Sukta 36

36.1

6 gritsamada (angirasah shaunahotrah pashchad) bhargavah shaunakah, ritudevatah- 1 indro madhushcha, 2maruto madhavashcha, 3 tvashta shukrashcha, 4 agnih shachishcha, 5 indro nabhashcha, 6 mitravarunau nabhasyashcha, jagati

तुभ्यं॑ हिन्वा॒नो व॑सिष्ट॒ गा अ॒पो ऽधु॑क्षन् त्सी॒मवि॑भि॒रद्रि॑भि॒र्नर॑ः ।
पिबे॑न्द्र॒ स्वाहा॒ प्रहु॑तं॒ वष॑ट्कृतं हो॒त्रादा सोमं॑ प्रथ॒मो य ईशि॑षे ॥१॥

Tubhyam hinvano vasishta ga apo dhukshan tsimavibhiradribhirnarah
Pibendra svaha prahutam vashatkritam hotrada somam prathamo ya ishishe

36.2

य॒ज्ञैः सम्मि॑श्ला॒ः पृष॑तीभिॠ॒ष्टिभि॒र्याम॑ञ्छु॒भ्रासो॑ अ॒ञ्जिषु॑ प्रि॒या उ॒त ।
आ॒सद्या॑ ब॒र्हिर्भ॑रतस्य सूनवः पो॒त्रादा सोमं॑ पिबता दिवो नरः ॥२॥

Yagyaih sammishlah prishatibhirishtibhiryamanchhubhraso anjishu priya uta
Asadya barhirbharatasya sunavah potrada somam pibata divo narah

36.3

अ॒मेव॑ नः सुहवा॒ आ हि गन्त॑न॒ नि ब॒र्हिषि॑ सदतना॒ रणि॑ष्टन ।
अथा॑ मन्दस्व जुजुषा॒णो अन्ध॑स॒स्त्वष्ट॑र्दे॒वेभि॒र्जनि॑भिः सु॒मद्ग॑णः ॥३॥

Ameva nah suhava a hi gantana ni barhishi sadatana ranishtana
Atha mandasva jujushano andhasastvashtardevebhirjanibhih sumadganah

36.4

आ व॑क्षि दे॒वाँ इ॒ह वि॑प्र॒ यक्षि॑ चो॒शन् हो॑त॒र्नि ष॑दा॒ योनि॑षु त्रि॒षु ।
प्रति॑ वीहि॒ प्रस्थि॑तं सो॒म्यं मधु॒ पिबाग्नी॑ध्रा॒त् तव॑ भा॒गस्य॑ तृप्णुहि ॥४॥

A vakshi devam iha vipra yakshi choshan hotarni shada yonishu trishu
Prati vihi prasthitam somyam madhu pibagnidhrat tava bhagasya tripnuhi

36.5

ए॒ष स्य ते॑ त॒न्वो॑ नृम्ण॒वर्ध॑न॒ः सह॒ ओज॑ः प्र॒दिवि॑ बा॒ह्वोर्हि॒तः ।
तुभ्यं॑ सु॒तो म॑घव॒न् तुभ्य॒माभृ॑त॒स्त्वम॑स्य॒ ब्राह्म॑णा॒दा तृ॒पत् पि॑ब ॥५॥

Esha sya te tanvo nrimnavardhanah saha ojah pradivi bahvorhitah
Tubhyam suto maghavan tubhyamabhritastvamasya brahmanada tripat piba

36.6

जु॒षेथां॑ य॒ज्ञं बोध॑तं॒ हव॑स्य मे स॒त्तो होता॑ नि॒विद॑ः पू॒र्व्या अनु॑ ।
अच्छा॒ राजा॑ना॒ नम॑ एत्या॒वृतं॑ प्रशा॒स्त्रादा पि॑बतं सो॒म्यं मधु॑ ॥६॥

Jushetham yagyam bodhatam havasya me satto hota nividah purvya anu
Achchha rajana nama etyavritam prashastrada pibatam somyam madhu