Sukta 51

51.1

12 gathino vishvamitrah, indrah, trishtup, 1-3jagati, 10-12 gayatri

च॒र्ष॒णी॒धृतं॑ म॒घवा॑नमु॒क्थ्य१मिन्द्रं॒ गिरो॑ बृह॒तीर॒भ्य॑नूषत ।
वा॒वृ॒धा॒नं पु॑रुहू॒तं सु॑वृ॒क्तिभि॒रम॑र्त्यं॒ जर॑माणं दि॒वेदि॑वे ॥१॥

Charshanidhritam maghavanamukthya1mindram giro brihatirabhyanushata
Vavridhanam puruhutam suvriktibhiramartyam jaramanam divedive

51.2

श॒तक्र॑तुमर्ण॒वं शा॒किनं॒ नरं॒ गिरो॑ म॒ इन्द्र॒मुप॑ यन्ति वि॒श्वत॑ः ।
वा॒ज॒सनिं॑ पू॒र्भिदं॒ तूर्णि॑म॒प्तुरं॑ धाम॒साच॑मभि॒षाचं॑ स्व॒र्विद॑म् ॥२॥

Shatakratumarnavam shakinam naram giro ma indramupa yanti vishvatah
Vajasanim purbhidam turnimapturam dhamasachamabhishacham svarvidam

51.3

आ॒क॒रे वसो॑र्जरि॒ता प॑नस्यतेऽने॒हस॒ः स्तुभ॒ इन्द्रो॑ दुवस्यति ।
वि॒वस्व॑त॒ः सद॑न॒ आ हि पि॑प्रि॒ये स॑त्रा॒साह॑मभिमाति॒हनं॑ स्तुहि ॥३॥

Akare vasorjarita panasyatenehasah stubha indro duvasyati
Vivasvatah sadana a hi pipriye satrasahamabhimatihanam stuhi

51.4

नृ॒णामु॑ त्वा॒ नृत॑मं गी॒र्भिरु॒क्थैर॒भि प्र वी॒रम॑र्चता स॒बाध॑ः ।
सं सह॑से पुरुमा॒यो जि॑हीते॒ नमो॑ अस्य प्र॒दिव॒ एक॑ ईशे ॥४॥

Nrinamu tva nritamam girbhirukthairabhi pra viramarchata sabadhah
Sam sahase purumayo jihite namo asya pradiva eka ishe

51.5

पू॒र्वीर॑स्य नि॒ष्षिधो॒ मर्त्ये॑षु पु॒रू वसू॑नि पृथि॒वी बि॑भर्ति ।
इन्द्रा॑य॒ द्याव॒ ओष॑धीरु॒तापो॑ र॒यिं र॑क्षन्ति जी॒रयो॒ वना॑नि ॥५॥

Purvirasya nishshidho martyeshu puru vasuni prithivi bibharti
Indraya dyava oshadhirutapo rayim rakshanti jirayo vanani

51.6

तुभ्यं॒ ब्रह्मा॑णि॒ गिर॑ इन्द्र॒ तुभ्यं॑ स॒त्रा द॑धिरे हरिवो जु॒षस्व॑ ।
बो॒ध्या॒३पिरव॑सो॒ नूत॑नस्य॒ सखे॑ वसो जरि॒तृभ्यो॒ वयो॑ धाः ॥६॥

Tubhyam brahmani gira indra tubhyam satra dadhire harivo jushasva
Bodhya3piravaso nutanasya sakhe vaso jaritribhyo vayo dhah

51.7

इन्द्र॑ मरुत्व इ॒ह पा॑हि॒ सोमं॒ यथा॑ शार्या॒ते अपि॑बः सु॒तस्य॑ ।
तव॒ प्रणी॑ती॒ तव॑ शूर॒ शर्म॒न्ना वि॑वासन्ति क॒वय॑ः सुय॒ज्ञाः ॥७॥

Indra marutva iha pahi somam yatha sharyate apibah sutasya
Tava praniti tava shura sharmanna vivasanti kavayah suyagyah

51.8

स वा॑वशा॒न इ॒ह पा॑हि॒ सोमं॑ म॒रुद्भि॑रिन्द्र॒ सखि॑भिः सु॒तं न॑ः ।
जा॒तं यत्त्वा॒ परि॑ दे॒वा अभू॑षन् म॒हे भरा॑य पुरुहूत॒ विश्वे॑ ॥८॥

Sa vavashana iha pahi somam marudbhirindra sakhibhih sutam nah
Jatam yattva pari deva abhushan mahe bharaya puruhuta vishve

51.9

अ॒प्तूर्ये॑ मरुत आ॒पिरे॒षोऽम॑न्द॒न्निन्द्र॒मनु॒ दाति॑वाराः ।
तेभि॑ः सा॒कं पि॑बतु वृत्रखा॒दः सु॒तं सोमं॑ दा॒शुष॒ः स्वे स॒धस्थे॑ ॥९॥

Apturye maruta apireshomandannindramanu dativarah
Tebhih sakam pibatu vritrakhadah sutam somam dashushah sve sadhasthe

51.10

इ॒दं ह्यन्वोज॑सा सु॒तं रा॑धानां पते । पिबा॒ त्व१स्य गि॑र्वणः ॥१०॥

Idam hyanvojasa sutam radhanam pate, piba tva1sya girvanah

51.11

यस्ते॒ अनु॑ स्व॒धामस॑त्सु॒ते नि य॑च्छ त॒न्व॑म् । स त्वा॑ ममत्तु सो॒म्यम् ॥११॥

Yaste anu svadhamasatsute ni yachchha tanvam, sa tva mamattu somyam

51.12

प्र ते॑ अश्नोतु कु॒क्ष्योः प्रेन्द्र॒ ब्रह्म॑णा॒ शिर॑ः । प्र बा॒हू शू॑र॒ राध॑से ॥१२॥

Pra te ashnotu kukshyoh prendra brahmana shirah, pra bahu shura radhase