Sukta 37

37.1

11 gathino vishvamitrah, indrah, gayatri, 11 trishtup

वार्त्र॑हत्याय॒ शव॑से पृतना॒षाह्या॑य च । इन्द्र॒ त्वा व॑र्तयामसि ॥१॥

Vartrahatyaya shavase pritanashahyaya cha, indra tva vartayamasi

अ॒र्वा॒चीनं॒ सु ते॒ मन॑ उ॒त चक्षु॑ः शतक्रतो । इन्द्र॑ कृ॒ण्वन्तु॑ वा॒घत॑ः ॥२॥

Arvachinam su te mana uta chakshuh shatakrato, indra krinvantu vaghatah

नामा॑नि ते शतक्रतो॒ विश्वा॑भिर्गी॒र्भिरी॑महे । इन्द्रा॑भिमाति॒षाह्ये॑ ॥३॥

Namani te shatakrato vishvabhirgirbhirimahe, indrabhimatishahye

पु॒रु॒ष्टु॒तस्य॒ धाम॑भिः श॒तेन॑ महयामसि । इन्द्र॑स्य चर्षणी॒धृत॑ः ॥४॥

Purushtutasya dhamabhih shatena mahayamasi, indrasya charshanidhritah

इन्द्रं॑ वृ॒त्राय॒ हन्त॑वे पुरुहू॒तमुप॑ ब्रुवे । भरे॑षु॒ वाज॑सातये ॥५॥

Indram vritraya hantave puruhutamupa bruve, bhareshu vajasataye

वाजे॑षु सास॒हिर्भ॑व॒ त्वामी॑महे शतक्रतो । इन्द्र॑ वृ॒त्राय॒ हन्त॑वे ॥६॥

Vajeshu sasahirbhava tvamimahe shatakrato, indra vritraya hantave

द्यु॒म्नेषु॑ पृत॒नाज्ये॑ पृत्सु॒तूर्षु॒ श्रव॑स्सु च । इन्द्र॒ साक्ष्वा॒भिमा॑तिषु ॥७॥

Dyumneshu pritanajye pritsuturshu shravassu cha, indra sakshvabhimatishu

शु॒ष्मिन्त॑मं न ऊ॒तये॑ द्यु॒म्निनं॑ पाहि॒ जागृ॑विम् । इन्द्र॒ सोमं॑ शतक्रतो ॥८॥

Shushmintamam na utaye dyumninam pahi jagrivim, indra somam shatakrato

इ॒न्द्रि॒याणि॑ शतक्रतो॒ या ते॒ जने॑षु प॒ञ्चसु॑ । इन्द्र॒ तानि॑ त॒ आ वृ॑णे ॥९॥

Indriyani shatakrato ya te janeshu panchasu, indra tani ta a vrine

अग॑न्निन्द्र॒ श्रवो॑ बृ॒हद् द्यु॒म्नं द॑धिष्व दु॒ष्टर॑म् । उत् ते॒ शुष्मं॑ तिरामसि ॥१०॥

Agannindra shravo brihad dyumnam dadhishva dushtaram, ut te shushmam tiramasi

अ॒र्वा॒वतो॑ न॒ आ ग॒ह्यथो॑ शक्र परा॒वत॑ः ।
उ॒ लो॒को यस्ते॑ अद्रिव॒ इन्द्रे॒ह तत॒ आ ग॑हि ॥११॥

Arvavato na a gahyatho shakra paravatah
U loko yaste adriva indreha tata a gahi