Sukta 54

54.1

22 prajapatirvaishvamitrah, prajapatirvachyo va, vishve devah, trishtup

इ॒मं म॒हे वि॑द॒थ्या॑य शू॒षं शश्व॒त् कृत्व॒ ईड्या॑य॒ प्र ज॑भ्रुः ।
शृ॒णोतु॑ नो॒ दम्ये॑भि॒रनी॑कैः शृ॒णोत्व॒ग्निर्दि॒व्यैरज॑स्रः ॥१॥

Imam mahe vidathyaya shusham shashvat kritva idyaya pra jabhruh
Shrinotu no damyebhiranikaih shrinotvagnirdivyairajasrah

54.2

महि॑ म॒हे दि॒वे अ॑र्चा पृथि॒व्यै कामो॑ म इ॒च्छञ्च॑रति प्रजा॒नन् ।
ययो॑र्ह॒ स्तोमे॑ वि॒दथे॑षु दे॒वाः स॑प॒र्यवो॑ मा॒दय॑न्ते॒ सचा॒योः ॥२॥

Mahi mahe dive archa prithivyai kamo ma ichchhancharati prajanan
Yayorha stome vidatheshu devah saparyavo madayante sachayoh

54.3

यु॒वोर्ऋ॒तं रो॑दसी स॒त्यम॑स्तु म॒हे षु ण॑ः सुवि॒ताय॒ प्र भू॑तम् ।
इ॒दं दि॒वे नमो॑ अग्ने पृथि॒व्यै स॑प॒र्यामि॒ प्रय॑सा॒ यामि॒ रत्न॑म् ॥३॥

Yuvorritam rodasi satyamastu mahe shu nah suvitaya pra bhutam
Idam dive namo agne prithivyai saparyami prayasa yami ratnam

54.4

उ॒तो हि वां॑ पू॒र्व्या आ॑विवि॒द्र ऋता॑वरी रोदसी सत्य॒वाच॑ः ।
नर॑श्चिद् वां समि॒थे शूर॑सातौ ववन्दि॒रे पृ॑थिवि॒ वेवि॑दानाः ॥४॥

Uto hi vam purvya avividra ritavari rodasi satyavachah
Narashchid vam samithe shurasatau vavandire prithivi vevidanah

54.5

को अ॒द्धा वे॑द॒ क इ॒ह प्र वो॑चद्दे॒वाँ अच्छा॑ प॒थ्या॒३ का समे॑ति ।
ददृ॑श्र एषामव॒मा सदां॑सि॒ परे॑षु॒ या गुह्ये॑षु व्र॒तेषु॑ ॥५॥

Ko addha veda ka iha pra vochaddevam achchha pathya3 ka sameti
Dadrishra eshamavama sadansi pareshu ya guhyeshu vrateshu

54.6

क॒विर्नृ॒चक्षा॑ अ॒भि षी॑मचष्ट ऋ॒तस्य॒ योना॒ विघृ॑ते॒ मद॑न्ती ।
नाना॑ चक्राते॒ सद॑नं॒ यथा॒ वेः स॑मा॒नेन॒ क्रतु॑ना संविदा॒ने ॥६॥

Kavirnrichaksha abhi shimachashta ritasya yona vighrite madanti
Nana chakrate sadanam yatha veh samanena kratuna sanvidane

54.7

स॒मा॒न्या वियु॑ते दू॒रेअ॑न्ते ध्रु॒वे प॒दे त॑स्थतुर्जाग॒रूके॑ ।
उ॒त स्वसा॑रा युव॒ती भव॑न्ती॒ आदु॑ ब्रुवाते मिथु॒नानि॒ नाम॑ ॥७॥

Samanya viyute dureante dhruve pade tasthaturjagaruke
Uta svasara yuvati bhavanti adu bruvate mithunani nama

54.8

विश्वेदे॒ते जनि॑मा॒ सं वि॑विक्तो म॒हो दे॒वान् बिभ्र॑ती॒ न व्य॑थेते ।
एज॑द् ध्रु॒वं प॑त्यते॒ विश्व॒मेकं॒ चर॑त् पत॒त्रि विषु॑णं॒ वि जा॒तम् ॥८॥

Vishvedete janima sam vivikto maho devan bibhrati na vyathete
Ejad dhruvam patyate vishvamekam charat patatri vishunam vi jatam

54.9

सना॑ पुरा॒णमध्ये॑म्या॒रान्म॒हः पि॒तुर्ज॑नि॒तुर्जा॒मि तन्न॑ः ।
दे॒वासो॒ यत्र॑ पनि॒तार॒ एवै॑रु॒रौ प॒थि व्यु॑ते त॒स्थुर॒न्तः ॥९॥

Sana puranamadhyemyaranmahah piturjaniturjami tannah
Devaso yatra panitara evairurau pathi vyute tasthurantah

54.10

इ॒मं स्तोमं॑ रोदसी॒ प्र ब्र॑वीम्यृदू॒दरा॑ः शृणवन्नग्निजि॒ह्वाः ।
मि॒त्रः स॒म्राजो॒ वरु॑णो॒ युवा॑न आदि॒त्यास॑ः क॒वय॑ः पप्रथा॒नाः ॥१०॥

Imam stomam rodasi pra bravimyridudarah shrinavannagnijihvah
Mitrah samrajo varuno yuvana adityasah kavayah paprathanah

54.11

हिर॑ण्यपाणिः सवि॒ता सु॑जि॒ह्वस्त्रिरा दि॒वो वि॒दथे॒ पत्य॑मानः ।
दे॒वेषु॑ च सवित॒ः श्लोक॒मश्रे॒राद॒स्मभ्य॒मा सु॑व स॒र्वता॑तिम् ॥११॥

Hiranyapanih savita sujihvastrira divo vidathe patyamanah
Deveshu cha savitah shlokamashreradasmabhyama suva sarvatatim

54.12

सु॒कृत् सु॒पा॒णिः स्ववाँ॑ ऋ॒तावा॑ दे॒वस्त्वष्टाव॑से॒ तानि॑ नो धात् ।
पू॒ष॒ण्वन्त॑ ऋभवो मादयध्वमू॒र्ध्वग्रा॑वाणो अध्व॒रम॑तष्ट ॥१२॥

Sukrit supanih svavam ritava devastvashtavase tani no dhat
Pushanvanta ribhavo madayadhvamurdhvagravano adhvaramatashta

54.13

वि॒द्युद्र॑था म॒रुत॑ ऋष्टि॒मन्तो॑ दि॒वो मर्या॑ ऋ॒तजा॑ता अ॒यास॑ः ।
सर॑स्वती शृणवन् य॒ज्ञिया॑सो॒ धाता॑ र॒यिं स॒हवी॑रं तुरासः ॥१३॥

Vidyudratha maruta rishtimanto divo marya ritajata ayasah
Sarasvati shrinavan yagyiyaso dhata rayim sahaviram turasah

54.14

विष्णुं॒ स्तोमा॑सः पुरुद॒स्मम॒र्का भग॑स्येव का॒रिणो॒ याम॑नि ग्मन् ।
उ॒रु॒क्र॒मः क॑कु॒हो यस्य॑ पू॒र्वीर्न म॑र्धन्ति युव॒तयो॒ जनि॑त्रीः ॥१४॥

Vishnum stomasah purudasmamarka bhagasyeva karino yamani gman
Urukramah kakuho yasya purvirna mardhanti yuvatayo janitrih

54.15

इन्द्रो॒ विश्वै॑र्वी॒र्यै॒३ः पत्य॑मान उ॒भे आ प॑प्रौ॒ रोद॑सी महि॒त्वा ।
पु॒रं॒द॒रो वृ॑त्र॒हा धृ॒ष्णुषे॑णः सं॒गृभ्या॑ न॒ आ भ॑रा॒ भूरि॑ प॒श्वः ॥१५॥

Indro vishvairviryai3h patyamana ubhe a paprau rodasi mahitva
Purandaro vritraha dhrishnushenah sangribhya na a bhara bhuri pashvah

54.16

नास॑त्या मे पि॒तरा॑ बन्धु॒पृच्छा॑ सजा॒त्य॑म॒श्विनो॒श्चारु॒ नाम॑ ।
यु॒वं हि स्थो र॑यि॒दौ नो॑ रयी॒णां दा॒त्रं र॑क्षेथे॒ अक॑वै॒रद॑ब्धा ॥१६॥

Nasatya me pitara bandhuprichchha sajatyamashvinoshcharu nama
Yuvam hi stho rayidau no rayinam datram rakshethe akavairadabdha

54.17

म॒हत् तद् व॑ः कवय॒श्चारु॒ नाम॒ यद्ध॑ देवा॒ भव॑थ॒ विश्व॒ इन्द्रे॑ ।
सख॑ ऋ॒भुभि॑ः पुरुहूत प्रि॒येभि॑रि॒मां धियं॑ सा॒तये॑ तक्षता नः ॥१७॥

Mahat tad vah kavayashcharu nama yaddha deva bhavatha vishva indre
Sakha ribhubhih puruhuta priyebhirimam dhiyam sataye takshata nah

54.18

अ॒र्य॒मा णो॒ अदि॑तिर्य॒ज्ञिया॒सोऽद॑ब्धानि॒ वरु॑णस्य व्र॒तानि॑ ।
यु॒योत॑ नो अनप॒त्यानि॒ गन्तो॑ः प्र॒जावा॑न् नः पशु॒माँ अ॑स्तु गा॒तुः ॥१८॥

Aryama no aditiryagyiyasodabdhani varunasya vratani
Yuyota no anapatyani gantoh prajavan nah pashumam astu gatuh

54.19

दे॒वानां॑ दू॒तः पु॑रु॒ध प्रसू॒तोऽना॑गान् नो वोचतु स॒र्वता॑ता ।
शृ॒णोतु॑ नः पृथि॒वी द्यौरु॒ताप॒ः सूर्यो॒ नक्ष॑त्रैरु॒र्व१न्तरि॑क्षम् ॥१९॥

Devanam dutah purudha prasutonagan no vochatu sarvatata
Shrinotu nah prithivi dyaurutapah suryo nakshatrairurva1ntariksham

54.20

शृ॒ण्वन्तु॑ नो॒ वृष॑ण॒ः पर्व॑तासो ध्रु॒वक्षे॑मास॒ इळ॑या॒ मद॑न्तः ।
आ॒दि॒त्यैर्नो॒ अदि॑तिः शृणोतु॒ यच्छ॑न्तु नो म॒रुत॒ः शर्म॑ भ॒द्रम् ॥२०॥

Shrinvantu no vrishanah parvataso dhruvakshemasa ilaya madantah
Adityairno aditih shrinotu yachchhantu no marutah sharma bhadram

54.21

सदा॑ सु॒गः पि॑तु॒माँ अ॑स्तु॒ पन्था॒ मध्वा॑ देवा॒ ओष॑धी॒ः सं पि॑पृक्त ।
भगो॑ मे अग्ने स॒ख्ये न मृ॑ध्या॒ उद् रा॒यो अ॑श्यां॒ सद॑नं पुरु॒क्षोः ॥२१॥

Sada sugah pitumam astu pantha madhva deva oshadhih sam piprikta
Bhago me agne sakhye na mridhya ud rayo ashyam sadanam purukshoh

54.22

स्वद॑स्व ह॒व्या समिषो॑ दिदीह्यस्म॒द्र्य१क् सं मि॑मीहि॒ श्रवां॑सि ।
विश्वाँ॑ अग्ने पृ॒त्सु ताञ्जे॑षि॒ शत्रू॒नहा॒ विश्वा॑ सु॒मना॑ दीदिही नः ॥२२॥

Svadasva havya samisho didihyasmadrya1k sam mimihi shravansi
Vishvam agne pritsu tanjeshi shatrunaha vishva sumana didihi nah