Sukta 31

31.1

7 gritsamada (angirasah shaunahotrah pashchad) bhargavah shaunakah, vishve devah, jagati, 7 trishtup

अ॒स्माकं॑ मित्रावरुणावतं॒ रथ॑मादि॒त्यै रु॒द्रैर्वसु॑भिः सचा॒भुवा॑ ।
प्र यद् वयो॒ न पप्त॒न्वस्म॑न॒स्परि॑ श्रव॒स्यवो॒ हृषी॑वन्तो वन॒र्षद॑ः ॥१॥

Asmakam mitravarunavatam rathamadityai rudrairvasubhih sachabhuva
Pra yad vayo na paptanvasmanaspari shravasyavo hrishivanto vanarshadah

31.2

अध॑ स्मा न॒ उद॑वता सजोषसो॒ रथं॑ देवासो अ॒भि वि॒क्षु वा॑ज॒युम् ।
यदा॒शव॒ः पद्या॑भि॒स्तित्र॑तो॒ रज॑ः पृथि॒व्याः सानौ॒ जङ्घ॑नन्त पा॒णिभि॑ः ॥२॥

Adha sma na udavata sajoshaso ratham devaso abhi vikshu vajayum
Yadashavah padyabhistitrato rajah prithivyah sanau janghananta panibhih

31.3

उ॒त स्य न॒ इन्द्रो॑ वि॒श्वच॑र्षणिर्दि॒वः शर्धे॑न॒ मारु॑तेन सु॒क्रतु॑ः ।
अनु॒ नु स्था॑त्यवृ॒काभि॑रू॒तिभी॒ रथं॑ म॒हे स॒नये॒ वाज॑सातये ॥३॥

Uta sya na indro vishvacharshanirdivah shardhena marutena sukratuh
Anu nu sthatyavrikabhirutibhi ratham mahe sanaye vajasataye

31.4

उ॒त स्य दे॒वो भुव॑नस्य स॒क्षणि॒स्त्वष्टा॒ ग्नाभि॑ः स॒जोषा॑ जूजुव॒द् रथ॑म् ।
इळा॒ भगो॑ बृहद्दि॒वोत रोद॑सी पू॒षा पुरं॑धिर॒श्विना॒वधा॒ पती॑ ॥४॥

Uta sya devo bhuvanasya sakshanistvashta gnabhih sajosha jujuvad ratham
Ila bhago brihaddivota rodasi pusha purandhirashvinavadha pati

31.5

उ॒त त्ये दे॒वी सु॒भगे॑ मिथू॒दृशो॒षासा॒नक्ता॒ जग॑तामपी॒जुवा॑ ।
स्तु॒षे यद् वां पृथिवि॒ नव्य॑सा॒ वच॑ः स्था॒तुश्च॒ वय॒स्त्रिव॑या उप॒स्तिरे॑ ॥५॥

Uta tye devi subhage mithudrishoshasanakta jagatamapijuva
Stushe yad vam prithivi navyasa vachah sthatushcha vayastrivaya upastire

31.6

उ॒त व॒ः शंस॑मु॒शिजा॑मिव श्म॒स्यहि॑र्बु॒ध्न्यो॒३ऽज एक॑पादु॒त ।
त्रि॒त ऋ॑भु॒क्षाः स॑वि॒ता चनो॑ दधे॒ऽपां नपा॑दाशु॒हेमा॑ धि॒या शमि॑ ॥६॥

Uta vah shansamushijamiva shmasyahirbudhnyo3ja ekapaduta
Trita ribhukshah savita chano dadhepam napadashuhema dhiya shami

31.7

ए॒ता वो॑ व॒श्म्युद्य॑ता यजत्रा॒ अत॑क्षन्ना॒यवो॒ नव्य॑से॒ सम् ।
श्र॒व॒स्यवो॒ वाजं॑ चका॒नाः सप्ति॒र्न रथ्यो॒ अह॑ धी॒तिम॑श्याः ॥७॥

Eta vo vashmyudyata yajatra atakshannayavo navyase sam
Shravasyavo vajam chakanah saptirna rathyo aha dhitimashyah