Sukta 32

32.1

8 gritsamada (angirasah shaunahotrah pashchad) bhargavah shaunakah, 1 dyavaprithivi, 2-3 indrastvashta va, 4-5 raka, 6-7 sinivali, 8 lingoktah, jagati, 6-8 anushtup

अ॒स्य मे॑ द्यावापृथिवी ऋताय॒तो भू॒तम॑वि॒त्री वच॑स॒ः सिषा॑सतः ।
ययो॒रायु॑ः प्रत॒रं ते इ॒दं पु॒र उप॑स्तुते वसू॒युर्वां॑ म॒हो द॑धे ॥१॥

Asya me dyavaprithivi ritayato bhutamavitri vachasah sishasatah
Yayorayuh prataram te idam pura upastute vasuyurvam maho dadhe

32.2

मा नो॒ गुह्या॒ रिप॑ आ॒योरह॑न् दभ॒न् मा न॑ आ॒भ्यो री॑रधो दु॒च्छुना॑भ्यः ।
मा नो॒ वि यौ॑ः स॒ख्या वि॒द्धि तस्य॑ नः सुम्नाय॒ता मन॑सा॒ तत् त्वे॑महे ॥२॥

Ma no guhya ripa ayorahan dabhan ma na abhyo riradho duchchhunabhyah
Ma no vi yauh sakhya viddhi tasya nah sumnayata manasa tat tvemahe

32.3

अहे॑ळता॒ मन॑सा श्रु॒ष्टिमा व॑ह॒ दुहा॑नां धे॒नुं पि॒प्युषी॑मस॒श्चत॑म् ।
पद्या॑भिरा॒शुं वच॑सा च वा॒जिनं॒ त्वां हि॑नोमि पुरुहूत वि॒श्वहा॑ ॥३॥

Ahelata manasa shrushtima vaha duhanam dhenum pipyushimasashchatam
Padyabhirashum vachasa cha vajinam tvam hinomi puruhuta vishvaha

32.4

रा॒काम॒हं सु॒हवां॑ सुष्टु॒ती हु॑वे शृ॒णोतु॑ नः सु॒भगा॒ बोध॑तु॒ त्मना॑ ।
सीव्य॒त्वप॑ः सू॒च्याच्छि॑द्यमानया॒ ददा॑तु वी॒रं श॒तदा॑यमु॒क्थ्य॑म् ॥४॥

Rakamaham suhavam sushtuti huve shrinotu nah subhaga bodhatu tmana
Sivyatvapah suchyachchhidyamanaya dadatu viram shatadayamukthyam

32.5

यास्ते॑ राके सुम॒तय॑ः सु॒पेश॑सो॒ याभि॒र्ददा॑सि दा॒शुषे॒ वसू॑नि ।
ताभि॑र्नो अ॒द्य सु॒मना॑ उ॒पाग॑हि सहस्रपो॒षं सु॑भगे॒ ररा॑णा ॥५॥

Yaste rake sumatayah supeshaso yabhirdadasi dashushe vasuni
Tabhirno adya sumana upagahi sahasraposham subhage rarana

32.6

सिनी॑वालि॒ पृथु॑ष्टुके॒ या दे॒वाना॒मसि॒ स्वसा॑ ।
जु॒षस्व॑ ह॒व्यमाहु॑तं प्र॒जां दे॑वि दिदिड्ढि नः ॥६॥

Sinivali prithushtuke ya devanamasi svasa
Jushasva havyamahutam prajam devi dididdhi nah

32.7

या सु॑बा॒हुः स्व॑ङ्गु॒रिः सु॒षूमा॑ बहु॒सूव॑री ।
तस्यै॑ वि॒श्पत्न्यै॑ ह॒विः सि॑नीवा॒ल्यै जु॑होतन ॥७॥

Ya subahuh svangurih sushuma bahusuvari
Tasyai vishpatnyai havih sinivalyai juhotana

32.8

या गु॒ङ्गूर्या सि॑नीवा॒ली या रा॒का या सर॑स्वती ।
इ॒न्द्रा॒णीम॑ह्व ऊ॒तये॑ वरुणा॒नीं स्व॒स्तये॑ ॥८॥

Ya gungurya sinivali ya raka ya sarasvati
Indranimahva utaye varunanim svastaye