সূক্ত 33

33.1

১৩ গাথিনো বিশ্বামিত্রঃ, ৪, ৬, ৮, ১০ নদ্যঃ ঋষিকাঃ। নদ্যঃ, ৪, ৮, ১০ বিশ্বামিত্রঃ, ৬, ৭ ইন্দ্রঃ। ত্রিষ্টুপ্, ১৩ অনুষ্টুপ্ ।

প্র পর্বতানামুশতী উপস্থাদশ্বে ইব বিষিতে হাসমানে ।
গাবেব শুভ্রে মাতরা রিহাণে বিপাট্ ছুতুদ্রী পয়সা জবেতে ॥১॥

33.2

ইন্দ্রেষিতে প্রসবং ভিক্ষমাণে অচ্ছা সমুদ্রং রথ্যেব যাথঃ ।
সমারাণে ঊর্মিভিঃ পিন্বমানে অন্যা বামন্যামপ্যেতি শুভ্রে ॥২॥

33.3

অচ্ছা সিন্ধুং মাতৃতমাময়াসং বিপাশমুর্বীং সুভগামগন্ম ।
বত্সমিব মাতরা সংরিহাণে সমানং যোনিমনু সংচরন্তী ॥৩॥

33.4

এনা বয়ং পয়সা পিন্বমানা অনু যোনিং দেবকৃতং চরন্তীঃ ।
ন বর্তবে প্রসবঃ সর্গতক্তঃ কিংয়ুর্বিপ্রো নদ্যো জোহবীতি ॥৪॥

33.5

রমধ্বং মে বচসে সোম্যায় ঋতাবরীরুপ মুহূর্তমেবৈঃ ।
প্র সিন্ধুমচ্ছা বৃহতী মনীষা ঽবস্যুরহ্বে কুশিকস্য সূনুঃ ॥৫॥

33.6

ইন্দ্রো অস্মাঁ অরদদ্ বজ্রবাহুরপাহন্ বৃত্রং পরিধিং নদীনাম্ ।
দেবোঽনয়ৎ সবিতা সুপাণিস্তস্য বয়ং প্রসবে যাম উর্বীঃ ॥৬॥

33.7

প্রবাচ্যং শশ্বধা বীর্যং১ তদিন্দ্রস্য কর্ম যদহিং বিবৃশ্চৎ ।
বি বজ্রেণ পরিষদো জঘানাঽঽয়ন্নাপোঽয়নমিচ্ছমানাঃ ॥৭॥

33.8

এতদ্ বচো জরিতর্মাপি মৃষ্ঠা আ যৎ তে ঘোষানুত্তরা যুগানি ।
উক্থেষু কারো প্রতি নো জুষস্ব মা নো নি কঃ পুরুষত্রা নমস্তে ॥৮॥

33.9

ও ষু স্বসারঃ কারবে শৃণোত যয়ৌ বো দূরাদনসা রথেন ।
নি ষূ নমধ্বং ভবতা সুপারা অধোঅক্ষাঃ সিন্ধবঃ স্রোত্যাভিঃ ॥৯॥

33.10

আ তে কারো শৃণবামা বচাংসি যয়াথ দূরাদনসা রথেন ।
নি তে নংসৈ পীপ্যানেব যোষা মর্যায়েব কন্যা শশ্বচৈ তে ॥১০॥

33.11

যদঙ্গ ত্বা ভরতাঃ সংতরেয়ুর্গব্যন্ গ্রাম ইষিত ইন্দ্রজূতঃ ।
অর্ষাদহ প্রসবঃ সর্গতক্ত আ বো বৃণে সুমতিং যজ্ঞিয়ানাম্ ॥১১॥

33.12

অতারিষুর্ভরতা গব্যবঃ সমভক্ত বিপ্রঃ সুমতিং নদীনাম্ ।
প্র পিন্বধ্বমিষয়ন্তীঃ সুরাধা আ বক্ষণাঃ পৃণধ্বং যাত শীভম্ ॥১২॥

33.13

উদ্ ব ঊর্মিঃ শম্যা হন্ত্বাপো যোক্ত্রাণি মুঞ্চত ।
মাদুষ্কৃতৌ ব্যেনসা ঽঘ্ন্যৌ শূনমারতাম্ ॥১৩॥