Sukta 33

33.1

15 gritsamada (angirasah shaunahotrah pashchad) bhargavah shaunakah, rudrah, trishtup

आ ते॑ पितर्मरुतां सु॒म्नमे॑तु॒ मा न॒ः सूर्य॑स्य सं॒दृशो॑ युयोथाः ।
अ॒भि नो॑ वी॒रो अर्व॑ति क्षमेत॒ प्र जा॑येमहि रुद्र प्र॒जाभि॑ः ॥१॥

A te pitarmarutam sumnametu ma nah suryasya sandrisho yuyothah
Abhi no viro arvati kshameta pra jayemahi rudra prajabhih

त्वाद॑त्तेभी रुद्र॒ शंत॑मेभिः श॒तं हिमा॑ अशीय भेष॒जेभि॑ः ।
व्य१स्मद्द्वेषो॑ वित॒रं व्यंहो॒ व्यमी॑वाश्चातयस्वा॒ विषू॑चीः ॥२॥

Tvadattebhi rudra shantamebhih shatam hima ashiya bheshajebhih
Vya1smaddvesho vitaram vyanho vyamivashchatayasva vishuchih

श्रेष्ठो॑ जा॒तस्य॑ रुद्र श्रि॒यासि॑ त॒वस्त॑मस्त॒वसां॑ वज्रबाहो ।
पर्षि॑ णः पा॒रमंह॑सः स्व॒स्ति विश्वा॑ अ॒भी॑ती॒ रप॑सो युयोधि ॥३॥

Shreshtho jatasya rudra shriyasi tavastamastavasam vajrabaho
Parshi nah paramanhasah svasti vishva abhiti rapaso yuyodhi

मा त्वा॑ रुद्र चुक्रुधामा॒ नमो॑भि॒र्मा दुष्टु॑ती वृषभ॒ मा सहू॑ती ।
उन्नो॑ वी॒राँ अ॑र्पय भेष॒जेभि॑र्भि॒षक्त॑मं त्वा भि॒षजां॑ शृणोमि ॥४॥

Ma tva rudra chukrudhama namobhirma dushtuti vrishabha ma sahuti
Unno viram arpaya bheshajebhirbhishaktamam tva bhishajam shrinomi

हवी॑मभि॒र्हव॑ते॒ यो ह॒विर्भि॒रव॒ स्तोमे॑भी रु॒द्रं दि॑षीय ।
ऋ॒दू॒दर॑ः सु॒हवो॒ मा नो॑ अ॒स्यै ब॒भ्रुः सु॒शिप्रो॑ रीरधन्म॒नायै॑ ॥५॥

Havimabhirhavate yo havirbhirava stomebhi rudram dishiya
Ridudarah suhavo ma no asyai babhruh sushipro riradhanmanayai

उन्मा॑ ममन्द वृष॒भो म॒रुत्वा॒न् त्वक्षी॑यसा॒ वय॑सा॒ नाध॑मानम् ।
घृणी॑व च्छा॒याम॑र॒पा अ॑शी॒याऽऽ वि॑वासेयं रु॒द्रस्य॑ सु॒म्नम् ॥६॥

Unma mamanda vrishabho marutvan tvakshiyasa vayasa nadhamanam
Ghriniva chchhayamarapa ashiya vivaseyam rudrasya sumnam

क्व१ स्य ते॑ रुद्र मृळ॒याकु॒र्हस्तो॒ यो अस्ति॑ भेष॒जो जला॑षः ।
अ॒प॒भ॒र्ता रप॑सो॒ दैव्य॑स्या॒भी नु मा॑ वृषभ चक्षमीथाः ॥७॥

Kva1 sya te rudra mrilayakurhasto yo asti bheshajo jalashah
Apabharta rapaso daivyasyabhi nu ma vrishabha chakshamithah

प्र ब॒भ्रवे॑ वृष॒भाय॑ श्विती॒चे म॒हो म॒हीं सु॑ष्टु॒तिमी॑रयामि ।
न॒म॒स्या क॑ल्मली॒किनं॒ नमो॑भिर्गृणी॒मसि॑ त्वे॒षं रु॒द्रस्य॒ नाम॑ ॥८॥

Pra babhrave vrishabhaya shvitiche maho mahim sushtutimirayami
Namasya kalmalikinam namobhirgrinimasi tvesham rudrasya nama

स्थि॒रेभि॒रङ्गै॑ः पुरु॒रूप॑ उ॒ग्रो ब॒भ्रुः शु॒क्रेभि॑ः पिपिशे॒ हिर॑ण्यैः ।
ईशा॑नाद॒स्य भुव॑नस्य॒ भूरे॒र्न वा उ॑ योषद् रु॒द्राद॑सु॒र्य॑म् ॥९॥

Sthirebhirangaih pururupa ugro babhruh shukrebhih pipishe hiranyaih
Ishanadasya bhuvanasya bhurerna va u yoshad rudradasuryam

अर्ह॑न् बिभर्षि॒ साय॑कानि॒ धन्वार्ह॑न् नि॒ष्कं य॑ज॒तं वि॒श्वरू॑पम् ।
अर्ह॑न्नि॒दं द॑यसे॒ विश्व॒मभ्वं॒ न वा ओजी॑यो रुद्र॒ त्वद॑स्ति ॥१०॥

Arhan bibharshi sayakani dhanvarhan nishkam yajatam vishvarupam
Arhannidam dayase vishvamabhvam na va ojiyo rudra tvadasti

स्तु॒हि श्रु॒तं ग॑र्त॒सदं॒ युवा॑नं मृ॒गं न भी॒ममु॑पह॒त्नुमु॒ग्रम् ।
मृ॒ळा ज॑रि॒त्रे रु॑द्र॒ स्तवा॑नो॒ ऽन्यं ते॑ अ॒स्मन्नि व॑पन्तु॒ सेना॑ः ॥११॥

Stuhi shrutam gartasadam yuvanam mrigam na bhimamupahatnumugram
Mrila jaritre rudra stavano nyam te asmanni vapantu senah

कु॒मा॒रश्चि॑त् पि॒तरं॒ वन्द॑मानं॒ प्रति॑ नानाम रुद्रोप॒यन्त॑म् ।
भूरे॑र्दा॒तारं॒ सत्प॑तिं गृणीषे स्तु॒तस्त्वं भे॑ष॒जा रा॑स्य॒स्मे ॥१२॥

Kumarashchit pitaram vandamanam prati nanama rudropayantam
Bhurerdataram satpatim grinishe stutastvam bheshaja rasyasme

या वो॑ भेष॒जा म॑रुत॒ः शुची॑नि॒ या शंत॑मा वृषणो॒ या म॑यो॒भु ।
यानि॒ मनु॒रवृ॑णीता पि॒ता न॒स्ता शं च॒ योश्च॑ रु॒द्रस्य॑ वश्मि ॥१३॥

Ya vo bheshaja marutah shuchini ya shantama vrishano ya mayobhu
Yani manuravrinita pita nasta sham cha yoshcha rudrasya vashmi

परि॑ णो हे॒ती रु॒द्रस्य॑ वृज्या॒ः परि॑ त्वे॒षस्य॑ दुर्म॒तिर्म॒ही गा॑त् ।
अव॑ स्थि॒रा म॒घव॑द्भ्यस्तनुष्व॒ मीढ्व॑स्तो॒काय॒ तन॑याय मृळ ॥१४॥

Pari no heti rudrasya vrijyah pari tveshasya durmatirmahi gat
Ava sthira maghavadbhyastanushva midhvastokaya tanayaya mrila

ए॒वा ब॑भ्रो वृषभ चेकितान॒ यथा॑ देव॒ न हृ॑णी॒षे न हंसि॑ ।
ह॒व॒न॒श्रुन्नो॑ रुद्रे॒ह बो॑धि बृ॒हद् व॑देम वि॒दथे॑ सु॒वीरा॑ः ॥१५॥

Eva babhro vrishabha chekitana yatha deva na hrinishe na hansi
Havanashrunno rudreha bodhi brihad vadema vidathe suvirah