Sukta 36

36.1

11 gathino vishvamitrah, 10 ghora angirasah, indrah, trishtup

इ॒मामू॒ षु प्रभृ॑तिं सा॒तये॑ धा॒ः शश्व॑च्छश्वदू॒तिभि॒र्याद॑मानः ।
सु॒तेसु॑ते वावृधे॒ वर्ध॑नेभि॒र्यः कर्म॑भिर्म॒हद्भि॒ः सुश्रु॑तो॒ भूत् ॥१॥

Imamu shu prabhritim sataye dhah shashvachchhashvadutibhiryadamanah
Sutesute vavridhe vardhanebhiryah karmabhirmahadbhih sushruto bhut

36.2

इन्द्रा॑य॒ सोमा॑ः प्र॒दिवो॒ विदा॑ना ऋ॒भुर्येभि॒र्वृष॑पर्वा॒ विहा॑याः ।
प्र॒य॒म्यमा॑ना॒न् प्रति॒ षू गृ॑भा॒येन्द्र॒ पिब॒ वृष॑धूतस्य॒ वृष्ण॑ः ॥२॥

Indraya somah pradivo vidana ribhuryebhirvrishaparva vihayah
Prayamyamanan prati shu gribhayendra piba vrishadhutasya vrishnah

36.3

पिबा॒ वर्ध॑स्व॒ तव॑ घा सु॒तास॒ इन्द्र॒ सोमा॑सः प्रथ॒मा उ॒तेमे ।
यथापि॑बः पू॒र्व्याँ इ॑न्द्र॒ सोमाँ॑ ए॒वा पा॑हि॒ पन्यो॑ अ॒द्या नवी॑यान् ॥३॥

Piba vardhasva tava gha sutasa indra somasah prathama uteme
Yathapibah purvyam indra somam eva pahi panyo adya naviyan

36.4

म॒हाँ अम॑त्रो वृ॒जने॑ विर॒प्श्यु१ ग्रं शव॑ः पत्यते धृ॒ष्ण्वोज॑ः ।
नाह॑ विव्याच पृथि॒वी च॒नैनं॒ यत् सोमा॑सो॒ हर्य॑श्व॒मम॑न्दन् ॥४॥

Maham amatro vrijane virapshyu1 gram shavah patyate dhrishnvojah
Naha vivyacha prithivi chanainam yat somaso haryashvamamandan

36.5

म॒हाँ उ॒ग्रो वा॑वृधे वी॒र्या॑य स॒माच॑क्रे वृष॒भः काव्ये॑न ।
इन्द्रो॒ भगो॑ वाज॒दा अ॑स्य॒ गाव॒ः प्र जा॑यन्ते॒ दक्षि॑णा अस्य पू॒र्वीः ॥५॥

Maham ugro vavridhe viryaya samachakre vrishabhah kavyena
Indro bhago vajada asya gavah pra jayante dakshina asya purvih

36.6

प्र यत् सिन्ध॑वः प्रस॒वं यथाय॒न्नाप॑ः समु॒द्रं र॒थ्ये॑व जग्मुः ।
अत॑श्चि॒दिन्द्र॒ः सद॑सो॒ वरी॑या॒न् यदीं॒ सोम॑ः पृ॒णति॑ दु॒ग्धो अं॒शुः ॥६॥

Pra yat sindhavah prasavam yathayannapah samudram rathyeva jagmuh
Atashchidindrah sadaso variyan yadim somah prinati dugdho anshuh

36.7

स॒मु॒द्रेण॒ सिन्ध॑वो॒ याद॑माना॒ इन्द्रा॑य॒ सोमं॒ सुषु॑तं॒ भर॑न्तः ।
अं॒शुं दु॑हन्ति ह॒स्तिनो॑ भ॒रित्रै॒र्मध्व॑ः पुनन्ति॒ धार॑या प॒वित्रै॑ः ॥७॥

Samudrena sindhavo yadamana indraya somam sushutam bharantah
Anshum duhanti hastino bharitrairmadhvah punanti dharaya pavitraih

36.8

ह्र॒दा इ॑व कु॒क्षय॑ः सोम॒धाना॒ः समी॑ विव्याच॒ सव॑ना पु॒रूणि॑ ।
अन्ना॒ यदिन्द्र॑ः प्रथ॒मा व्याश॑ वृ॒त्रं ज॑घ॒न्वाँ अ॑वृणीत॒ सोम॑म् ॥८॥

Hrada iva kukshayah somadhanah sami vivyacha savana puruni
Anna yadindrah prathama vyasha vritram jaghanvam avrinita somam

36.9

आ तू भ॑र॒ माकि॑रे॒तत् परि॑ ष्ठाद् वि॒द्मा हि त्वा॒ वसु॑पतिं॒ वसू॑नाम् ।
इन्द्र॒ यत् ते॒ माहि॑नं॒ दत्र॒मस्त्य॒स्मभ्यं॒ तद्ध॑र्यश्व॒ प्र य॑न्धि ॥९॥

A tu bhara makiretat pari shthad vidma hi tva vasupatim vasunam
Indra yat te mahinam datramastyasmabhyam taddharyashva pra yandhi

36.10

अ॒स्मे प्र य॑न्धि मघवन्नृजीषि॒न्निन्द्र॑ रा॒यो वि॒श्ववा॑रस्य॒ भूरे॑ः ।
अ॒स्मे श॒तं श॒रदो॑ जी॒वसे॑ धा अ॒स्मे वी॒राञ्छश्व॑त इन्द्र शिप्रिन् ॥१०॥

Asme pra yandhi maghavannrijishinnindra rayo vishvavarasya bhureh
Asme shatam sharado jivase dha asme viranchhashvata indra shiprin

36.11

शु॒नं हु॑वेम म॒घवा॑न॒मिन्द्र॑म॒स्मिन् भरे॒ नृत॑मं॒ वाज॑सातौ ।
शृ॒ण्वन्त॑मु॒ग्रमू॒तये॑ स॒मत्सु॒ घ्नन्तं॑ वृ॒त्राणि॑ सं॒जितं॒ धना॑नाम् ॥११॥

Shunam huvema maghavanamindramasmin bhare nritamam vajasatau
Shrinvantamugramutaye samatsu ghnantam vritrani sanjitam dhananam