Sukta 37

37.1

6 gritsamada (angirasah shaunahotrah pashchad) bhargavah shaunakah, ritudevatah- 1-4 dravinoda ritavashcha, 5 ashvinau ritavashcha, 6 agnih ritushcha, jagati

मन्द॑स्व हो॒त्रादनु॒ जोष॒मन्ध॒सो ऽध्व॑र्यव॒ः स पू॒र्णां व॑ष्ट्या॒सिच॑म् ।
तस्मा॑ ए॒तं भ॑रत तद्व॒शो द॒दिर्हो॒त्रात् सोमं॑ द्रविणोद॒ः पिब॑ ऋ॒तुभि॑ः ॥१॥

Mandasva hotradanu joshamandhaso dhvaryavah sa purnam vashtyasicham
Tasma etam bharata tadvasho dadirhotrat somam dravinodah piba ritubhih

37.2

यमु॒ पूर्व॒महु॑वे॒ तमि॒दं हु॑वे॒ सेदु॒ हव्यो॑ द॒दिर्यो नाम॒ पत्य॑ते ।
अ॒ध्व॒र्युभि॒ः प्रस्थि॑तं सो॒म्यं मधु॑ पो॒त्रात् सोमं॑ द्रविणोद॒ः पिब॑ ऋ॒तुभि॑ः ॥२॥

Yamu purvamahuve tamidam huve sedu havyo dadiryo nama patyate
Adhvaryubhih prasthitam somyam madhu potrat somam dravinodah piba ritubhih

37.3

मेद्य॑न्तु ते॒ वह्न॑यो॒ येभि॒रीय॒से ऽरि॑षण्यन् वीळयस्वा वनस्पते ।
आ॒यूया॑ धृष्णो अभि॒गूर्या॒ त्वं ने॒ष्ट्रात् सोमं॑ द्रविणोद॒ः पिब॑ ऋ॒तुभि॑ः ॥३॥

Medyantu te vahnayo yebhiriyase rishanyan vilayasva vanaspate
Ayuya dhrishno abhigurya tvam neshtrat somam dravinodah piba ritubhih

37.4

अपा॑द्धो॒त्रादु॒त पो॒त्राद॑मत्तो॒त ने॒ष्ट्राद॑जुषत॒ प्रयो॑ हि॒तम् ।
तु॒रीयं॒ पात्र॒ममृ॑क्त॒मम॑र्त्यं द्रविणो॒दाः पि॑बतु द्राविणोद॒सः ॥४॥

Apaddhotraduta potradamattota neshtradajushata prayo hitam
Turiyam patramamriktamamartyam dravinodah pibatu dravinodasah

37.5

अ॒र्वाञ्च॑म॒द्य य॒य्यं॑ नृ॒वाह॑णं॒ रथं॑ युञ्जाथामि॒ह वां॑ वि॒मोच॑नम् ।
पृ॒ङ्क्तं ह॒वींषि॒ मधु॒ना हि कं॑ ग॒तमथा॒ सोमं॑ पिबतं वाजिनीवसू ॥५॥

Arvanchamadya yayyam nrivahanam ratham yunjathamiha vam vimochanam
Prinktam havinshi madhuna hi kam gatamatha somam pibatam vajinivasu

37.6

जोष्य॑ग्ने स॒मिधं॒ जोष्याहु॑तिं॒ जोषि॒ ब्रह्म॒ जन्यं॒ जोषि॑ सुष्टु॒तिम् ।
विश्वे॑भि॒र्विश्वाँ॑ ऋ॒तुना॑ वसो म॒ह उ॒शन् दे॒वाँ उ॑श॒तः पा॑यया ह॒विः ॥६॥

Joshyagne samidham joshyahutim joshi brahma janyam joshi sushtutim
Vishvebhirvishvam rituna vaso maha ushan devam ushatah payaya havih