Sukta 34

34.1

15 gritsamada (angirasah shaunahotrah pashchad) bhargavah shaunakah, marut, jagati, 15 trishtup

धा॒रा॒व॒रा म॒रुतो॑ धृ॒ष्ण्वो॑जसो मृ॒गा न भी॒मास्तवि॑षीभिर॒र्चिन॑ः ।
अ॒ग्नयो॒ न शु॑शुचा॒ना ऋ॑जी॒षिणो॒ भृमिं॒ धम॑न्तो॒ अप॒ गा अ॑वृण्वत ॥१॥

Dharavara maruto dhrishnvojaso mriga na bhimastavishibhirarchinah
Agnayo na shushuchana rijishino bhrimim dhamanto apa ga avrinvata

34.2

द्यावो॒ न स्तृभि॑श्चितयन्त खा॒दिनो॒ व्य१भ्रिया॒ न द्यु॑तयन्त वृ॒ष्टय॑ः ।
रु॒द्रो यद् वो॑ मरुतो रुक्मवक्षसो॒ वृषाज॑नि॒ पृश्न्या॑ः शु॒क्र ऊध॑नि ॥२॥

Dyavo na stribhishchitayanta khadino vya1bhriya na dyutayanta vrishtayah
Rudro yad vo maruto rukmavakshaso vrishajani prishnyah shukra udhani

34.3

उ॒क्षन्ते॒ अश्वाँ॒ अत्याँ॑ इवा॒जिषु॑ न॒दस्य॒ कर्णै॑स्तुरयन्त आ॒शुभि॑ः ।
हिर॑ण्यशिप्रा मरुतो॒ दवि॑ध्वतः पृ॒क्षं या॑थ॒ पृष॑तीभिः समन्यवः ॥३॥

Ukshante ashvam atyam ivajishu nadasya karnaisturayanta ashubhih
Hiranyashipra maruto davidhvatah priksham yatha prishatibhih samanyavah

34.4

पृ॒क्षे ता विश्वा॒ भुव॑ना ववक्षिरे मि॒त्राय॑ वा॒ सद॒मा जी॒रदा॑नवः ।
पृष॑दश्वासो अनव॒भ्ररा॑धस ऋजि॒प्यासो॒ न व॒युने॑षु धू॒र्षद॑ः ॥४॥

Prikshe ta vishva bhuvana vavakshire mitraya va sadama jiradanavah
Prishadashvaso anavabhraradhasa rijipyaso na vayuneshu dhurshadah

34.5

इन्ध॑न्वभिर्धे॒नुभी॑ र॒प्शदू॑धभिरध्व॒स्मभि॑ः प॒थिभि॑र्भ्राजदृष्टयः ।
आ हं॒सासो॒ न स्वस॑राणि गन्तन॒ मधो॒र्मदा॑य मरुतः समन्यवः ॥५॥

Indhanvabhirdhenubhi rapshadudhabhiradhvasmabhih pathibhirbhrajadrishtayah
A hansaso na svasarani gantana madhormadaya marutah samanyavah

34.6

आ नो॒ ब्रह्मा॑णि मरुतः समन्यवो न॒रां न शंस॒ः सव॑नानि गन्तन ।
अश्वा॑मिव पिप्यत धे॒नुमूध॑नि॒ कर्ता॒ धियं॑ जरि॒त्रे वाज॑पेशसम् ॥६॥

A no brahmani marutah samanyavo naram na shansah savanani gantana
Ashvamiva pipyata dhenumudhani karta dhiyam jaritre vajapeshasam

34.7

तं नो॑ दात मरुतो वा॒जिनं॒ रथ॑ आपा॒नं ब्रह्म॑ चि॒तय॑द् दि॒वेदि॑वे ।
इषं॑ स्तो॒तृभ्यो॑ वृ॒जने॑षु का॒रवे॑ स॒निं मे॒धामरि॑ष्टं दु॒ष्टरं॒ सह॑ः ॥७॥

Tam no data maruto vajinam ratha apanam brahma chitayad divedive
Isham stotribhyo vrijaneshu karave sanim medhamarishtam dushtaram sahah

34.8

यद् यु॒ञ्जते॑ म॒रुतो॑ रु॒क्मव॑क्ष॒सो ऽश्वा॒न् रथे॑षु॒ भग॒ आ सु॒दान॑वः ।
धे॒नुर्न शिश्वे॒ स्वस॑रेषु पिन्वते॒ जना॑य रा॒तह॑विषे म॒हीमिष॑म् ॥८॥

Yad yunjate maruto rukmavakshaso shvan ratheshu bhaga a sudanavah
Dhenurna shishve svasareshu pinvate janaya ratahavishe mahimisham

34.9

यो नो॑ मरुतो वृ॒कता॑ति॒ मर्त्यो॑ रि॒पुर्द॒धे व॑सवो॒ रक्ष॑ता रि॒षः ।
व॒र्तय॑त॒ तपु॑षा च॒क्रिया॒भि तमव॑ रुद्रा अ॒शसो॑ हन्तना॒ वध॑ः ॥९॥

Yo no maruto vrikatati martyo ripurdadhe vasavo rakshata rishah
Vartayata tapusha chakriyabhi tamava rudra ashaso hantana vadhah

34.10

चि॒त्रं तद् वो॑ मरुतो॒ याम॑ चेकिते॒ पृश्न्या॒ यदूध॒रप्या॒पयो॑ दु॒हुः ।
यद् वा॑ नि॒दे नव॑मानस्य रुद्रियास्त्रि॒तं जरा॑य जुर॒ताम॑दाभ्याः ॥१०॥

Chitram tad vo maruto yama chekite prishnya yadudharapyapayo duhuh
Yad va nide navamanasya rudriyastritam jaraya juratamadabhyah

34.11

तान् वो॑ म॒हो म॒रुत॑ एव॒याव्नो॒ विष्णो॑रे॒षस्य॑ प्रभृ॒थे ह॑वामहे ।
हिर॑ण्यवर्णान् ककु॒हान् य॒तस्रु॑चो ब्रह्म॒ण्यन्त॒ः शंस्यं॒ राध॑ ईमहे ॥११॥

Tan vo maho maruta evayavno vishnoreshasya prabhrithe havamahe
Hiranyavarnan kakuhan yatasrucho brahmanyantah shansyam radha imahe

34.12

ते दश॑ग्वाः प्रथ॒मा य॒ज्ञमू॑हिरे॒ ते नो॑ हिन्वन्तू॒षसो॒ व्यु॑ष्टिषु ।
उ॒षा न रा॒मीर॑रु॒णैरपो॑र्णुते म॒हो ज्योति॑षा शुच॒ता गोअ॑र्णसा ॥१२॥

Te dashagvah prathama yagyamuhire te no hinvantushaso vyushtishu
Usha na ramirarunairapornute maho jyotisha shuchata goarnasa

34.13

ते क्षो॒णीभि॑ररु॒णेभि॒र्नाञ्जिभी॑ रु॒द्रा ऋ॒तस्य॒ सद॑नेषु वावृधुः ।
नि॒मेघ॑माना॒ अत्ये॑न॒ पाज॑सा सुश्च॒न्द्रं वर्णं॑ दधिरे सु॒पेश॑सम् ॥१३॥

Te kshonibhirarunebhirnanjibhi rudra ritasya sadaneshu vavridhuh
Nimeghamana atyena pajasa sushchandram varnam dadhire supeshasam

34.14

ताँ इ॑या॒नो महि॒ वरू॑थमू॒तय॒ उप॒ घेदे॒ना नम॑सा गृणीमसि ।
त्रि॒तो न यान् पञ्च॒ होतॄ॑न॒भिष्ट॑य आव॒वर्त॒दव॑राञ्च॒क्रियाव॑से ॥१४॥

Tam iyano mahi varuthamutaya upa ghedena namasa grinimasi
Trito na yan pancha hotrinabhishtaya avavartadavaranchakriyavase

34.15

यया॑ र॒ध्रं पा॒रय॒थात्यंहो॒ यया॑ नि॒दो मु॒ञ्चथ॑ वन्दि॒तार॑म् ।
अ॒र्वाची॒ सा म॑रुतो॒ या व॑ ऊ॒तिरो षु वा॒श्रेव॑ सुम॒तिर्जि॑गातु ॥१५॥

Yaya radhram parayathatyanho yaya nido munchatha vanditaram
Arvachi sa maruto ya va utiro shu vashreva sumatirjigatu