Sukta 33

33.1

13 gathino vishvamitrah, 4, 6, 8, 10 nadyah rishikah, nadyah, 4, 8, 10 vishvamitrah, 6, 7 indrah, trishtup, 13 anushtup

प्र पर्व॑तानामुश॒ती उ॒पस्था॒दश्वे॑ इव॒ विषि॑ते॒ हास॑माने ।
गावे॑व शु॒भ्रे मा॒तरा॑ रिहा॒णे विपा॑ट् छुतु॒द्री पय॑सा जवेते ॥१॥

Pra parvatanamushati upasthadashve iva vishite hasamane
Gaveva shubhre matara rihane vipat chhutudri payasa javete

33.2

इन्द्रे॑षिते प्रस॒वं भिक्ष॑माणे॒ अच्छा॑ समु॒द्रं र॒थ्ये॑व याथः ।
स॒मा॒रा॒णे ऊ॒र्मिभि॒ः पिन्व॑माने अ॒न्या वा॑म॒न्यामप्ये॑ति शुभ्रे ॥२॥

Indreshite prasavam bhikshamane achchha samudram rathyeva yathah
Samarane urmibhih pinvamane anya vamanyamapyeti shubhre

33.3

अच्छा॒ सिन्धुं॑ मा॒तृत॑मामयासं॒ विपा॑शमु॒र्वीं सु॒भगा॑मगन्म ।
व॒त्समि॑व मा॒तरा॑ संरिहा॒णे स॑मा॒नं योनि॒मनु॑ सं॒चर॑न्ती ॥३॥

Achchha sindhum matritamamayasam vipashamurvim subhagamaganma
Vatsamiva matara sanrihane samanam yonimanu sancharanti

33.4

ए॒ना व॒यं पय॑सा॒ पिन्व॑माना॒ अनु॒ योनिं॑ दे॒वकृ॑तं॒ चर॑न्तीः ।
न वर्त॑वे प्रस॒वः सर्ग॑तक्तः किं॒युर्विप्रो॑ न॒द्यो॑ जोहवीति ॥४॥

Ena vayam payasa pinvamana anu yonim devakritam charantih
Na vartave prasavah sargataktah kinyurvipro nadyo johaviti

33.5

रम॑ध्वं मे॒ वच॑से सो॒म्याय॒ ऋता॑वरी॒रुप॑ मुहू॒र्तमेवै॑ः ।
प्र सिन्धु॒मच्छा॑ बृह॒ती म॑नी॒षा ऽव॒स्युर॑ह्वे कुशि॒कस्य॑ सू॒नुः ॥५॥

Ramadhvam me vachase somyaya ritavarirupa muhurtamevaih
Pra sindhumachchha brihati manisha vasyurahve kushikasya sunuh

33.6

इन्द्रो॑ अ॒स्माँ अ॑रद॒द् वज्र॑बाहु॒रपा॑हन् वृ॒त्रं प॑रि॒धिं न॒दीना॑म् ।
दे॒वो॑ऽनयत् सवि॒ता सु॑पा॒णिस्तस्य॑ व॒यं प्र॑स॒वे या॑म उ॒र्वीः ॥६॥

Indro asmam aradad vajrabahurapahan vritram paridhim nadinam
Devonayat savita supanistasya vayam prasave yama urvih

33.7

प्र॒वाच्यं॑ शश्व॒धा वी॒र्यं१ तदिन्द्र॑स्य॒ कर्म॒ यदहिं॑ विवृ॒श्चत् ।
वि वज्रे॑ण परि॒षदो॑ जघा॒नाऽऽय॒न्नापोऽय॑नमि॒च्छमा॑नाः ॥७॥

Pravachyam shashvadha viryan1 tadindrasya karma yadahim vivrishchat
Vi vajrena parishado jaghanayannapoyanamichchhamanah

33.8

ए॒तद् वचो॑ जरित॒र्मापि॑ मृष्ठा॒ आ यत् ते॒ घोषा॒नुत्त॑रा यु॒गानि॑ ।
उ॒क्थेषु॑ कारो॒ प्रति॑ नो जुषस्व॒ मा नो॒ नि क॑ः पुरुष॒त्रा नम॑स्ते ॥८॥

Etad vacho jaritarmapi mrishtha a yat te ghoshanuttara yugani
Uktheshu karo prati no jushasva ma no ni kah purushatra namaste

33.9

ओ षु स्व॑सारः का॒रवे॑ शृणोत य॒यौ वो॑ दू॒रादन॑सा॒ रथे॑न ।
नि षू न॑मध्वं॒ भव॑ता सुपा॒रा अ॑धोअ॒क्षाः सि॑न्धवः स्रो॒त्याभि॑ः ॥९॥

O shu svasarah karave shrinota yayau vo duradanasa rathena
Ni shu namadhvam bhavata supara adhoakshah sindhavah srotyabhih

33.10

आ ते॑ कारो शृणवामा॒ वचां॑सि य॒याथ॑ दू॒रादन॑सा॒ रथे॑न ।
नि ते॑ नंसै पीप्या॒नेव॒ योषा॒ मर्या॑येव क॒न्या॑ शश्व॒चै ते॑ ॥१०॥

A te karo shrinavama vachansi yayatha duradanasa rathena
Ni te nansai pipyaneva yosha maryayeva kanya shashvachai te

33.11

यद॒ङ्ग त्वा॑ भर॒ताः सं॒तरे॑युर्ग॒व्यन् ग्राम॑ इषि॒त इन्द्र॑जूतः ।
अर्षा॒दह॑ प्रस॒वः सर्ग॑तक्त॒ आ वो॑ वृणे सुम॒तिं य॒ज्ञिया॑नाम् ॥११॥

Yadanga tva bharatah santareyurgavyan grama ishita indrajutah
Arshadaha prasavah sargatakta a vo vrine sumatim yagyiyanam

33.12

अता॑रिषुर्भर॒ता ग॒व्यव॒ः समभ॑क्त॒ विप्र॑ः सुम॒तिं न॒दीना॑म् ।
प्र पि॑न्वध्वमि॒षय॑न्तीः सु॒राधा॒ आ व॒क्षणा॑ः पृ॒णध्वं॑ या॒त शीभ॑म् ॥१२॥

Atarishurbharata gavyavah samabhakta viprah sumatim nadinam
Pra pinvadhvamishayantih suradha a vakshanah prinadhvam yata shibham

33.13

उद् व॑ ऊ॒र्मिः शम्या॑ ह॒न्त्वापो॒ योक्त्रा॑णि मुञ्चत ।
मादु॑ष्कृतौ॒ व्ये॑नसा॒ ऽघ्न्यौ शून॒मार॑ताम् ॥१३॥

Ud va urmih shamya hantvapo yoktrani munchata
Madushkritau vyenasa ghnyau shunamaratam