সূক্ত 43

43.1

৮ গাথিনো বিশ্বামিত্রঃ। ইন্দ্রঃ। ত্রিষ্টুপ্।

আ যাহ্যর্বাঙুপ বন্ধুরেষ্ঠাস্তবেদনু প্রদিবঃ সোমপেয়ম্ ।
প্রিয়া সখায়া বি মুচোপ বর্হিস্ত্বামিমে হব্যবাহো হবন্তে ॥১॥

43.2

আ যাহি পূর্বীরতি চর্ষণীরাঁ অর্য আশিষ উপ নো হরিভ্যাম্ ।
ইমা হি ত্বা মতয়ঃ স্তোমতষ্টা ইন্দ্র হবন্তে সখ্যং জুষাণাঃ ॥২॥

43.3

আ নো যজ্ঞং নমোবৃধং সজোষা ইন্দ্র দেব হরিভির্যাহি তূয়ম্ ।
অহং হি ত্বা মতিভির্জোহবীমি ঘৃতপ্রয়াঃ সধমাদে মধূনাম্ ॥৩॥

43.4

আ চ ত্বামেতা বৃষণা বহাতো হরী সখায়া সুধুরা স্বঙ্গা ।
ধানাবদিন্দ্রঃ সবনং জুষাণঃ সখা সখ্যুঃ শৃণবদ্ বন্দনানি ॥৪॥

43.5

কুবিন্মা গোপাং করসে জনস্য কুবিদ্ রাজানং মঘবন্নৃজীষিন্ ।
কুবিন্ম ঋষিং পপিবাংসং সুতস্য কুবিন্মে বস্বো অমৃতস্য শিক্ষাঃ ॥৫॥

43.6

আ ত্বা বৃহন্তো হরয়ো যুজানা অর্বাগিন্দ্র সধমাদো বহন্তু ।
প্র যে দ্বিতা দিব ঋঞ্জন্ত্যাতাঃ সুসম্মৃষ্টাসো বৃষভস্য মূরাঃ ॥৬॥

43.7

ইন্দ্র পিব বৃষধূতস্য বৃষ্ণ আ যং তে শ্যেন উশতে জভার ।
যস্য মদে চ্যাবয়সি প্র কৃষ্টীর্যস্য মদে অপ গোত্রা ববর্থ ॥৭॥

43.8

শুনং হুবেম মঘবানমিন্দ্রমস্মিন্ ভরে নৃতমং বাজসাতৌ ।
শৃণ্বন্তমুগ্রমূতয়ে সমত্সু ঘ্নন্তং বৃত্রাণি সংজিতং ধনানাম্ ॥৮॥