমং স্তোমং রোদসী প্র ব্রবীম্যৃদূদরাঃ শৃণবন্নগ্নিজিহ্বাঃ ।
মিত্রঃ সম্রাজো বরুণো যুবান আদিত্যাসঃ কবয়ঃ পপ্রথানাঃ ॥১০॥

হিরণ্যপাণিঃ সবিতা সুজিহ্বস্ত্রিরা দিবো বিদথে পত্যমানঃ ।
দেবেষু চ সবিতঃ শ্লোকমশ্রেরাদস্মভ্যমা সুব সর্বতাতিম্ ॥১১॥

সুকৃৎ সুপাণিঃ স্ববাঁ ঋতাবা দেবস্ত্বষ্টাবসে তানি নো ধাৎ ।
পূষণ্বন্ত ঋভবো মাদয়ধ্বমূর্ধ্বগ্রাবাণো অধ্বরমতষ্ট ॥১২॥

বিদ্যুদ্রথা মরুত ঋষ্টিমন্তো দিবো মর্যা ঋতজাতা অয়াসঃ ।
সরস্বতী শৃণবন্ যজ্ঞিয়াসো ধাতা রয়িং সহবীরং তুরাসঃ ॥১৩॥

বিষ্ণুং স্তোমাসঃ পুরুদস্মমর্কা ভগস্যেব কারিণো যামনি গ্মন্ ।
উরুক্রমঃ ককুহো যস্য পূর্বীর্ন মর্ধন্তি যুবতয়ো জনিত্রীঃ ॥১৪॥

ইন্দ্রো বিশ্বৈর্বীর্যৈ৩ঃ পত্যমান উভে আ পপ্রৌ রোদসী মহিত্বা ।
পুরংদরো বৃত্রহা ধৃষ্ণুষেণঃ সংগৃভ্যা ন আ ভরা ভূরি পশ্বঃ ॥১৫॥

নাসত্যা মে পিতরা বন্ধুপৃচ্ছা সজাত্যমশ্বিনোশ্চারু নাম ।
যুবং হি স্থো রয়িদৌ নো রয়ীণাং দাত্রং রক্ষেথে অকবৈরদব্ধা ॥১৬॥

মহৎ তদ্ বঃ কবয়শ্চারু নাম যদ্ধ দেবা ভবথ বিশ্ব ইন্দ্রে ।
সখ ঋভুভিঃ পুরুহূত প্রিয়েভিরিমাং ধিয়ং সাতয়ে তক্ষতা নঃ ॥১৭॥

অর্যমা ণো অদিতির্যজ্ঞিয়াসোঽদব্ধানি বরুণস্য ব্রতানি ।
যুয়োত নো অনপত্যানি গন্তোঃ প্রজাবান্ নঃ পশুমাঁ অস্তু গাতুঃ ॥১৮॥

দেবানাং দূতঃ পুরুধ প্রসূতোঽনাগান্ নো বোচতু সর্বতাতা ।
শৃণোতু নঃ পৃথিবী দ্যৌরুতাপঃ সূর্যো নক্ষত্রৈরুর্ব১ন্তরিক্ষম্ ॥১৯॥

শৃণ্বন্তু নো বৃষণঃ পর্বতাসো ধ্রুবক্ষেমাস ইলয়া মদন্তঃ ।
আদিত্যৈর্নো অদিতিঃ শৃণোতু যচ্ছন্তু নো মরুতঃ শর্ম ভদ্রম্ ॥২০॥

সদা সুগঃ পিতুমাঁ অস্তু পন্থা মধ্বা দেবা ওষধীঃ সং পিপৃক্ত ।
ভগো মে অগ্নে সখ্যে ন মৃধ্যা উদ্ রায়ো অশ্যাং সদনং পুরুক্ষোঃ ॥২১॥

স্বদস্ব হব্যা সমিষো দিদীহ্যস্মদ্র্য১ক্ সং মিমীহি শ্রবাংসি ।
বিশ্বাঁ অগ্নে পৃত্সু তাঞ্জেষি শত্রূনহা বিশ্বা সুমনা দীদিহী নঃ ॥২২॥