Sukta 29

29.1

16 gathino vishvamitrah, agnih, 5 ritvijo va, trishtup, 1, 4, 10, 12 anushtup, 6, 11, 14, 15 jagati

अस्ती॒दम॑धि॒मन्थ॑न॒मस्ति॑ प्र॒जन॑नं कृ॒तम् ।
ए॒तां वि॒श्पत्नी॒मा भ॑रा॒ग्निं म॑न्थाम पू॒र्वथा॑ ॥१॥

Astidamadhimanthanamasti prajananam kritam
Etam vishpatnima bharagnim manthama purvatha

29.2

अ॒रण्यो॒र्निहि॑तो जा॒तवे॑दा॒ गर्भ॑ इव॒ सुधि॑तो ग॒र्भिणी॑षु ।
दि॒वेदि॑व॒ ईड्यो॑ जागृ॒वद्भि॑र्ह॒विष्म॑द्भिर्मनु॒ष्ये॑भिर॒ग्निः ॥२॥

Aranyornihito jataveda garbha iva sudhito garbhinishu
Divediva idyo jagrivadbhirhavishmadbhirmanushyebhiragnih

29.3

उ॒त्ता॒नाया॒मव॑ भरा चिकि॒त्वान् त्स॒द्यः प्रवी॑ता॒ वृष॑णं जजान ।
अ॒रु॒षस्तू॑पो॒ रुश॑दस्य॒ पाज॒ इळा॑यास्पु॒त्रो व॒युने॑ऽजनिष्ट ॥३॥

Uttanayamava bhara chikitvan tsadyah pravita vrishanam jajana
Arushastupo rushadasya paja ilayasputro vayunejanishta

29.4

इळा॑यास्त्वा प॒दे व॒यं नाभा॑ पृथि॒व्या अधि॑ ।
जात॑वेदो॒ नि धी॑म॒ह्यग्ने॑ ह॒व्याय॒ वोळह॑वे ॥४॥

Ilayastva pade vayam nabha prithivya adhi
Jatavedo ni dhimahyagne havyaya volahave

29.5

मन्थ॑ता नरः क॒विमद्व॑यन्तं॒ प्रचे॑तसम॒मृतं॑ सु॒प्रती॑कम् ।
य॒ज्ञस्य॑ के॒तुं प्र॑थ॒मं पु॒रस्ता॑द॒ग्निं न॑रो जनयता सु॒शेव॑म् ॥५॥

Manthata narah kavimadvayantam prachetasamamritam supratikam
Yagyasya ketum prathamam purastadagnim naro janayata sushevam

29.6

यदी॒ मन्थ॑न्ति बा॒हुभि॒र्वि रो॑च॒तेऽश्वो॒ न वा॒ज्य॑रु॒षो वने॒ष्वा ।
चि॒त्रो न याम॑न्न॒श्विनो॒रनि॑वृत॒ः परि॑ वृण॒क्त्यश्म॑न॒स्तृणा॒ दह॑न् ॥६॥

Yadi manthanti bahubhirvi rochateshvo na vajyarusho vaneshva
Chitro na yamannashvinoranivritah pari vrinaktyashmanastrina dahan

29.7

जा॒तो अ॒ग्नी रो॑चते॒ चेकि॑तानो वा॒जी विप्र॑ः कविश॒स्तः सु॒दानु॑ः ।
यं दे॒वास॒ ईड्यं॑ विश्व॒विदं॑ हव्य॒वाह॒मद॑धुरध्व॒रेषु॑ ॥७॥

Jato agni rochate chekitano vaji viprah kavishastah sudanuh
Yam devasa idyam vishvavidam havyavahamadadhuradhvareshu

29.8

सीद॑ होत॒ः स्व उ॑ लो॒के चि॑कि॒त्वान् त्सा॒दया॑ य॒ज्ञं सु॑कृ॒तस्य॒ योनौ॑ ।
दे॒वा॒वीर्दे॒वान् ह॒विषा॑ यजा॒स्यग्ने॑ बृ॒हद् यज॑माने॒ वयो॑ धाः ॥८॥

Sida hotah sva u loke chikitvan tsadaya yagyam sukritasya yonau
Devavirdevan havisha yajasyagne brihad yajamane vayo dhah

29.9

कृ॒णोत॑ धू॒मं वृष॑णं सखा॒योऽस्रे॑धन्त इतन॒ वाज॒मच्छ॑ ।
अ॒यम॒ग्निः पृ॑तना॒षाट् सु॒वीरो॒ येन॑ दे॒वासो॒ अस॑हन्त॒ दस्यू॑न् ॥९॥

Krinota dhumam vrishanam sakhayosredhanta itana vajamachchha
Ayamagnih pritanashat suviro yena devaso asahanta dasyun

29.10

अ॒यं ते॒ योनि॑ॠ॒त्वियो॒ यतो॑ जा॒तो अरो॑चथाः ।
तं जा॒नन्न॑ग्न॒ आ सी॒दाथा॑ नो वर्धया॒ गिर॑ः ॥१०॥

Ayam te yoniritviyo yato jato arochathah
Tam janannagna a sidatha no vardhaya girah

29.11

तनू॒नपा॑दुच्यते॒ गर्भ॑ आसु॒रो नरा॒शंसो॑ भवति॒ यद् वि॒जाय॑ते ।
मा॒त॒रिश्वा॒ यदमि॑मीत मा॒तरि॒ वात॑स्य॒ सर्गो॑ अभव॒त् सरी॑मणि ॥११॥

Tanunapaduchyate garbha asuro narashanso bhavati yad vijayate
Matarishva yadamimita matari vatasya sargo abhavat sarimani

29.12

सु॒नि॒र्मथा॒ निर्म॑थितः सुनि॒धा निहि॑तः क॒विः ।
अग्ने॑ स्वध्व॒रा कृ॑णु दे॒वान् दे॑वय॒ते य॑ज ॥१२॥

Sunirmatha nirmathitah sunidha nihitah kavih
Agne svadhvara krinu devan devayate yaja

29.13

अजी॑जनन्न॒मृतं॒ मर्त्या॑सोऽस्रे॒माणं॑ त॒रणिं॑ वी॒ळुज॑म्भम् ।
दश॒ स्वसा॑रो अ॒ग्रुव॑ः समी॒चीः पुमां॑सं जा॒तम॒भि सं र॑भन्ते ॥१३॥

Ajijanannamritam martyasosremanam taranim vilujambham
Dasha svasaro agruvah samichih pumansam jatamabhi sam rabhante

29.14

प्र स॒प्तहो॑ता सन॒काद॑रोचत मा॒तुरु॒पस्थे॒ यदशो॑च॒दूध॑नि ।
न नि मि॑षति सु॒रणो॑ दि॒वेदि॑वे॒ यदसु॑रस्य ज॒ठरा॒दजा॑यत ॥१४॥

Pra saptahota sanakadarochata maturupasthe yadashochadudhani
Na ni mishati surano divedive yadasurasya jatharadajayata

29.15

अ॒मि॒त्रा॒युधो॑ म॒रुता॑मिव प्र॒याः प्र॑थम॒जा ब्रह्म॑णो॒ विश्व॒मिद् वि॑दुः ।
द्यु॒म्नव॒द् ब्रह्म॑ कुशि॒कास॒ एरि॑र॒ एक॑एको॒ दमे॑ अ॒ग्निं समी॑धिरे ॥१५॥

Amitrayudho marutamiva prayah prathamaja brahmano vishvamid viduh
Dyumnavad brahma kushikasa erira ekaeko dame agnim samidhire

29.16

यद॒द्य त्वा॑ प्रय॒ति य॒ज्ञे अ॒स्मिन् होत॑श्चिकि॒त्वोऽवृ॑णीमही॒ह ।
ध्रु॒वम॑या ध्रु॒वमु॒ताश॑मिष्ठाः प्रजा॒नन् वि॒द्वाँ उप॑ याहि॒ सोम॑म् ॥१६॥

Yadadya tva prayati yagye asmin hotashchikitvovrinimahiha
Dhruvamaya dhruvamutashamishthah prajanan vidvam upa yahi somam