সূক্ত 34

34.1

১১ গাথিনো বিশ্বামিত্রঃ। ইন্দ্রঃ। ত্রিষ্টুপ্।

ইন্দ্রঃ পূর্ভিদাতিরদ্দাসমর্কৈর্বিদদ্বসুর্দয়মানো বি শত্রূন্ ।
ব্রহ্মজূতস্তন্বা বাবৃধানো ভূরিদাত্র আপৃণদ্রোদসী উভে ॥১॥

34.2

মখস্য তে তবিষস্য প্র জূতিমিয়র্মি বাচমমৃতায় ভূষন্ ।
ইন্দ্র ক্ষিতীনামসি মানুষীণাং বিশাং দৈবীনামুত পূর্বয়াবা ॥২॥

34.3

ইন্দ্রো বৃত্রমবৃণোচ্ছর্ধনীতিঃ প্র মায়িনামমিনাদ্ বর্পণীতিঃ ।
অহন্ ব্যংসমুশধগ্বনেষ্বাবির্ধেনা অকৃণোদ্ রাম্যাণাম্ ॥৩॥

34.4

ইন্দ্রঃ স্বর্ষা জনয়ন্নহানি জিগায়োশিগ্ভিঃ পৃতনা অভিষ্টিঃ ।
প্রারোচয়ন্মনবে কেতুমহ্নামবিন্দজ্জ্যোতির্বৃহতে রণায় ॥৪॥

34.5

ইন্দ্রস্তুজো বর্হণা আ বিবেশ নৃবদ্ দধানো নর্যা পুরূণি ।
অচেতয়দ্ ধিয় ইমা জরিত্রে প্রেমং বর্ণমতিরচ্ছুক্রমাসাম্ ॥৫॥

34.6

মহো মহানি পনয়ন্ত্যস্যেন্দ্রস্য কর্ম সুকৃতা পুরূণি ।
বৃজনেন বৃজিনান্ ত্সং পিপেষ মায়াভির্দস্যূঁরভিভূত্যোজাঃ ॥৬॥

34.7

যুধেন্দ্রো মহ্না বরিবশ্চকার দেবেভ্যঃ সত্পতিশ্চর্ষণিপ্রাঃ ।
বিবস্বতঃ সদনে অস্য তানি বিপ্রা উক্থেভিঃ কবয়ো গৃণন্তি ॥৭॥

34.8

সত্রাসাহং বরেণ্যং সহোদাং সসবাংসং স্বরপশ্চ দেবীঃ ।
সসান যঃ পৃথিবীং দ্যামুতেমামিন্দ্রং মদন্ত্যনু ধীরণাসঃ ॥৮॥

34.9

সসানাত্যাঁ উত সূর্যং সসানেন্দ্রঃ সসান পুরুভোজসং গাম্ ।
হিরণ্যয়মুত ভোগং সসান হত্বী দস্যূন্প্রার্যং বর্ণমাবৎ ॥৯॥

34.10

ইন্দ্র ওষধীরসনোদহানি বনস্পতীঁরসনোদন্তরিক্ষম্ ।
বিভেদ বলং নুনুদে বিবাচোঽথাভবদ্ দমিতাভিক্রতূনাম্ ॥১০॥

34.11

শুনং হুবেম মঘবানমিন্দ্রমস্মিন্ ভরে নৃতমং বাজসাতৌ ।
শৃণ্বন্তমুগ্রমূতয়ে সমত্সু ঘ্নন্তং বৃত্রাণি সংজিতং ধনানাম্ ॥১১॥