সূক্ত 31

31.1

২২ কুশিক ঐষীরথিঃ, গাথিনো বিশ্বামিত্রো বা। ইন্দ্রঃ। ত্রিষ্টুপ্।

শাসদ্ বহ্নির্দুহিতুর্নপ্ত্যং গাদ্ বিদ্বাঁ ঋতস্য দীধিতিং সপর্যন্ ।
পিতা যত্র দুহিতুঃ সেকমৃঞ্জন্ ত্সং শগ্ম্যেন মনসা দধন্বে ॥১॥

31.2

ন জাময়ে তান্বো রিক্থমারৈক্ চকার গর্ভং সনিতুর্নিধানম্ ।
যদী মাতরো জনয়ন্ত বহ্নিমন্যঃ কর্তা সুকৃতোরন্য ঋন্ধন্ ॥২॥

31.3

অগ্নির্জজ্ঞে জুহ্বা৩ রেজমানো মহস্পুত্রাঁ অরুষস্য প্রয়ক্ষে ।
মহান্ গর্ভো মহ্যা জাতমেষাং মহী প্রবৃদ্ধর্যশ্বস্য যজ্ঞৈঃ ॥৩॥

31.4

অভি জৈত্রীরসচন্ত স্পৃধানং মহি জ্যোতিস্তমসো নিরজানন্ ।
তং জানতীঃ প্রত্যুদায়ন্নুষাসঃ পতির্গবামভবদেক ইন্দ্রঃ ॥৪॥

31.5

বীলৌ সতীরভি ধীরা অতৃন্দন্ প্রাচাহিন্বন্ মনসা সপ্ত বিপ্রাঃ ।
বিশ্বামবিন্দন্ পথ্যামৃতস্য প্রজানন্নিত্তা নমসা বিবেশ ॥৫॥

31.6

বিদদ্ যদী সরমা রুগ্ণমদ্রের্মহি পাথঃ পূর্ব্যং সধ্র্যক্কঃ ।
অগ্রং নয়ৎ সুপদ্যক্ষরাণামচ্ছা রবং প্রথমা জানতী গাৎ ॥৬॥

31.7

অগচ্ছদু বিপ্রতমঃ সখীয়ন্নসূদয়ৎ সুকৃতে গর্ভমদ্রিঃ ।
সসান মর্যো যুবভির্মখস্যন্নথাভবদঙ্গিরাঃ সদ্যো অর্চন্ ॥৭॥

31.8

সতঃসতঃ প্রতিমানং পুরোভূর্বিশ্বা বেদ জনিমা হন্তি শুষ্ণম্ ।
প্র ণো দিবঃ পদবীর্গব্যুরর্চন্ ত্সখা সখীঁরমুঞ্চন্নিরবদ্যাৎ ॥৮॥

31.9

নি গব্যতা মনসা সেদুরর্কৈঃ কৃণ্বানাসো অমৃতত্বায় গাতুম্ ।
ইদং চিন্নু সদনং ভূর্যেষাং যেন মাসাঁ অসিষাসন্নৃতেন ॥৯॥

31.10

সম্পশ্যমানা অমদন্নভি স্বং পয়ঃ প্রত্নস্য রেতসো দুঘানাঃ ।
বি রোদসী অতপদ্ ঘোষ এষাং জাতে নিঃষ্ঠামদধুর্গোষু বীরান্ ॥১০॥

31.11

স জাতেভির্বৃত্রহা সেদু হব্যৈরুদুস্রিয়া অসৃজদিন্দ্রো অর্কৈঃ ।
উরূচ্যস্মৈ ঘৃতবদ্ ভরন্তী মধু স্বাদ্ম দুদুহে জেন্যা গৌঃ ॥১১॥

31.12

পিত্রে চিচ্চক্রুঃ সদনং সমস্মৈ মহি ত্বিষীমৎ সুকৃতো বি হি খ্যন্ ।
বিষ্কভ্নন্তঃ স্কম্ভনেনা জনিত্রী আসীনা ঊর্ধ্বং রভসং বি মিন্বন্ ॥১২॥

31.13

মহী যদি ধিষণা শিশ্নথে ধাৎ সদ্যোবৃধং বিভ্বং১ রোদস্যোঃ ।
গিরো যস্মিন্ননবদ্যাঃ সমীচীর্বিশ্বা ইন্দ্রায় তবিষীরনুত্তাঃ ॥১৩॥

31.14

মহ্যা তে সখ্যং বশ্মি শক্তীরা বৃত্রঘ্নে নিয়ুতো যন্তি পূর্বীঃ ।
মহি স্তোত্রমব আগন্ম সূরেরস্মাকং সু মঘবন্ বোধি গোপাঃ ॥১৪॥

31.15

মহি ক্ষেত্রং পুরু শ্চন্দ্রং বিবিদ্বানাদিৎ সখিভ্যশ্চরথং সমৈরৎ ।
ইন্দ্রো নৃভিরজনদ্ দীদ্যানঃ সাকং সূর্যমুষসং গাতুমগ্নিম্ ॥১৫॥

31.16

অপশ্চিদেষ বিভ্বো৩ দমূনাঃ প্র সধ্রীচীরসৃজদ্ বিশ্বশ্চন্দ্রাঃ ।
মধ্বঃ পুনানাঃ কবিভিঃ পবিত্রৈর্দ্যুভির্হিন্বন্ত্যক্তুভির্ধনুত্রীঃ ॥১৬॥

31.17

অনু কৃষ্ণে বসুধিতী জিহাতে উভে সূর্যস্য মংহনা যজত্রে ।
পরি যৎ তে মহিমানং বৃজধ্যৈ সখায় ইন্দ্র কাম্যা ঋজিপ্যাঃ ॥১৭॥

31.18

পতির্ভব বৃত্রহন্ ত্সূনৃতানাং গিরাং বিশ্বায়ুর্বৃষভো বয়োধাঃ ।
আ নো গহি সখ্যেভিঃ শিবেভির্মহান্ মহীভিরূতিভিঃ সরণ্যন্ ॥১৮॥

31.19

তমঙ্গিরস্বন্নমসা সপর্যন্ নব্যং কৃণোমি সন্যসে পুরাজাম্ ।
দ্রুহো বি যাহি বহুলা অদেবীঃ স্বশ্চ নো মঘবন্ ত্সাতয়ে ধাঃ ॥১৯॥

31.20

মিহঃ পাবকাঃ প্রততা অভূবন্ ত্স্বস্তি নঃ পিপৃহি পারমাসাম্ ।
ইন্দ্র ত্বং রথিরঃ পাহি নো রিষো মক্ষূমক্ষূ কৃণুহি গোজিতো নঃ ॥২০॥

31.21

অদেদিষ্ট বৃত্রহা গোপতির্গা অন্তঃ কৃষ্ণাঁ অরুষৈর্ধামভির্গাৎ ।
প্র সূনৃতা দিশমান ঋতেন দুরশ্চ বিশ্বা অবৃণোদপ স্বাঃ ॥২১॥

31.22

শুনং হুবেম মঘবানমিন্দ্রমস্মিন্ভ ভরে নৃতমং বাজসাতৌ ।
শৃণ্বন্তমুগ্রমূতয়ে সমত্সু ঘ্নন্তং বৃত্রাণি সংজিতং ধনানাম্ ॥২২॥