সূক্ত 37

37.1

৬ গৃত্সমদ (আঙ্গিরসঃ শৌনহোত্রঃ পশ্চাদ্) ভার্গবঃ শৌনকঃ। ঋতুদেবতাঃ- ১-৪ দ্রবিণোদা ঋতবশ্চ, ৫ অশ্বিনৌ ঋতবশ্চ, ৬ অগ্নিঃ ঋতুশ্চ। জগতী।

মন্দস্ব হোত্রাদনু জোষমন্ধসো ঽধ্বর্যবঃ স পূর্ণাং বষ্ট্যাসিচম্ ।
তস্মা এতং ভরত তদ্বশো দদির্হোত্রাৎ সোমং দ্রবিণোদঃ পিব ঋতুভিঃ ॥১॥

37.2

যমু পূর্বমহুবে তমিদং হুবে সেদু হব্যো দদির্যো নাম পত্যতে ।
অধ্বর্যুভিঃ প্রস্থিতং সোম্যং মধু পোত্রাৎ সোমং দ্রবিণোদঃ পিব ঋতুভিঃ ॥২॥

37.3

মেদ্যন্তু তে বহ্নয়ো যেভিরীয়সে ঽরিষণ্যন্ বীলয়স্বা বনস্পতে ।
আয়ূয়া ধৃষ্ণো অভিগূর্যা ত্বং নেষ্ট্রাৎ সোমং দ্রবিণোদঃ পিব ঋতুভিঃ ॥৩॥

37.4

অপাদ্ধোত্রাদুত পোত্রাদমত্তোত নেষ্ট্রাদজুষত প্রয়ো হিতম্ ।
তুরীয়ং পাত্রমমৃক্তমমর্ত্যং দ্রবিণোদাঃ পিবতু দ্রাবিণোদসঃ ॥৪॥

37.5

অর্বাঞ্চমদ্য যয্যং নৃবাহণং রথং যুঞ্জাথামিহ বাং বিমোচনম্ ।
পৃঙ্ক্তং হবীংষি মধুনা হি কং গতমথা সোমং পিবতং বাজিনীবসূ ॥৫॥

37.6

জোষ্যগ্নে সমিধং জোষ্যাহুতিং জোষি ব্রহ্ম জন্যং জোষি সুষ্টুতিম্ ।
বিশ্বেভির্বিশ্বাঁ ঋতুনা বসো মহ উশন্ দেবাঁ উশতঃ পায়য়া হবিঃ ॥৬॥