Sukta 38

38.1

10 prajapatirvaishvamitrah, prajapatirvachyo va, tavubhavapi va gathino vishvamitro va, indrah, trishtup

अ॒भि तष्टे॑व दीधया मनी॒षामत्यो॒ न वा॒जी सु॒धुरो॒ जिहा॑नः ।
अ॒भि प्रि॒याणि॒ मर्मृ॑श॒त् परा॑णि क॒वीँरि॑च्छामि सं॒दृशे॑ सुमे॒धाः ॥१॥

Abhi tashteva didhaya manishamatyo na vaji sudhuro jihanah
Abhi priyani marmrishat parani kavinrichchhami sandrishe sumedhah

38.2

इ॒नोत पृ॑च्छ॒ जनि॑मा कवी॒नां म॑नो॒धृत॑ः सु॒कृत॑स्तक्षत॒ द्याम् ।
इ॒मा उ॑ ते प्र॒ण्यो॒३ वर्ध॑माना॒ मनो॑वाता॒ अध॒ नु धर्म॑णि ग्मन् ॥२॥

Inota prichchha janima kavinam manodhritah sukritastakshata dyam
Ima u te pranyo3 vardhamana manovata adha nu dharmani gman

38.3

नि षी॒मिदत्र॒ गुह्या॒ दधा॑ना उ॒त क्ष॒त्राय॒ रोद॑सी॒ सम॑ञ्जन् ।
सं मात्रा॑भिर्ममि॒रे ये॒मुरु॒र्वी अ॒न्तर्म॒ही समृ॑ते॒ धाय॑से धुः ॥३॥

Ni shimidatra guhya dadhana uta kshatraya rodasi samanjan
Sam matrabhirmamire yemururvi antarmahi samrite dhayase dhuh

38.4

आ॒तिष्ठ॑न्तं॒ परि॒ विश्वे॑ अभूष॒ञ्छ्रियो॒ वसा॑नश्चरति॒ स्वरो॑चिः ।
म॒हत् तद् वृष्णो॒ असु॑रस्य॒ नामाऽऽ वि॒श्वरू॑पो अ॒मृता॑नि तस्थौ ॥४॥

Atishthantam pari vishve abhushanchhriyo vasanashcharati svarochih
Mahat tad vrishno asurasya nama vishvarupo amritani tasthau

38.5

असू॑त॒ पूर्वो॑ वृष॒भो ज्याया॑नि॒मा अ॑स्य शु॒रुध॑ः सन्ति पू॒र्वीः ।
दिवो॑ नपाता वि॒दथ॑स्य धी॒भिः क्ष॒त्रं रा॑जाना प्र॒दिवो॑ दधाथे ॥५॥

Asuta purvo vrishabho jyayanima asya shurudhah santi purvih
Divo napata vidathasya dhibhih kshatram rajana pradivo dadhathe

38.6

त्रीणि॑ राजाना वि॒दथे॑ पु॒रूणि॒ परि॒ विश्वा॑नि भूषथ॒ः सदां॑सि ।
अप॑श्य॒मत्र॒ मन॑सा जग॒न्वान् व्र॒ते ग॑न्ध॒र्वाँ अपि॑ वा॒युके॑शान् ॥६॥

Trini rajana vidathe puruni pari vishvani bhushathah sadansi
Apashyamatra manasa jaganvan vrate gandharvam api vayukeshan

38.7

तदिन्न्व॑स्य वृष॒भस्य॑ धे॒नोरा नाम॑भिर्ममिरे॒ सक्म्यं॒ गोः ।
अ॒न्यद॑न्यदसु॒र्यं१ वसा॑ना॒ नि मा॒यिनो॑ ममिरे रू॒पम॑स्मिन् ॥७॥

Tadinnvasya vrishabhasya dhenora namabhirmamire sakmyam goh
Anyadanyadasuryan1 vasana ni mayino mamire rupamasmin

38.8

तदिन्न्व॑स्य सवि॒तुर्नकि॑र्मे हिर॒ण्ययी॑म॒मतिं॒ यामशि॑श्रेत् ।
आ सु॑ष्टु॒ती रोद॑सी विश्वमि॒न्वे अपी॑व॒ योषा॒ जनि॑मानि वव्रे ॥८॥

Tadinnvasya saviturnakirme hiranyayimamatim yamashishret
A sushtuti rodasi vishvaminve apiva yosha janimani vavre

38.9

यु॒वं प्र॒त्नस्य॑ साधथो म॒हो यद् दैवी॑ स्व॒स्तिः परि॑ णः स्यातम् ।
गो॒पाजि॑ह्वस्य त॒स्थुषो॒ विरू॑पा॒ विश्वे॑ पश्यन्ति मा॒यिन॑ः कृ॒तानि॑ ॥९॥

Yuvam pratnasya sadhatho maho yad daivi svastih pari nah syatam
Gopajihvasya tasthusho virupa vishve pashyanti mayinah kritani

38.10

शु॒नं हु॑वेम म॒घवा॑न॒मिन्द्र॑म॒स्मिन्भरे॒ नृत॑मं॒ वाज॑सातौ ।
शृ॒ण्वन्त॑मु॒ग्रमू॒तये॑ स॒मत्सु॒ घ्नन्तं॑ वृ॒त्राणि॑ सं॒जितं॒ धना॑नाम् ॥१०॥

Shunam huvema maghavanamindramasminbhare nritamam vajasatau
Shrinvantamugramutaye samatsu ghnantam vritrani sanjitam dhananam