Sukta 30

30.1

22 gathino vishvamitrah, indrah, trishtup

इ॒च्छन्ति॑ त्वा सो॒म्यास॒ः सखा॑यः सु॒न्वन्ति॒ सोमं॒ दध॑ति॒ प्रयां॑सि ।
तिति॑क्षन्ते अ॒भिश॑स्तिं॒ जना॑ना॒मिन्द्र॒ त्वदा कश्च॒न हि प्र॑के॒तः ॥१॥

Ichchhanti tva somyasah sakhayah sunvanti somam dadhati prayansi
Titikshante abhishastim jananamindra tvada kashchana hi praketah

30.2

न ते॑ दू॒रे प॑र॒मा चि॒द् रजां॒स्या तु प्र या॑हि हरिवो॒ हरि॑भ्याम् ।
स्थि॒राय॒ वृष्णे॒ सव॑ना कृ॒तेमा यु॒क्ता ग्रावा॑णः समिधा॒ने अ॒ग्नौ ॥२॥

Na te dure parama chid rajansya tu pra yahi harivo haribhyam
Sthiraya vrishne savana kritema yukta gravanah samidhane agnau

30.3

इन्द्र॑ः सु॒शिप्रो॑ म॒घवा॒ तरु॑त्रो म॒हाव्रा॑तस्तुविकू॒र्मिॠघा॑वान् ।
यदु॒ग्रो धा बा॑धि॒तो मर्त्ये॑षु॒ क्व१ त्या ते॑ वृषभ वी॒र्या॑णि ॥३॥

Indrah sushipro maghava tarutro mahavratastuvikurmirighavan
Yadugro dha badhito martyeshu kva1 tya te vrishabha viryani

30.4

त्वं हि ष्मा॑ च्या॒वय॒न्नच्यु॑ता॒न्येको॑ वृ॒त्रा चर॑सि॒ जिघ्न॑मानः ।
तव॒ द्यावा॑पृथि॒वी पर्व॑ता॒सोऽनु॑ व्र॒ताय॒ निमि॑तेव तस्थुः ॥४॥

Tvam hi shma chyavayannachyutanyeko vritra charasi jighnamanah
Tava dyavaprithivi parvatasonu vrataya nimiteva tasthuh

30.5

उ॒ताभ॑ये पुरुहूत॒ श्रवो॑भि॒रेको॑ दृ॒ळहम॑वदो वृत्र॒हा सन् ।
इ॒मे चि॑दिन्द्र॒ रोद॑सी अपा॒रे यत् सं॑गृ॒भ्णा म॑घवन् का॒शिरित् ते॑ ॥५॥

Utabhaye puruhuta shravobhireko drilahamavado vritraha san
Ime chidindra rodasi apare yat sangribhna maghavan kashirit te

30.6

प्र सू त॑ इन्द्र प्र॒वता॒ हरि॑भ्यां॒ प्र ते॒ वज्र॑ः प्रमृ॒णन्ने॑तु॒ शत्रू॑न् ।
ज॒हि प्र॑ती॒चो अ॑नू॒चः परा॑चो॒ विश्वं॑ स॒त्यं कृ॑णुहि वि॒ष्टम॑स्तु ॥६॥

Pra su ta indra pravata haribhyam pra te vajrah pramrinannetu shatrun
Jahi praticho anuchah paracho vishvam satyam krinuhi vishtamastu

30.7

यस्मै॒ धायु॒रद॑धा॒ मर्त्या॒याभ॑क्तं चिद् भजते गे॒ह्यं१ सः ।
भ॒द्रा त॑ इन्द्र सुम॒तिर्घृ॒ताची॑ स॒हस्र॑दाना पुरुहूत रा॒तिः ॥७॥

Yasmai dhayuradadha martyayabhaktam chid bhajate gehyan1 sah
Bhadra ta indra sumatirghritachi sahasradana puruhuta ratih

30.8

स॒हदा॑नुं पुरुहूत क्षि॒यन्त॑मह॒स्तमि॑न्द्र॒ सं पि॑ण॒क्कुणा॑रुम् ।
अ॒भि वृ॒त्रं वर्ध॑मानं॒ पिया॑रुम॒पाद॑मिन्द्र त॒वसा॑ जघन्थ ॥८॥

Sahadanum puruhuta kshiyantamahastamindra sam pinakkunarum
Abhi vritram vardhamanam piyarumapadamindra tavasa jaghantha

30.9

नि सा॑म॒नामि॑षि॒रामि॑न्द्र॒ भूमिं॑ म॒हीम॑पा॒रां सद॑ने ससत्थ ।
अस्त॑भ्ना॒द् द्यां वृ॑ष॒भो अ॒न्तरि॑क्ष॒मर्ष॒न्त्वाप॒स्त्वये॒ह प्रसू॑ताः ॥९॥

Ni samanamishiramindra bhumim mahimaparam sadane sasattha
Astabhnad dyam vrishabho antarikshamarshantvapastvayeha prasutah

30.10

अ॒ला॒तृ॒णो व॒ल इ॑न्द्र व्र॒जो गोः पु॒रा हन्तो॒र्भय॑मानो॒ व्या॑र ।
सु॒गान् प॒थो अ॑कृणोन्नि॒रजे॒ गाः प्राव॒न् वाणी॑ः पुरुहू॒तं धम॑न्तीः ॥१०॥

Alatrino vala indra vrajo goh pura hantorbhayamano vyara
Sugan patho akrinonniraje gah pravan vanih puruhutam dhamantih

30.11

एको॒ द्वे वसु॑मती समी॒ची इन्द्र॒ आ प॑प्रौ पृथि॒वीमु॒त द्याम् ।
उ॒तान्तरि॑क्षाद॒भि न॑ः समी॒क इ॒षो र॒थीः स॒युज॑ः शूर॒ वाजा॑न् ॥११॥

Eko dve vasumati samichi indra a paprau prithivimuta dyam
Utantarikshadabhi nah samika isho rathih sayujah shura vajan

30.12

दिश॒ः सूर्यो॒ न मि॑नाति॒ प्रदि॑ष्टा दि॒वेदि॑वे॒ हर्य॑श्वप्रसूताः ।
सं यदान॒ळध्व॑न॒ आदिदश्वै॑र्वि॒मोच॑नं कृणुते॒ तत्त्व॑स्य ॥१२॥

Dishah suryo na minati pradishta divedive haryashvaprasutah
Sam yadanaladhvana adidashvairvimochanam krinute tattvasya

30.13

दिदृ॑क्षन्त उ॒षसो॒ याम॑न्न॒क्तोर्वि॒वस्व॑त्या॒ महि॑ चि॒त्रमनी॑कम् ।
विश्वे॑ जानन्ति महि॒ना यदागा॒दिन्द्र॑स्य॒ कर्म॒ सुकृ॑ता पु॒रूणि॑ ॥१३॥

Didrikshanta ushaso yamannaktorvivasvatya mahi chitramanikam
Vishve jananti mahina yadagadindrasya karma sukrita puruni

30.14

महि॒ ज्योति॒र्निहि॑तं व॒क्षणा॑स्वा॒मा प॒क्वं च॑रति॒ बिभ्र॑ती॒ गौः ।
विश्वं॒ स्वाद्म॒ सम्भृ॑तमु॒स्रिया॑यां॒ यत् सी॒मिन्द्रो॒ अद॑धा॒द् भोज॑नाय ॥१४॥

Mahi jyotirnihitam vakshanasvama pakvam charati bibhrati gauh
Vishvam svadma sambhritamusriyayam yat simindro adadhad bhojanaya

30.15

इन्द्र॒ दृह्य॑ यामको॒शा अ॑भूवन् य॒ज्ञाय॑ शिक्ष गृण॒ते सखि॑भ्यः ।
दु॒र्मा॒यवो॑ दु॒रेवा॒ मर्त्या॑सो निष॒ङ्गिणो॑ रि॒पवो॒ हन्त्वा॑सः ॥१५॥

Indra drihya yamakosha abhuvan yagyaya shiksha grinate sakhibhyah
Durmayavo dureva martyaso nishangino ripavo hantvasah

30.16

सं घोष॑ः शृण्वेऽव॒मैर॒मित्रै॑र्ज॒ही न्ये॑ष्व॒शनिं॒ तपि॑ष्ठाम् ।
वृ॒श्चेम॒धस्ता॒द् वि रु॑जा॒ सह॑स्व ज॒हि रक्षो॑ मघवन् र॒न्धय॑स्व ॥१६॥

Sam ghoshah shrinvevamairamitrairjahi nyeshvashanim tapishtham
Vrishchemadhastad vi ruja sahasva jahi raksho maghavan randhayasva

30.17

उद् वृ॑ह॒ रक्ष॑ः स॒हमू॑लमिन्द्र वृ॒श्चा मध्यं॒ प्रत्यग्रं॑ शृणीहि ।
आ कीव॑तः सल॒लूकं॑ चकर्थ ब्रह्म॒द्विषे॒ तपु॑षिं हे॒तिम॑स्य ॥१७॥

Ud vriha rakshah sahamulamindra vrishcha madhyam pratyagram shrinihi
A kivatah salalukam chakartha brahmadvishe tapushim hetimasya

30.18

स्व॒स्तये॑ वा॒जिभि॑श्च प्रणेत॒ः सं यन्म॒हीरिष॑ आ॒सत्सि॑ पू॒र्वीः ।
रा॒यो व॒न्तारो॑ बृह॒तः स्या॑मा॒स्मे अ॑स्तु॒ भग॑ इन्द्र प्र॒जावा॑न् ॥१८॥

Svastaye vajibhishcha pranetah sam yanmahirisha asatsi purvih
Rayo vantaro brihatah syamasme astu bhaga indra prajavan

30.19

आ नो॑ भर॒ भग॑मिन्द्र द्यु॒मन्तं॒ नि ते॑ दे॒ष्णस्य॑ धीमहि प्ररे॒के ।
ऊ॒र्व इ॑व पप्रथे॒ कामो॑ अ॒स्मे तमा पृ॑ण वसुपते॒ वसू॑नाम् ॥१९॥

A no bhara bhagamindra dyumantam ni te deshnasya dhimahi prareke
Urva iva paprathe kamo asme tama prina vasupate vasunam

30.20

इ॒मं कामं॑ मन्दया॒ गोभि॒रश्वै॑श्च॒न्द्रव॑ता॒ राध॑सा प॒प्रथ॑श्च ।
स्व॒र्यवो॑ म॒तिभि॒स्तुभ्यं॒ विप्रा॒ इन्द्रा॑य॒ वाह॑ः कुशि॒कासो॑ अक्रन् ॥२०॥

Imam kamam mandaya gobhirashvaishchandravata radhasa paprathashcha
Svaryavo matibhistubhyam vipra indraya vahah kushikaso akran

30.21

आ नो॑ गो॒त्रा द॑र्दृहि गोपते॒ गाः सम॒स्मभ्यं॑ स॒नयो॑ यन्तु॒ वाजा॑ः ।
दि॒वक्षा॑ असि वृषभ स॒त्यशु॑ष्मो॒ऽस्मभ्यं॒ सु म॑घवन् बोधि गो॒दाः ॥२१॥

A no gotra dardrihi gopate gah samasmabhyam sanayo yantu vajah
Divaksha asi vrishabha satyashushmosmabhyam su maghavan bodhi godah

30.22

शु॒नं हु॑वेम म॒घवा॑न॒मिन्द्र॑म॒स्मिन् भरे॒ नृत॑मं॒ वाज॑सातौ ।
शृ॒ण्वन्त॑मु॒ग्रमू॒तये॑ स॒मत्सु॒ घ्नन्तं॑ वृ॒त्राणि॑ सं॒जितं॒ धना॑नाम् ॥२२॥

Shunam huvema maghavanamindramasmin bhare nritamam vajasatau
Shrinvantamugramutaye samatsu ghnantam vritrani sanjitam dhananam