সূক্ত 33

33.1

১৫ গৃত্সমদ (আঙ্গিরসঃ শৌনহোত্রঃ পশ্চাদ্) ভার্গবঃ শৌনকঃ। রুদ্রঃ। ত্রিষ্টুপ্।

আ তে পিতর্মরুতাং সুম্নমেতু মা নঃ সূর্যস্য সংদৃশো যুয়োথাঃ ।
অভি নো বীরো অর্বতি ক্ষমেত প্র জায়েমহি রুদ্র প্রজাভিঃ ॥১॥

33.2

ত্বাদত্তেভী রুদ্র শংতমেভিঃ শতং হিমা অশীয় ভেষজেভিঃ ।
ব্য১স্মদ্দ্বেষো বিতরং ব্যংহো ব্যমীবাশ্চাতয়স্বা বিষূচীঃ ॥২॥

33.3

শ্রেষ্ঠো জাতস্য রুদ্র শ্রিয়াসি তবস্তমস্তবসাং বজ্রবাহো ।
পর্ষি ণঃ পারমংহসঃ স্বস্তি বিশ্বা অভীতী রপসো যুয়োধি ॥৩॥

33.4

মা ত্বা রুদ্র চুক্রুধামা নমোভির্মা দুষ্টুতী বৃষভ মা সহূতী ।
উন্নো বীরাঁ অর্পয় ভেষজেভির্ভিষক্তমং ত্বা ভিষজাং শৃণোমি ॥৪॥

33.5

হবীমভির্হবতে যো হবির্ভিরব স্তোমেভী রুদ্রং দিষীয় ।
ঋদূদরঃ সুহবো মা নো অস্যৈ বভ্রুঃ সুশিপ্রো রীরধন্মনায়ৈ ॥৫॥

33.6

উন্মা মমন্দ বৃষভো মরুত্বান্ ত্বক্ষীয়সা বয়সা নাধমানম্ ।
ঘৃণীব চ্ছায়ামরপা অশীয়াঽঽ বিবাসেয়ং রুদ্রস্য সুম্নম্ ॥৬॥

33.7

ক্ব১ স্য তে রুদ্র মৃলয়াকুর্হস্তো যো অস্তি ভেষজো জলাষঃ ।
অপভর্তা রপসো দৈব্যস্যাভী নু মা বৃষভ চক্ষমীথাঃ ॥৭॥

33.8

প্র বভ্রবে বৃষভায় শ্বিতীচে মহো মহীং সুষ্টুতিমীরয়ামি ।
নমস্যা কল্মলীকিনং নমোভির্গৃণীমসি ত্বেষং রুদ্রস্য নাম ॥৮॥

33.9

স্থিরেভিরঙ্গৈঃ পুরুরূপ উগ্রো বভ্রুঃ শুক্রেভিঃ পিপিশে হিরণ্যৈঃ ।
ঈশানাদস্য ভুবনস্য ভূরের্ন বা উ যোষদ্ রুদ্রাদসুর্যম্ ॥৯॥

33.10

অর্হন্ বিভর্ষি সায়কানি ধন্বার্হন্ নিষ্কং যজতং বিশ্বরূপম্ ।
অর্হন্নিদং দয়সে বিশ্বমভ্বং ন বা ওজীয়ো রুদ্র ত্বদস্তি ॥১০॥

33.11

স্তুহি শ্রুতং গর্তসদং যুবানং মৃগং ন ভীমমুপহত্নুমুগ্রম্ ।
মৃলা জরিত্রে রুদ্র স্তবানো ঽন্যং তে অস্মন্নি বপন্তু সেনাঃ ॥১১॥

33.12

কুমারশ্চিৎ পিতরং বন্দমানং প্রতি নানাম রুদ্রোপয়ন্তম্ ।
ভূরের্দাতারং সত্পতিং গৃণীষে স্তুতস্ত্বং ভেষজা রাস্যস্মে ॥১২॥

33.13

যা বো ভেষজা মরুতঃ শুচীনি যা শংতমা বৃষণো যা ময়োভু ।
যানি মনুরবৃণীতা পিতা নস্তা শং চ যোশ্চ রুদ্রস্য বশ্মি ॥১৩॥

33.14

পরি ণো হেতী রুদ্রস্য বৃজ্যাঃ পরি ত্বেষস্য দুর্মতির্মহী গাৎ ।
অব স্থিরা মঘবদ্ভ্যস্তনুষ্ব মীঢ্বস্তোকায় তনয়ায় মৃল ॥১৪॥

33.15

এবা বভ্রো বৃষভ চেকিতান যথা দেব ন হৃণীষে ন হংসি ।
হবনশ্রুন্নো রুদ্রেহ বোধি বৃহদ্ বদেম বিদথে সুবীরাঃ ॥১৫॥