Sukta 50

50.1

5 gathino vishvamitrah, indrah, trishtup

इन्द्र॒ः स्वाहा॑ पिबतु॒ यस्य॒ सोम॑ आ॒गत्या॒ तुम्रो॑ वृष॒भो म॒रुत्वा॑न् ।
ओरु॒व्यचा॑ः पृणतामे॒भिरन्नै॒रास्य॑ ह॒विस्त॒न्व१ः काम॑मृध्याः ॥१॥

Indrah svaha pibatu yasya soma agatya tumro vrishabho marutvan
Oruvyachah prinatamebhirannairasya havistanva1h kamamridhyah

50.2

आ ते॑ सप॒र्यू ज॒वसे॑ युनज्मि॒ ययो॒रनु॑ प्र॒दिव॑ः श्रु॒ष्टिमाव॑ः ।
इ॒ह त्वा॑ धेयु॒र्हर॑यः सुशिप्र॒ पिबा॒ त्व१स्य सुषु॑तस्य॒ चारो॑ः ॥२॥

A te saparyu javase yunajmi yayoranu pradivah shrushtimavah
Iha tva dheyurharayah sushipra piba tva1sya sushutasya charoh

50.3

गोभि॑र्मिमि॒क्षुं द॑धिरे सुपा॒रमिन्द्रं॒ ज्यैष्ठ्या॑य॒ धाय॑से गृणा॒नाः ।
म॒न्दा॒नः सोमं॑ पपि॒वाँ ऋ॑जीषि॒न् त्सम॒स्मभ्यं॑ पुरु॒धा गा इ॑षण्य ॥३॥

Gobhirmimikshum dadhire suparamindram jyaishthyaya dhayase grinanah
Mandanah somam papivam rijishin tsamasmabhyam purudha ga ishanya

50.4

इ॒मं कामं॑ मन्दया॒ गोभि॒रश्वै॑श्च॒न्द्रव॑ता॒ राध॑सा प॒प्रथ॑श्च ।
स्व॒र्यवो॑ म॒तिभि॒स्तुभ्यं॒ विप्रा॒ इन्द्रा॑य॒ वाह॑ः कुशि॒कासो॑ अक्रन् ॥४॥

Imam kamam mandaya gobhirashvaishchandravata radhasa paprathashcha
Svaryavo matibhistubhyam vipra indraya vahah kushikaso akran

50.5

शु॒नं हु॑वेम म॒घवा॑न॒मिन्द्र॑म॒स्मिन् भरे॒ नृत॑मं॒ वाज॑सातौ ।
शृ॒ण्वन्त॑मु॒ग्रमू॒तये॑ स॒मत्सु॒ घ्नन्तं॑ वृ॒त्राणि॑ सं॒जितं॒ धना॑नाम् ॥५॥

Shunam huvema maghavanamindramasmin bhare nritamam vajasatau
Shrinvantamugramutaye samatsu ghnantam vritrani sanjitam dhananam