সূক্ত 35

35.1

১৫ গৃত্সমদ (আঙ্গিরসঃ শৌনহোত্রঃ পশ্চাদ্) ভার্গবঃ শৌনকঃ। অপাংনপাৎ। ত্রিষ্টুপ্।

উপেমসৃক্ষি বাজয়ুর্বচস্যাং চনো দধীত নাদ্যো গিরো মে ।
অপাং নপাদাশুহেমা কুবিৎ স সুপেশসস্করতি জোষিষদ্ধি ॥১॥

35.2

ইমং স্বস্মৈ হৃদ আ সুতষ্টং মন্ত্রং বোচেম কুবিদস্য বেদৎ ।
অপাং নপাদসুর্যস্য মহ্না বিশ্বান্যর্যো ভুবনা জজান ॥২॥

35.3

সমন্যা যন্ত্যুপ যন্ত্যন্যাঃ সমানমূর্বং নদ্যঃ পৃণন্তি ।
তমূ শুচিং শুচয়ো দীদিবাংসমপাং নপাতং পরি তস্থুরাপঃ ॥৩॥

35.4

তমস্মেরা যুবতয়ো যুবানং মর্মৃজ্যমানাঃ পরি যন্ত্যাপঃ ।
স শুক্রেভিঃ শিক্বভী রেবদস্মে দীদায়ানিধ্মো ঘৃতনির্ণিগপ্সু ॥৪॥

35.5

অস্মৈ তিস্রো অব্যথ্যায় নারীর্দেবায় দেবীর্দিধিষন্ত্যন্নম্ ।
কৃতা ইবোপ হি প্রসর্স্রে অপ্সু স পীয়ূষং ধয়তি পূর্বসূনাম্ ॥৫॥

35.6

অশ্বস্যাত্র জনিমাস্য চ স্বর্দ্রুহো রিষঃ সম্পৃচঃ পাহি সূরীন্ ।
আমাসু পূর্ষু পরো অপ্রমৃষ্যং নারাতয়ো বি নশন্নানৃতানি ॥৬॥

35.7

স্ব আ দমে সুদুঘা যস্য ধেনুঃ স্বধাং পীপায় সুভ্বন্নমত্তি ।
সো অপাং নপাদূর্জয়ন্নপ্স্ব১ন্তর্বসুদেয়ায় বিধতে বি ভাতি ৭॥
যো অপ্স্বা শুচিনা দৈব্যেন ঋতাবাজস্র উর্বিয়া বিভাতি ।
বয়া ইদন্যা ভুবনান্যস্য প্র জায়ন্তে বীরুধশ্চ প্রজাভিঃ ॥৮॥

35.8

অপাং নপাদা হ্যস্থাদুপস্থং জিহ্মানামূর্ধ্বো বিদ্যুতং বসানঃ ।
তস্য জ্যেষ্ঠং মহিমানং বহন্তীর্হিরণ্যবর্ণাঃ পরি যন্তি যহ্বীঃ ॥৯॥

35.9

হিরণ্যরূপঃ স হিরণ্যসংদৃগপাং নপাৎ সেদু হিরণ্যবর্ণঃ ।
হিরণ্যয়াৎ পরি যোনের্নিষদ্যা হিরণ্যদা দদত্যন্নমস্মৈ ॥১০॥

35.10

তদস্যানীকমুত চারু নামাপীচ্যং বর্ধতে নপ্তুরপাম্ ।
যমিন্ধতে যুবতয়ঃ সমিত্থা হিরণ্যবর্ণং ঘৃতমন্নমস্য ॥১১॥

35.11

অস্মৈ বহূনামবমায় সখ্যে যজ্ঞৈর্বিধেম নমসা হবির্ভিঃ ।
সং সানু মার্জ্মি দিধিষামি বিল্মৈর্দধাম্যন্নৈঃ পরি বন্দ ঋগ্ভিঃ ॥১২॥

35.12

স ঈং বৃষাজনয়ৎ তাসু গর্ভং স ঈং শিশুর্ধয়তি তং রিহন্তি ।
সো অপাং নপাদনভিম্লাতবর্ণো ঽন্যস্যেবেহ তন্বা বিবেষ ॥১৩॥

35.13

অস্মিন্ পদে পরমে তস্থিবাংসমধ্বস্মভির্বিশ্বহা দীদিবাংসম্ ।
আপো নপ্ত্রে ঘৃতমন্নং বহন্তীঃ স্বয়মত্কৈঃ পরি দীয়ন্তি যহ্বীঃ ॥১৪॥

35.14

অয়াংসমগ্নে সুক্ষিতিং জনায়ায়াংসমু মঘবদ্ভ্যঃ সুবৃক্তিম্ ।
বিশ্বং তদ্ ভদ্রং যদবন্তি দেবা বৃহদ্ বদেম বিদথে সুবীরাঃ ॥১৫॥