Sukta 56

56.1

8 prajapatirvaishvamitrah, prajapatirvachyo va, vishve devah, trishtup

न ता मि॑नन्ति मा॒यिनो॒ न धीरा॑ व्र॒ता दे॒वानां॑ प्रथ॒मा ध्रु॒वाणि॑ ।
न रोद॑सी अ॒द्रुहा॑ वे॒द्याभि॒र्न पर्व॑ता नि॒नमे॑ तस्थि॒वांस॑ः ॥१॥

Na ta minanti mayino na dhira vrata devanam prathama dhruvani
Na rodasi adruha vedyabhirna parvata niname tasthivansah

षड् भा॒राँ एको॒ अच॑रन् बिभर्त्यृ॒तं वर्षि॑ष्ठ॒मुप॒ गाव॒ आगु॑ः ।
ति॒स्रो म॒हीरुप॑रास्तस्थु॒रत्या॒ गुहा॒ द्वे निहि॑ते॒ दर्श्येका॑ ॥२॥

Shad bharam eko acharan bibhartyritam varshishthamupa gava aguh
Tisro mahiruparastasthuratya guha dve nihite darshyeka

त्रि॒पा॒ज॒स्यो वृ॑ष॒भो वि॒श्वरू॑प उ॒त त्र्यु॒धा पु॑रु॒ध प्र॒जावा॑न् ।
त्र्य॒नी॒कः प॑त्यते॒ माहि॑नावा॒न् त्स रे॑तो॒धा वृ॑ष॒भः शश्व॑तीनाम् ॥३॥

Tripajasyo vrishabho vishvarupa uta tryudha purudha prajavan
Tryanikah patyate mahinavan tsa retodha vrishabhah shashvatinam

अ॒भीक॑ आसां पद॒वीर॑बोध्यादि॒त्याना॑मह्वे॒ चारु॒ नाम॑ ।
आप॑श्चिदस्मा अरमन्त दे॒वीः पृथ॒ग् व्रज॑न्ती॒ः परि॑ षीमवृञ्जन् ॥४॥

Abhika asam padavirabodhyadityanamahve charu nama
Apashchidasma aramanta devih prithag vrajantih pari shimavrinjan

त्री ष॒धस्था॑ सिन्धव॒स्त्रिः क॑वी॒नामु॒त त्रि॑मा॒ता वि॒दथे॑षु स॒म्राट् ।
ऋ॒ताव॑री॒र्योष॑णास्ति॒स्रो अप्या॒स्त्रिरा दि॒वो वि॒दथे॒ पत्य॑मानाः ॥५॥

Tri shadhastha sindhavastrih kavinamuta trimata vidatheshu samrat
Ritavariryoshanastisro apyastrira divo vidathe patyamanah

त्रिरा दि॒वः स॑वित॒र्वार्या॑णि दि॒वेदि॑व॒ आ सु॑व॒ त्रिर्नो॒ अह्न॑ः ।
त्रि॒धातु॑ रा॒य आ सु॑वा॒ वसू॑नि॒ भग॑ त्रातर्धिषणे सा॒तये॑ धाः ॥६॥

Trira divah savitarvaryani divediva a suva trirno ahnah
Tridhatu raya a suva vasuni bhaga tratardhishane sataye dhah

त्रिरा दि॒वः स॑वि॒ता सो॑षवीति॒ राजा॑ना मि॒त्रावरु॑णा सुपा॒णी ।
आप॑श्चिदस्य॒ रोद॑सी चिदु॒र्वी रत्नं॑ भिक्षन्त सवि॒तुः स॒वाय॑ ॥७॥

Trira divah savita soshaviti rajana mitravaruna supani
Apashchidasya rodasi chidurvi ratnam bhikshanta savituh savaya

त्रिरु॑त्त॒मा दू॒णशा॑ रोच॒नानि॒ त्रयो॑ राज॒न्त्यसु॑रस्य वी॒राः ।
ऋ॒तावा॑न इषि॒रा दू॒ळभा॑स॒स्त्रिरा दि॒वो वि॒दथे॑ सन्तु दे॒वाः ॥८॥

Triruttama dunasha rochanani trayo rajantyasurasya virah
Ritavana ishira dulabhasastrira divo vidathe santu devah