সূক্ত 36

36.1

১১ গাথিনো বিশ্বামিত্রঃ, ১০ ঘোর আঙ্গিরসঃ। ইন্দ্রঃ। ত্রিষ্টুপ্।

ইমামূ ষু প্রভৃতিং সাতয়ে ধাঃ শশ্বচ্ছশ্বদূতিভির্যাদমানঃ ।
সুতেসুতে বাবৃধে বর্ধনেভির্যঃ কর্মভির্মহদ্ভিঃ সুশ্রুতো ভূৎ ॥১॥

36.2

ইন্দ্রায় সোমাঃ প্রদিবো বিদানা ঋভুর্যেভির্বৃষপর্বা বিহায়াঃ ।
প্রয়ম্যমানান্ প্রতি ষূ গৃভায়েন্দ্র পিব বৃষধূতস্য বৃষ্ণঃ ॥২॥

36.3

পিবা বর্ধস্ব তব ঘা সুতাস ইন্দ্র সোমাসঃ প্রথমা উতেমে ।
যথাপিবঃ পূর্ব্যাঁ ইন্দ্র সোমাঁ এবা পাহি পন্যো অদ্যা নবীয়ান্ ॥৩॥

36.4

মহাঁ অমত্রো বৃজনে বিরপ্শ্যু১ গ্রং শবঃ পত্যতে ধৃষ্ণ্বোজঃ ।
নাহ বিব্যাচ পৃথিবী চনৈনং যৎ সোমাসো হর্যশ্বমমন্দন্ ॥৪॥

36.5

মহাঁ উগ্রো বাবৃধে বীর্যায় সমাচক্রে বৃষভঃ কাব্যেন ।
ইন্দ্রো ভগো বাজদা অস্য গাবঃ প্র জায়ন্তে দক্ষিণা অস্য পূর্বীঃ ॥৫॥

36.6

প্র যৎ সিন্ধবঃ প্রসবং যথায়ন্নাপঃ সমুদ্রং রথ্যেব জগ্মুঃ ।
অতশ্চিদিন্দ্রঃ সদসো বরীয়ান্ যদীং সোমঃ পৃণতি দুগ্ধো অংশুঃ ॥৬॥

36.7

সমুদ্রেণ সিন্ধবো যাদমানা ইন্দ্রায় সোমং সুষুতং ভরন্তঃ ।
অংশুং দুহন্তি হস্তিনো ভরিত্রৈর্মধ্বঃ পুনন্তি ধারয়া পবিত্রৈঃ ॥৭॥

36.8

হ্রদা ইব কুক্ষয়ঃ সোমধানাঃ সমী বিব্যাচ সবনা পুরূণি ।
অন্না যদিন্দ্রঃ প্রথমা ব্যাশ বৃত্রং জঘন্বাঁ অবৃণীত সোমম্ ॥৮॥

36.9

আ তূ ভর মাকিরেতৎ পরি ষ্ঠাদ্ বিদ্মা হি ত্বা বসুপতিং বসূনাম্ ।
ইন্দ্র যৎ তে মাহিনং দত্রমস্ত্যস্মভ্যং তদ্ধর্যশ্ব প্র যন্ধি ॥৯॥

36.10

অস্মে প্র যন্ধি মঘবন্নৃজীষিন্নিন্দ্র রায়ো বিশ্ববারস্য ভূরেঃ ।
অস্মে শতং শরদো জীবসে ধা অস্মে বীরাঞ্ছশ্বত ইন্দ্র শিপ্রিন্ ॥১০॥

36.11

শুনং হুবেম মঘবানমিন্দ্রমস্মিন্ ভরে নৃতমং বাজসাতৌ ।
শৃণ্বন্তমুগ্রমূতয়ে সমত্সু ঘ্নন্তং বৃত্রাণি সংজিতং ধনানাম্ ॥১১॥