সূক্ত 31

31.1

৭ গৃত্সমদ (আঙ্গিরসঃ শৌনহোত্রঃ পশ্চাদ্) ভার্গবঃ শৌনকঃ। বিশ্বে দেবাঃ। জগতী, ৭ ত্রিষ্টুপ্।

অস্মাকং মিত্রাবরুণাবতং রথমাদিত্যৈ রুদ্রৈর্বসুভিঃ সচাভুবা ।
প্র যদ্ বয়ো ন পপ্তন্বস্মনস্পরি শ্রবস্যবো হৃষীবন্তো বনর্ষদঃ ॥১॥

31.2

অধ স্মা ন উদবতা সজোষসো রথং দেবাসো অভি বিক্ষু বাজয়ুম্ ।
যদাশবঃ পদ্যাভিস্তিত্রতো রজঃ পৃথিব্যাঃ সানৌ জঙ্ঘনন্ত পাণিভিঃ ॥২॥

31.3

উত স্য ন ইন্দ্রো বিশ্বচর্ষণির্দিবঃ শর্ধেন মারুতেন সুক্রতুঃ ।
অনু নু স্থাত্যবৃকাভিরূতিভী রথং মহে সনয়ে বাজসাতয়ে ॥৩॥

31.4

উত স্য দেবো ভুবনস্য সক্ষণিস্ত্বষ্টা গ্নাভিঃ সজোষা জূজুবদ্ রথম্ ।
ইলা ভগো বৃহদ্দিবোত রোদসী পূষা পুরংধিরশ্বিনাবধা পতী ॥৪॥

31.5

উত ত্যে দেবী সুভগে মিথূদৃশোষাসানক্তা জগতামপীজুবা ।
স্তুষে যদ্ বাং পৃথিবি নব্যসা বচঃ স্থাতুশ্চ বয়স্ত্রিবয়া উপস্তিরে ॥৫॥

31.6

উত বঃ শংসমুশিজামিব শ্মস্যহির্বুধ্ন্যো৩ঽজ একপাদুত ।
ত্রিত ঋভুক্ষাঃ সবিতা চনো দধেঽপাং নপাদাশুহেমা ধিয়া শমি ॥৬॥

31.7

এতা বো বশ্ম্যুদ্যতা যজত্রা অতক্ষন্নায়বো নব্যসে সম্ ।
শ্রবস্যবো বাজং চকানাঃ সপ্তির্ন রথ্যো অহ ধীতিমশ্যাঃ ॥৭॥