সূক্ত 30

30.1

২২ গাথিনো বিশ্বামিত্রঃ। ইন্দ্রঃ। ত্রিষ্টুপ্।

ইচ্ছন্তি ত্বা সোম্যাসঃ সখায়ঃ সুন্বন্তি সোমং দধতি প্রয়াংসি ।
তিতিক্ষন্তে অভিশস্তিং জনানামিন্দ্র ত্বদা কশ্চন হি প্রকেতঃ ॥১॥

ন তে দূরে পরমা চিদ্ রজাংস্যা তু প্র যাহি হরিবো হরিভ্যাম্ ।
স্থিরায় বৃষ্ণে সবনা কৃতেমা যুক্তা গ্রাবাণঃ সমিধানে অগ্নৌ ॥২॥

ইন্দ্রঃ সুশিপ্রো মঘবা তরুত্রো মহাব্রাতস্তুবিকূর্মিৠঘাবান্ ।
যদুগ্রো ধা বাধিতো মর্ত্যেষু ক্ব১ ত্যা তে বৃষভ বীর্যাণি ॥৩॥

ত্বং হি ষ্মা চ্যাবয়ন্নচ্যুতান্যেকো বৃত্রা চরসি জিঘ্নমানঃ ।
তব দ্যাবাপৃথিবী পর্বতাসোঽনু ব্রতায় নিমিতেব তস্থুঃ ॥৪॥

উতাভয়ে পুরুহূত শ্রবোভিরেকো দৃলহমবদো বৃত্রহা সন্ ।
ইমে চিদিন্দ্র রোদসী অপারে যৎ সংগৃভ্ণা মঘবন্ কাশিরিৎ তে ॥৫॥

প্র সূ ত ইন্দ্র প্রবতা হরিভ্যাং প্র তে বজ্রঃ প্রমৃণন্নেতু শত্রূন্ ।
জহি প্রতীচো অনূচঃ পরাচো বিশ্বং সত্যং কৃণুহি বিষ্টমস্তু ॥৬॥

যস্মৈ ধায়ুরদধা মর্ত্যায়াভক্তং চিদ্ ভজতে গেহ্যং১ সঃ ।
ভদ্রা ত ইন্দ্র সুমতির্ঘৃতাচী সহস্রদানা পুরুহূত রাতিঃ ॥৭॥

সহদানুং পুরুহূত ক্ষিয়ন্তমহস্তমিন্দ্র সং পিণক্কুণারুম্ ।
অভি বৃত্রং বর্ধমানং পিয়ারুমপাদমিন্দ্র তবসা জঘন্থ ॥৮॥

নি সামনামিষিরামিন্দ্র ভূমিং মহীমপারাং সদনে সসত্থ ।
অস্তভ্নাদ্ দ্যাং বৃষভো অন্তরিক্ষমর্ষন্ত্বাপস্ত্বয়েহ প্রসূতাঃ ॥৯॥

অলাতৃণো বল ইন্দ্র ব্রজো গোঃ পুরা হন্তোর্ভয়মানো ব্যার ।
সুগান্ পথো অকৃণোন্নিরজে গাঃ প্রাবন্ বাণীঃ পুরুহূতং ধমন্তীঃ ॥১০॥

একো দ্বে বসুমতী সমীচী ইন্দ্র আ পপ্রৌ পৃথিবীমুত দ্যাম্ ।
উতান্তরিক্ষাদভি নঃ সমীক ইষো রথীঃ সয়ুজঃ শূর বাজান্ ॥১১॥

দিশঃ সূর্যো ন মিনাতি প্রদিষ্টা দিবেদিবে হর্যশ্বপ্রসূতাঃ ।
সং যদানলধ্বন আদিদশ্বৈর্বিমোচনং কৃণুতে তত্ত্বস্য ॥১২॥

দিদৃক্ষন্ত উষসো যামন্নক্তোর্বিবস্বত্যা মহি চিত্রমনীকম্ ।
বিশ্বে জানন্তি মহিনা যদাগাদিন্দ্রস্য কর্ম সুকৃতা পুরূণি ॥১৩॥

মহি জ্যোতির্নিহিতং বক্ষণাস্বামা পক্বং চরতি বিভ্রতী গৌঃ ।
বিশ্বং স্বাদ্ম সম্ভৃতমুস্রিয়ায়াং যৎ সীমিন্দ্রো অদধাদ্ ভোজনায় ॥১৪॥

ইন্দ্র দৃহ্য যামকোশা অভূবন্ যজ্ঞায় শিক্ষ গৃণতে সখিভ্যঃ ।
দুর্মায়বো দুরেবা মর্ত্যাসো নিষঙ্গিণো রিপবো হন্ত্বাসঃ ॥১৫॥

সং ঘোষঃ শৃণ্বেঽবমৈরমিত্রৈর্জহী ন্যেষ্বশনিং তপিষ্ঠাম্ ।
বৃশ্চেমধস্তাদ্ বি রুজা সহস্ব জহি রক্ষো মঘবন্ রন্ধয়স্ব ॥১৬॥

উদ্ বৃহ রক্ষঃ সহমূলমিন্দ্র বৃশ্চা মধ্যং প্রত্যগ্রং শৃণীহি ।
আ কীবতঃ সললূকং চকর্থ ব্রহ্মদ্বিষে তপুষিং হেতিমস্য ॥১৭॥

স্বস্তয়ে বাজিভিশ্চ প্রণেতঃ সং যন্মহীরিষ আসত্সি পূর্বীঃ ।
রায়ো বন্তারো বৃহতঃ স্যামাস্মে অস্তু ভগ ইন্দ্র প্রজাবান্ ॥১৮॥

আ নো ভর ভগমিন্দ্র দ্যুমন্তং নি তে দেষ্ণস্য ধীমহি প্ররেকে ।
ঊর্ব ইব পপ্রথে কামো অস্মে তমা পৃণ বসুপতে বসূনাম্ ॥১৯॥

ইমং কামং মন্দয়া গোভিরশ্বৈশ্চন্দ্রবতা রাধসা পপ্রথশ্চ ।
স্বর্যবো মতিভিস্তুভ্যং বিপ্রা ইন্দ্রায় বাহঃ কুশিকাসো অক্রন্ ॥২০॥

আ নো গোত্রা দর্দৃহি গোপতে গাঃ সমস্মভ্যং সনয়ো যন্তু বাজাঃ ।
দিবক্ষা অসি বৃষভ সত্যশুষ্মোঽস্মভ্যং সু মঘবন্ বোধি গোদাঃ ॥২১॥

শুনং হুবেম মঘবানমিন্দ্রমস্মিন্ ভরে নৃতমং বাজসাতৌ ।
শৃণ্বন্তমুগ্রমূতয়ে সমত্সু ঘ্নন্তং বৃত্রাণি সংজিতং ধনানাম্ ॥২২॥