Sukta 52

52.1

8 gathino vishvamitrah, indrah, trishtup, 1-4gayatri, 6 jagati

धा॒नाव॑न्तं कर॒म्भिण॑मपू॒पव॑न्तमु॒क्थिन॑म् । इन्द्र॑ प्रा॒तर्जु॑षस्व नः ॥१॥

Dhanavantam karambhinamapupavantamukthinam, indra pratarjushasva nah

पु॒रो॒ळाशं॑ पच॒त्यं॑ जु॒षस्वे॒न्द्रा गु॑रस्व च । तुभ्यं॑ ह॒व्यानि॑ सिस्रते ॥२॥

Purolasham pachatyam jushasvendra gurasva cha, tubhyam havyani sisrate

पु॒रो॒ळाशं॑ च नो॒ घसो॑ जो॒षया॑से॒ गिर॑श्च नः । व॒धू॒युरि॑व॒ योष॑णाम् ॥३॥

Purolasham cha no ghaso joshayase girashcha nah, vadhuyuriva yoshanam

पु॒रो॒ळाशं॑ सनश्रुत प्रातःसा॒वे जु॑षस्व नः । इन्द्र॒ क्रतु॒र्हि ते॑ बृ॒हन् ॥४॥

Purolasham sanashruta pratahsave jushasva nah, indra kraturhi te brihan

माध्यं॑दिनस्य॒ सव॑नस्य धा॒नाः पु॑रो॒ळाश॑मिन्द्र कृष्वे॒ह चारु॑म् ।
प्र यत् स्तो॒ता ज॑रि॒ता तूर्ण्य॑र्थो वृषा॒यमा॑ण॒ उप॑ गी॒र्भिरीट्टे॑ ॥५॥

Madhyandinasya savanasya dhanah purolashamindra krishveha charum
Pra yat stota jarita turnyartho vrishayamana upa girbhiritte

तृ॒तीये॑ धा॒नाः सव॑ने पुरुष्टुत पुरो॒ळाश॒माहु॑तं मामहस्व नः ।
ऋ॒भु॒मन्तं॒ वाज॑वन्तं त्वा कवे॒ प्रय॑स्वन्त॒ उप॑ शिक्षेम धी॒तिभि॑ः ॥६॥

Tritiye dhanah savane purushtuta purolashamahutam mamahasva nah
Ribhumantam vajavantam tva kave prayasvanta upa shikshema dhitibhih

पू॒ष॒ण्वते॑ ते चकृमा कर॒म्भं हरि॑वते॒ हर्य॑श्वाय धा॒नाः ।
अ॒पू॒पम॑द्धि॒ सग॑णो म॒रुद्भि॒ः सोमं॑ पिब वृत्र॒हा शू॑र वि॒द्वान् ॥७॥

Pushanvate te chakrima karambham harivate haryashvaya dhanah
Apupamaddhi sagano marudbhih somam piba vritraha shura vidvan

प्रति॑ धा॒ना भ॑रत॒ तूय॑मस्मै पुरो॒ळाशं॑ वी॒रत॑माय नृ॒णाम् ।
दि॒वेदि॑वे स॒दृशी॑रिन्द्र॒ तुभ्यं॒ वर्ध॑न्तु त्वा सोम॒पेया॑य धृष्णो ॥८॥

Prati dhana bharata tuyamasmai purolasham viratamaya nrinam
Divedive sadrishirindra tubhyam vardhantu tva somapeyaya dhrishno