সূক্ত 29

29.1

১৬ গাথিনো বিশ্বামিত্রঃ। অগ্নিঃ, ৫ ঋত্বিজো বা। ত্রিষ্টুপ্, ১, ৪, ১০, ১২ অনুষ্টুপ্, ৬, ১১, ১৪, ১৫ জগতী।

অস্তীদমধিমন্থনমস্তি প্রজননং কৃতম্ ।
এতাং বিশ্পত্নীমা ভরাগ্নিং মন্থাম পূর্বথা ॥১॥

অরণ্যোর্নিহিতো জাতবেদা গর্ভ ইব সুধিতো গর্ভিণীষু ।
দিবেদিব ঈড্যো জাগৃবদ্ভির্হবিষ্মদ্ভির্মনুষ্যেভিরগ্নিঃ ॥২॥

উত্তানায়ামব ভরা চিকিত্বান্ ত্সদ্যঃ প্রবীতা বৃষণং জজান ।
অরুষস্তূপো রুশদস্য পাজ ইলায়াস্পুত্রো বয়ুনেঽজনিষ্ট ॥৩॥

ইলায়াস্ত্বা পদে বয়ং নাভা পৃথিব্যা অধি ।
জাতবেদো নি ধীমহ্যগ্নে হব্যায় বোলহবে ॥৪॥

মন্থতা নরঃ কবিমদ্বয়ন্তং প্রচেতসমমৃতং সুপ্রতীকম্ ।
যজ্ঞস্য কেতুং প্রথমং পুরস্তাদগ্নিং নরো জনয়তা সুশেবম্ ॥৫॥

যদী মন্থন্তি বাহুভির্বি রোচতেঽশ্বো ন বাজ্যরুষো বনেষ্বা ।
চিত্রো ন যামন্নশ্বিনোরনিবৃতঃ পরি বৃণক্ত্যশ্মনস্তৃণা দহন্ ॥৬॥

জাতো অগ্নী রোচতে চেকিতানো বাজী বিপ্রঃ কবিশস্তঃ সুদানুঃ ।
যং দেবাস ঈড্যং বিশ্ববিদং হব্যবাহমদধুরধ্বরেষু ॥৭॥

সীদ হোতঃ স্ব উ লোকে চিকিত্বান্ ত্সাদয়া যজ্ঞং সুকৃতস্য যোনৌ ।
দেবাবীর্দেবান্ হবিষা যজাস্যগ্নে বৃহদ্ যজমানে বয়ো ধাঃ ॥৮॥

কৃণোত ধূমং বৃষণং সখায়োঽস্রেধন্ত ইতন বাজমচ্ছ ।
অয়মগ্নিঃ পৃতনাষাট্ সুবীরো যেন দেবাসো অসহন্ত দস্যূন্ ॥৯॥

অয়ং তে যোনিৠত্বিয়ো যতো জাতো অরোচথাঃ ।
তং জানন্নগ্ন আ সীদাথা নো বর্ধয়া গিরঃ ॥১০॥

তনূনপাদুচ্যতে গর্ভ আসুরো নরাশংসো ভবতি যদ্ বিজায়তে ।
মাতরিশ্বা যদমিমীত মাতরি বাতস্য সর্গো অভবৎ সরীমণি ॥১১॥

সুনির্মথা নির্মথিতঃ সুনিধা নিহিতঃ কবিঃ ।
অগ্নে স্বধ্বরা কৃণু দেবান্ দেবয়তে যজ ॥১২॥

অজীজনন্নমৃতং মর্ত্যাসোঽস্রেমাণং তরণিং বীলুজম্ভম্ ।
দশ স্বসারো অগ্রুবঃ সমীচীঃ পুমাংসং জাতমভি সং রভন্তে ॥১৩॥

প্র সপ্তহোতা সনকাদরোচত মাতুরুপস্থে যদশোচদূধনি ।
ন নি মিষতি সুরণো দিবেদিবে যদসুরস্য জঠরাদজায়ত ॥১৪॥

অমিত্রায়ুধো মরুতামিব প্রয়াঃ প্রথমজা ব্রহ্মণো বিশ্বমিদ্ বিদুঃ ।
দ্যুম্নবদ্ ব্রহ্ম কুশিকাস এরির একএকো দমে অগ্নিং সমীধিরে ॥১৫॥

যদদ্য ত্বা প্রয়তি যজ্ঞে অস্মিন্ হোতশ্চিকিত্বোঽবৃণীমহীহ ।
ধ্রুবময়া ধ্রুবমুতাশমিষ্ঠাঃ প্রজানন্ বিদ্বাঁ উপ যাহি সোমম্ ॥১৬॥