সূক্ত 34

34.1

১৫ গৃত্সমদ (আঙ্গিরসঃ শৌনহোত্রঃ পশ্চাদ্) ভার্গবঃ শৌনকঃ। মরুৎ। জগতী, ১৫ ত্রিষ্টুপ্।

ধারাবরা মরুতো ধৃষ্ণ্বোজসো মৃগা ন ভীমাস্তবিষীভিরর্চিনঃ ।
অগ্নয়ো ন শুশুচানা ঋজীষিণো ভৃমিং ধমন্তো অপ গা অবৃণ্বত ॥১॥

দ্যাবো ন স্তৃভিশ্চিতয়ন্ত খাদিনো ব্য১ভ্রিয়া ন দ্যুতয়ন্ত বৃষ্টয়ঃ ।
রুদ্রো যদ্ বো মরুতো রুক্মবক্ষসো বৃষাজনি পৃশ্ন্যাঃ শুক্র ঊধনি ॥২॥

উক্ষন্তে অশ্বাঁ অত্যাঁ ইবাজিষু নদস্য কর্ণৈস্তুরয়ন্ত আশুভিঃ ।
হিরণ্যশিপ্রা মরুতো দবিধ্বতঃ পৃক্ষং যাথ পৃষতীভিঃ সমন্যবঃ ॥৩॥

পৃক্ষে তা বিশ্বা ভুবনা ববক্ষিরে মিত্রায় বা সদমা জীরদানবঃ ।
পৃষদশ্বাসো অনবভ্ররাধস ঋজিপ্যাসো ন বয়ুনেষু ধূর্ষদঃ ॥৪॥

ইন্ধন্বভির্ধেনুভী রপ্শদূধভিরধ্বস্মভিঃ পথিভির্ভ্রাজদৃষ্টয়ঃ ।
আ হংসাসো ন স্বসরাণি গন্তন মধোর্মদায় মরুতঃ সমন্যবঃ ॥৫॥

আ নো ব্রহ্মাণি মরুতঃ সমন্যবো নরাং ন শংসঃ সবনানি গন্তন ।
অশ্বামিব পিপ্যত ধেনুমূধনি কর্তা ধিয়ং জরিত্রে বাজপেশসম্ ॥৬॥

তং নো দাত মরুতো বাজিনং রথ আপানং ব্রহ্ম চিতয়দ্ দিবেদিবে ।
ইষং স্তোতৃভ্যো বৃজনেষু কারবে সনিং মেধামরিষ্টং দুষ্টরং সহঃ ॥৭॥

যদ্ যুঞ্জতে মরুতো রুক্মবক্ষসো ঽশ্বান্ রথেষু ভগ আ সুদানবঃ ।
ধেনুর্ন শিশ্বে স্বসরেষু পিন্বতে জনায় রাতহবিষে মহীমিষম্ ॥৮॥

যো নো মরুতো বৃকতাতি মর্ত্যো রিপুর্দধে বসবো রক্ষতা রিষঃ ।
বর্তয়ত তপুষা চক্রিয়াভি তমব রুদ্রা অশসো হন্তনা বধঃ ॥৯॥

চিত্রং তদ্ বো মরুতো যাম চেকিতে পৃশ্ন্যা যদূধরপ্যাপয়ো দুহুঃ ।
যদ্ বা নিদে নবমানস্য রুদ্রিয়াস্ত্রিতং জরায় জুরতামদাভ্যাঃ ॥১০॥

তান্ বো মহো মরুত এবয়াব্নো বিষ্ণোরেষস্য প্রভৃথে হবামহে ।
হিরণ্যবর্ণান্ ককুহান্ যতস্রুচো ব্রহ্মণ্যন্তঃ শংস্যং রাধ ঈমহে ॥১১॥

তে দশগ্বাঃ প্রথমা যজ্ঞমূহিরে তে নো হিন্বন্তূষসো ব্যুষ্টিষু ।
উষা ন রামীররুণৈরপোর্ণুতে মহো জ্যোতিষা শুচতা গোঅর্ণসা ॥১২॥

তে ক্ষোণীভিররুণেভির্নাঞ্জিভী রুদ্রা ঋতস্য সদনেষু বাবৃধুঃ ।
নিমেঘমানা অত্যেন পাজসা সুশ্চন্দ্রং বর্ণং দধিরে সুপেশসম্ ॥১৩॥

তাঁ ইয়ানো মহি বরূথমূতয় উপ ঘেদেনা নমসা গৃণীমসি ।
ত্রিতো ন যান্ পঞ্চ হোতৄনভিষ্টয় আববর্তদবরাঞ্চক্রিয়াবসে ॥১৪॥

যয়া রধ্রং পারয়থাত্যংহো যয়া নিদো মুঞ্চথ বন্দিতারম্ ।
অর্বাচী সা মরুতো যা ব ঊতিরো ষু বাশ্রেব সুমতির্জিগাতু ॥১৫॥