Sukta 43

43.1

8 gathino vishvamitrah, indrah, trishtup

आ या॑ह्य॒र्वाङुप॑ वन्धुरे॒ष्ठास्तवेदनु॑ प्र॒दिव॑ः सोम॒पेय॑म् ।
प्रि॒या सखा॑या॒ वि मु॒चोप॑ ब॒र्हिस्त्वामि॒मे ह॑व्य॒वाहो॑ हवन्ते ॥१॥

A yahyarvangupa vandhureshthastavedanu pradivah somapeyam
Priya sakhaya vi muchopa barhistvamime havyavaho havante

आ या॑हि पू॒र्वीरति॑ चर्ष॒णीराँ अ॒र्य आ॒शिष॒ उप॑ नो॒ हरि॑भ्याम् ।
इ॒मा हि त्वा॑ म॒तय॒ः स्तोम॑तष्टा॒ इन्द्र॒ हव॑न्ते स॒ख्यं जु॑षा॒णाः ॥२॥

A yahi purvirati charshaniram arya ashisha upa no haribhyam
Ima hi tva matayah stomatashta indra havante sakhyam jushanah

आ नो॑ य॒ज्ञं न॑मो॒वृधं॑ स॒जोषा॒ इन्द्र॑ देव॒ हरि॑भिर्याहि॒ तूय॑म् ।
अ॒हं हि त्वा॑ म॒तिभि॒र्जोह॑वीमि घृ॒तप्र॑याः सध॒मादे॒ मधू॑नाम् ॥३॥

A no yagyam namovridham sajosha indra deva haribhiryahi tuyam
Aham hi tva matibhirjohavimi ghritaprayah sadhamade madhunam

आ च॒ त्वामे॒ता वृष॑णा॒ वहा॑तो॒ हरी॒ सखा॑या सु॒धुरा॒ स्वङ्गा॑ ।
धा॒नाव॒दिन्द्र॒ः सव॑नं जुषा॒णः सखा॒ सख्यु॑ः शृणव॒द् वन्द॑नानि ॥४॥

A cha tvameta vrishana vahato hari sakhaya sudhura svanga
Dhanavadindrah savanam jushanah sakha sakhyuh shrinavad vandanani

कु॒विन्मा॑ गो॒पां कर॑से॒ जन॑स्य कु॒विद् राजा॑नं मघवन्नृजीषिन् ।
कु॒विन्म॒ ऋषिं॑ पपि॒वांसं॑ सु॒तस्य॑ कु॒विन्मे॒ वस्वो॑ अ॒मृत॑स्य॒ शिक्षा॑ः ॥५॥

Kuvinma gopam karase janasya kuvid rajanam maghavannrijishin
Kuvinma rishim papivansam sutasya kuvinme vasvo amritasya shikshah

आ त्वा॑ बृ॒हन्तो॒ हर॑यो युजा॒ना अ॒र्वागि॑न्द्र सध॒मादो॑ वहन्तु ।
प्र ये द्वि॒ता दि॒व ऋ॒ञ्जन्त्याता॒ः सुस॑म्मृष्टासो वृष॒भस्य॑ मू॒राः ॥६॥

A tva brihanto harayo yujana arvagindra sadhamado vahantu
Pra ye dvita diva rinjantyatah susammrishtaso vrishabhasya murah

इन्द्र॒ पिब॒ वृष॑धूतस्य॒ वृष्ण॒ आ यं ते॑ श्ये॒न उ॑श॒ते ज॒भार॑ ।
यस्य॒ मदे॑ च्या॒वय॑सि॒ प्र कृ॒ष्टीर्यस्य॒ मदे॒ अप॑ गो॒त्रा व॒वर्थ॑ ॥७॥

Indra piba vrishadhutasya vrishna a yam te shyena ushate jabhara
Yasya made chyavayasi pra krishtiryasya made apa gotra vavartha

शु॒नं हु॑वेम म॒घवा॑न॒मिन्द्र॑म॒स्मिन् भरे॒ नृत॑मं॒ वाज॑सातौ ।
शृ॒ण्वन्त॑मु॒ग्रमू॒तये॑ स॒मत्सु॒ घ्नन्तं॑ वृ॒त्राणि॑ सं॒जितं॒ धना॑नाम् ॥८॥

Shunam huvema maghavanamindramasmin bhare nritamam vajasatau
Shrinvantamugramutaye samatsu ghnantam vritrani sanjitam dhananam