সূক্ত 35

35.1

১১ গাথিনো বিশ্বামিত্রঃ। ইন্দ্রঃ। ত্রিষ্টুপ্।

তিষ্ঠা হরী রথ আ যুজ্যমানা যাহি বায়ুর্ন নিয়ুতো নো অচ্ছ ।
পিবাস্যন্ধো অভিসৃষ্টো অস্মে ইন্দ্র স্বাহা ররিমা তে মদায় ॥১॥

35.2

উপাজিরা পুরুহূতায় সপ্তী হরী রথস্য ধূর্ষ্বা যুনজ্মি ।
দ্রবদ্ যথা সম্ভৃতং বিশ্বতশ্চিদুপেমং যজ্ঞমা বহাত ইন্দ্রম্ ॥২॥

35.3

উপো নয়স্ব বৃষণা তপুষ্পোতেমব ত্বং বৃষভ স্বধাবঃ ।
গ্রসেতামশ্বা বি মুচেহ শোণা দিবেদিবে সদৃশীরদ্ধি ধানাঃ ॥৩॥

35.4

ব্রহ্মণা তে ব্রহ্ময়ুজা যুনজ্মি হরী সখায়া সধমাদ আশূ ।
স্থিরং রথং সুখমিন্দ্রাধিতিষ্ঠন্ প্রজানন্ বিদ্বাঁ উপ যাহি সোমম্ ॥৪॥

35.5

মা তে হরী বৃষণা বীতপৃষ্ঠা নি রীরমন্যজমানাসো অন্যে ।
অত্যায়াহি শশ্বতো বয়ং তেঽরং সুতেভিঃ কৃণবাম সোমৈঃ ॥৫॥

35.6

তবায়ং সোমস্ত্বমেহ্যর্বাঙ্ শশ্বত্তমং সুমনা অস্য পাহি ।
অস্মিন্ যজ্ঞে বর্হিষ্যা নিষদ্যা দধিষ্বেমং জঠর ইন্দুমিন্দ্র ॥৬॥

35.7

স্তীর্ণং তে বর্হিঃ সুত ইন্দ্র সোমঃ কৃতা ধানা অত্তবে তে হরিভ্যাম্ ।
তদোকসে পুরুশাকায় বৃষ্ণে মরুত্বতে তুভ্যং রাতা হবীংষি ॥৭॥

35.8

ইমং নরঃ পর্বতাস্তুভ্যমাপঃ সমিন্দ্র গোভির্মধুমন্তমক্রন্ ।
তস্যাগত্যা সুমনা ঋষ্ব পাহি প্রজানন্ বিদ্বান্পথ্যা৩ অনু স্বাঃ ॥৮॥

35.9

যাঁ আভজো মরুত ইন্দ্র সোমে যে ত্বামবর্ধন্নভবন্ গণস্তে ।
তেভিরেতং সজোষা বাবশানো৩ঽগ্নেঃ পিব জিহ্বয়া সোমমিন্দ্র ॥৯॥

35.10

ইন্দ্র পিব স্বধয়া চিৎ সুতস্যাঽগ্নের্বা পাহি জিহ্বয়া যজত্র ।
অধ্বর্যোর্বা প্রয়তং শক্র হস্তাদ্ধোতুর্বা যজ্ঞং হবিষো জুষস্ব ॥১০॥

35.11

শুনং হুবেম মঘবানমিন্দ্রমস্মিন্ ভরে নৃতমং বাজসাতৌ ।
শৃণ্বন্তমুগ্রমূতয়ে সমত্সু ঘ্নন্তং বৃত্রাণি সংজিতং ধনানাম্ ॥১১॥