সূক্ত 32

32.1

১৭ গাথিনো বিশ্বামিত্রঃ। ইন্দ্রঃ। ত্রিষ্টুপ্ ।

ইন্দ্র সোমং সোমপতে পিবেমং মাধ্যংদিনং সবনং চারু যৎ তে ।
প্রপ্রুথ্যা শিপ্রে মঘবন্নৃজীষিন্ বিমুচ্যা হরী ইহ মাদয়স্ব ॥১॥

32.2

গবাশিরং মন্থিনমিন্দ্র শুক্রং পিবা সোমং ররিমা তে মদায় ।
ব্রহ্মকৃতা মারুতেনা গণেন সজোষা রুদ্রৈস্তৃপদা বৃষস্ব ॥২॥

32.3

যে তে শুষ্মং যে তবিষীমবর্ধন্নর্চন্ত ইন্দ্র মরুতস্ত ওজঃ ।
মাধ্যংদিনে সবনে বজ্রহস্ত পিবা রুদ্রেভিঃ সগণঃ সুশিপ্র ॥৩॥

32.4

ত ইন্ন্বস্য মধুমদ্ বিবিপ্র ইন্দ্রস্য শর্ধো মরুতো য আসন্ ।
যেভির্বৃত্রস্যেষিতো বিবেদামর্মণো মন্যমানস্য মর্ম ৪॥
মনুষ্বদিন্দ্র সবনং জুষাণঃ পিবা সোমং শশ্বতে বীর্যায় ।
স আ ববৃত্স্ব হর্যশ্ব যজ্ঞৈঃ সরণ্যুভিরপো অর্ণা সিসর্ষি ৫॥
ত্বমপো যদ্ধ বৃত্রং জঘন্বাঁ অত্যাঁ ইব প্রাসৃজঃ সর্তবাজৌ ।
শয়ানমিন্দ্র চরতা বধেন বব্রিবাংসং পরি দেবীরদেবম্ ॥৬॥

32.5

যজাম ইন্নমসা বৃদ্ধমিন্দ্রং বৃহন্তমৃষ্বমজরং যুবানম্ ।
যস্য প্রিয়ে মমতুর্যজ্ঞিয়স্য ন রোদসী মহিমানং মমাতে ॥৭॥

32.6

ইন্দ্রস্য কর্ম সুকৃতা পুরূণি ব্রতানি দেবা ন মিনন্তি বিশ্বে ।
দাধার যঃ পৃথিবীং দ্যামুতেমাং জজান সূর্যমুষসং সুদংসাঃ ॥৮॥

32.7

অদ্রোঘ সত্যং তব তন্মহিত্বং সদ্যো যজ্জাতো অপিবো হ সোমম্ ।
ন দ্যাব ইন্দ্র তবসস্ত ওজো নাহা ন মাসাঃ শরদো বরন্ত ॥৯॥

32.8

ত্বং সদ্যো অপিবো জাত ইন্দ্র মদায় সোমং পরমে ব্যোমন্ ।
যদ্ধ দ্যাবাপৃথিবী আবিবেশীরথাভবঃ পূর্ব্যঃ কারুধায়াঃ ॥১০॥

32.9

অহন্নহিং পরিশয়ানমর্ণ ওজায়মানং তুবিজাত তব্যান্ ।
ন তে মহিত্বমনু ভূদধ দ্যৌর্যদন্যয়া স্ফিগ্যা৩ ক্ষামবস্থাঃ ॥১১॥

32.10

যজ্ঞো হি ত ইন্দ্র বর্ধনো ভূদুত প্রিয়ঃ সুতসোমো মিয়েধঃ ।
যজ্ঞেন যজ্ঞমব যজ্ঞিয়ঃ সন্ যজ্ঞস্তে বজ্রমহিহত্য আবৎ ॥১২॥

32.11

যজ্ঞেনেন্দ্রমবসা চক্রে অর্বাগৈনং সুম্নায় নব্যসে ববৃত্যাম্ ।
যঃ স্তোমেভির্বাবৃধে পূর্ব্যেভির্যো মধ্যমেভিরুত নূতনেভিঃ ॥১৩॥

32.12

বিবেষ যন্মা ধিষণা জজান স্তবৈ পুরা পার্যাদিন্দ্রমহ্নঃ ।
অংহসো যত্র পীপরদ্ যথা নো নাবেব যান্তমুভয়ে হবন্তে ॥১৪॥

32.13

আপূর্ণো অস্য কলশঃ স্বাহা সেক্তেব কোশং সিসিচে পিবধ্যৈ ।
সমু প্রিয়া আববৃত্রন্ মদায় প্রদক্ষিণিদভি সোমাস ইন্দ্রম্ ॥১৫॥

32.14

ন ত্বা গভীরঃ পুরুহূত সিন্ধুর্নাদ্রয়ঃ পরি ষন্তো বরন্ত ।
ইত্থা সখিভ্য ইষিতো যদিন্দ্রা ঽঽদৃলহং চিদরুজো গব্যমূর্বম্ ॥১৬॥

32.15

শুনং হুবেম মঘবানমিন্দ্রমস্মিন্ ভরে নৃতমং বাজসাতৌ ।
শৃণ্বন্তমুগ্রমূতয়ে সমত্সু ঘ্নন্তং বৃত্রাণি সংজিতং ধনানাম্ ॥১৭॥