Sukta 53

53.1

24 gathino vishvamitrah, indrah, 1 indraparvatau, 15, 16 vak, (sasarpari), 17-20 rathangani, 21-24 abhishapah, trishtup, 10, 16 jagati, 13 gayatri, 12, 20, 22 anushtup, 18 brihati

इन्द्रा॑पर्वता बृह॒ता रथे॑न वा॒मीरिष॒ आ व॑हतं सु॒वीरा॑ः ।
वी॒तं ह॒व्यान्य॑ध्व॒रेषु॑ देवा॒ वर्धे॑थां गी॒र्भिरिळ॑या॒ मद॑न्ता ॥१॥

Indraparvata brihata rathena vamirisha a vahatam suvirah
Vitam havyanyadhvareshu deva vardhetham girbhirilaya madanta

53.2

तिष्ठा॒ सु कं॑ मघव॒न् मा परा॑ गा॒ः सोम॑स्य॒ नु त्वा॒ सुषु॑तस्य यक्षि ।
पि॒तुर्न पु॒त्रः सिच॒मा र॑भे त॒ इन्द्र॒ स्वादि॑ष्ठया गि॒रा श॑चीवः ॥२॥

Tishtha su kam maghavan ma para gah somasya nu tva sushutasya yakshi
Piturna putrah sichama rabhe ta indra svadishthaya gira shachivah

53.3

शंसा॑वाध्वर्यो॒ प्रति॑ मे गृणी॒हीन्द्रा॑य॒ वाह॑ः कृणवाव॒ जुष्ट॑म् ।
एदं ब॒र्हिर्यज॑मानस्य सी॒दाथा॑ च भूदु॒क्थमिन्द्रा॑य श॒स्तम् ॥३॥

Shansavadhvaryo prati me grinihindraya vahah krinavava jushtam
Edam barhiryajamanasya sidatha cha bhudukthamindraya shastam

53.4

जा॒येदस्तं॑ मघव॒न् त्सेदु॒ योनि॒स्तदित् त्वा॒ यु॒क्ता हर॑यो वहन्तु ।
य॒दा क॒दा च॑ सु॒नवा॑म॒ सोम॑म॒ग्निष्ट्वा॑ दू॒तो ध॑न्वा॒त्यच्छ॑ ॥४॥

Jayedastam maghavan tsedu yonistadit tva yukta harayo vahantu
Yada kada cha sunavama somamagnishtva duto dhanvatyachchha

53.5

परा॑ याहि मघव॒न्ना च॑ या॒हीन्द्र॑ भ्रातरुभ॒यत्रा॑ ते॒ अर्थ॑म् ।
यत्रा॒ रथ॑स्य बृह॒तो नि॒धानं॑ वि॒मोच॑नं वा॒जिनो॒ रास॑भस्य ॥५॥

Para yahi maghavanna cha yahindra bhratarubhayatra te artham
Yatra rathasya brihato nidhanam vimochanam vajino rasabhasya

53.6

अपा॒ः सोम॒मस्त॑मिन्द्र॒ प्र या॑हि कल्या॒णीर्जा॒या सु॒रणं॑ गृ॒हे ते॑ ।
यत्रा॒ रथ॑स्य बृह॒तो नि॒धानं॑ वि॒मोच॑नं वा॒जिनो॒ दक्षि॑णावत् ॥६॥

Apah somamastamindra pra yahi kalyanirjaya suranam grihe te
Yatra rathasya brihato nidhanam vimochanam vajino dakshinavat

53.7

इ॒मे भो॒जा अङ्गि॑रसो॒ विरू॑पा दि॒वस्पु॒त्रासो॒ असु॑रस्य वी॒राः ।
वि॒श्वामि॑त्राय॒ दद॑तो म॒घानि॑ सहस्रसा॒वे प्र ति॑रन्त॒ आयु॑ः ॥७॥

Ime bhoja angiraso virupa divasputraso asurasya virah
Vishvamitraya dadato maghani sahasrasave pra tiranta ayuh

53.8

रू॒पंरू॑पं म॒घवा॑ बोभवीति मा॒याः कृ॑ण्वा॒नस्त॒न्वं१ परि॒ स्वाम् ।
त्रिर्यद् दि॒वः परि॑ मुहू॒र्तमागा॒त् स्वैर्मन्त्रै॒रनृ॑तुपा ऋ॒तावा॑ ॥८॥

Rupanrupam maghava bobhaviti mayah krinvanastanvan1 pari svam
Triryad divah pari muhurtamagat svairmantrairanritupa ritava

53.9

म॒हाँ ऋषि॑र्देव॒जा दे॒वजू॒तोऽस्त॑भ्ना॒त् सिन्धु॑मर्ण॒वं नृ॒चक्षा॑ः ।
वि॒श्वामि॑त्रो॒ यदव॑हत् सु॒दास॒मप्रि॑यायत कुशि॒केभि॒रिन्द्र॑ः ॥९॥

Maham rishirdevaja devajutostabhnat sindhumarnavam nrichakshah
Vishvamitro yadavahat sudasamapriyayata kushikebhirindrah

53.10

हं॒सा इ॑व कृणुथ॒ श्लोक॒मद्रि॑भि॒र्मद॑न्तो गी॒र्भिर॑ध्व॒रे सु॒ते सचा॑ ।
दे॒वेभि॑र्विप्रा ऋषयो नृचक्षसो॒ वि पि॑बध्वं कुशिकाः सो॒म्यं मधु॑ ॥१०॥

Hansa iva krinutha shlokamadribhirmadanto girbhiradhvare sute sacha
Devebhirvipra rishayo nrichakshaso vi pibadhvam kushikah somyam madhu

53.11

उप॒ प्रेत॑ कुशिकाश्चे॒तय॑ध्व॒मश्वं॑ रा॒ये प्र मु॑ञ्चता सु॒दास॑ः ।
राजा॑ वृ॒त्रं ज॑ङ्घन॒त् प्रागपा॒गुद॒गथा॑ यजाते॒ वर॒ आ पृ॑थि॒व्याः ॥११॥

Upa preta kushikashchetayadhvamashvam raye pra munchata sudasah
Raja vritram janghanat pragapagudagatha yajate vara a prithivyah

53.12

य इ॒मे रोद॑सी उ॒भे अ॒हमिन्द्र॒मतु॑ष्टवम् ।
वि॒श्वामि॑त्रस्य रक्षति॒ ब्रह्मे॒दं भार॑तं॒ जन॑म् ॥१२॥

Ya ime rodasi ubhe ahamindramatushtavam
Vishvamitrasya rakshati brahmedam bharatam janam

53.13

वि॒श्वामि॑त्रा अरासत॒ ब्रह्मेन्द्रा॑य व॒ज्रिणे॑ । कर॒दिन्न॑ः सु॒राध॑सः ॥१३॥

Vishvamitra arasata brahmendraya vajrine, karadinnah suradhasah

53.14

किं ते॑ कृण्वन्ति॒ कीक॑टेषु॒ गावो॒ नाशिरं॑ दु॒ह्रे न त॑पन्ति घ॒र्मम् ।
आ नो॑ भर॒ प्रम॑गन्दस्य॒ वेदो॑ नैचाशा॒खं म॑घवन् रन्धया नः ॥१४॥

Kim te krinvanti kikateshu gavo nashiram duhre na tapanti gharmam
A no bhara pramagandasya vedo naichashakham maghavan randhaya nah

53.15

स॒स॒र्प॒रीरम॑तिं॒ बाध॑माना बृ॒हन्मि॑माय ज॒मद॑ग्निदत्ता ।
आ सूर्य॑स्य दुहि॒ता त॑तान॒ श्रवो॑ दे॒वेष्व॒मृत॑मजु॒र्यम् ॥१५॥

Sasarpariramatim badhamana brihanmimaya jamadagnidatta
A suryasya duhita tatana shravo deveshvamritamajuryam

53.16

स॒स॒र्प॒रीर॑भर॒त् तूय॑मे॒भ्योऽधि॒ श्रव॒ः पाञ्च॑जन्यासु कृ॒ष्टिषु॑ ।
सा प॒क्ष्या॒३ नव्य॒मायु॒र्दधा॑ना॒ यां मे॑ पलस्तिजमद॒ग्नयो॑ द॒दुः ॥१६॥

Sasarparirabharat tuyamebhyodhi shravah panchajanyasu krishtishu
Sa pakshya3 navyamayurdadhana yam me palastijamadagnayo daduh

53.17

स्थि॒रौ गावौ॑ भवतां वी॒ळुरक्षो॒ मेषा वि व॑र्हि॒ मा यु॒गं वि शा॑रि ।
इन्द्र॑ः पात॒ल्ये॑ ददतां॒ शरी॑तो॒ररि॑ष्टनेमे अ॒भि न॑ः सचस्व ॥१७॥

Sthirau gavau bhavatam viluraksho mesha vi varhi ma yugam vi shari
Indrah patalye dadatam sharitorarishtaneme abhi nah sachasva

53.18

बलं॑ धेहि त॒नूषु॑ नो॒ बल॑मिन्द्रान॒ळुत्सु॑ नः ।
बलं॑ तो॒काय॒ तन॑याय जी॒वसे॒ त्वं हि ब॑ल॒दा असि॑ ॥१८॥

Balam dhehi tanushu no balamindranalutsu nah
Balam tokaya tanayaya jivase tvam hi balada asi

53.19

अ॒भि व्य॑यस्व खदि॒रस्य॒ सार॒मोजो॑ धेहि स्पन्द॒ने शिं॒शपा॑याम् ।
अक्ष॑ वीळो वीळित वी॒ळय॑स्व॒ मा यामा॑द॒स्मादव॑ जीहिपो नः ॥१९॥

Abhi vyayasva khadirasya saramojo dhehi spandane shinshapayam
Aksha vilo vilita vilayasva ma yamadasmadava jihipo nah

53.20

अ॒यम॒स्मान् वन॒स्पति॒र्मा च॒ हा मा च॑ रीरिषत् ।
स्व॒स्त्या गृ॒हेभ्य॒ आव॒सा आ वि॒मोच॑नात् ॥२०॥

Ayamasman vanaspatirma cha ha ma cha ririshat
Svastya grihebhya avasa a vimochanat

53.21

इन्द्रो॒तिभि॑र्बहु॒लाभि॑र्नो अ॒द्य या॑च्छ्रे॒ष्ठाभि॑र्मघवञ्छूर जिन्व ।
यो नो॒ द्वेष्ट्यध॑र॒ः सस्प॑दीष्ट॒ यमु॑ द्वि॒ष्मस्तमु॑ प्रा॒णो ज॑हातु ॥२१॥

Indrotibhirbahulabhirno adya yachchhreshthabhirmaghavanchhura jinva
Yo no dveshtyadharah saspadishta yamu dvishmastamu prano jahatu

53.22

प॒र॒शुं चि॒द् वि त॑पति शिम्ब॒लं चि॒द् वि वृ॑श्चति ।
उ॒खा चि॑दिन्द्र॒ येष॑न्ती॒ प्रय॑स्ता॒ फेन॑मस्यति ॥२२॥

Parashum chid vi tapati shimbalam chid vi vrishchati
Ukha chidindra yeshanti prayasta phenamasyati

53.23

न साय॑कस्य चिकिते जनासो लो॒धं न॑यन्ति॒ पशु॒ मन्य॑मानाः ।
नावा॑जिनं वा॒जिना॑ हासयन्ति॒ न ग॑र्द॒भं पु॒रो अश्वा॑न्नयन्ति ॥२३॥

Na sayakasya chikite janaso lodham nayanti pashu manyamanah
Navajinam vajina hasayanti na gardabham puro ashvannayanti

53.24

इ॒म इ॑न्द्र भर॒तस्य॑ पु॒त्रा अ॑पपि॒त्वं चि॑कितु॒र्न प्र॑पि॒त्वम् ।
हि॒न्वन्त्यश्व॒मर॑णं॒ न नित्यं॒ ज्या॑वाजं॒ परि॑ णयन्त्या॒जौ ॥२४॥

Ima indra bharatasya putra apapitvam chikiturna prapitvam
Hinvantyashvamaranam na nityam jyavajam pari nayantyajau