সূক্ত 38

38.1

১০ প্রজাপতির্বৈশ্বামিত্রঃ, প্রজাপতির্বাচ্যো বা, তাবুভাবপি বা গাথিনো বিশ্বামিত্রো বা। ইন্দ্রঃ। ত্রিষ্টুপ্।

অভি তষ্টেব দীধয়া মনীষামত্যো ন বাজী সুধুরো জিহানঃ ।
অভি প্রিয়াণি মর্মৃশৎ পরাণি কবীঁরিচ্ছামি সংদৃশে সুমেধাঃ ॥১॥

38.2

ইনোত পৃচ্ছ জনিমা কবীনাং মনোধৃতঃ সুকৃতস্তক্ষত দ্যাম্ ।
ইমা উ তে প্রণ্যো৩ বর্ধমানা মনোবাতা অধ নু ধর্মণি গ্মন্ ॥২॥

38.3

নি ষীমিদত্র গুহ্যা দধানা উত ক্ষত্রায় রোদসী সমঞ্জন্ ।
সং মাত্রাভির্মমিরে যেমুরুর্বী অন্তর্মহী সমৃতে ধায়সে ধুঃ ॥৩॥

38.4

আতিষ্ঠন্তং পরি বিশ্বে অভূষঞ্ছ্রিয়ো বসানশ্চরতি স্বরোচিঃ ।
মহৎ তদ্ বৃষ্ণো অসুরস্য নামাঽঽ বিশ্বরূপো অমৃতানি তস্থৌ ॥৪॥

38.5

অসূত পূর্বো বৃষভো জ্যায়ানিমা অস্য শুরুধঃ সন্তি পূর্বীঃ ।
দিবো নপাতা বিদথস্য ধীভিঃ ক্ষত্রং রাজানা প্রদিবো দধাথে ॥৫॥

38.6

ত্রীণি রাজানা বিদথে পুরূণি পরি বিশ্বানি ভূষথঃ সদাংসি ।
অপশ্যমত্র মনসা জগন্বান্ ব্রতে গন্ধর্বাঁ অপি বায়ুকেশান্ ॥৬॥

38.7

তদিন্ন্বস্য বৃষভস্য ধেনোরা নামভির্মমিরে সক্ম্যং গোঃ ।
অন্যদন্যদসুর্যং১ বসানা নি মায়িনো মমিরে রূপমস্মিন্ ॥৭॥

38.8

তদিন্ন্বস্য সবিতুর্নকির্মে হিরণ্যয়ীমমতিং যামশিশ্রেৎ ।
আ সুষ্টুতী রোদসী বিশ্বমিন্বে অপীব যোষা জনিমানি বব্রে ॥৮॥

38.9

যুবং প্রত্নস্য সাধথো মহো যদ্ দৈবী স্বস্তিঃ পরি ণঃ স্যাতম্ ।
গোপাজিহ্বস্য তস্থুষো বিরূপা বিশ্বে পশ্যন্তি মায়িনঃ কৃতানি ॥৯॥

38.10

শুনং হুবেম মঘবানমিন্দ্রমস্মিন্ভরে নৃতমং বাজসাতৌ ।
শৃণ্বন্তমুগ্রমূতয়ে সমত্সু ঘ্নন্তং বৃত্রাণি সংজিতং ধনানাম্ ॥১০॥