সূক্ত 30

30.1

১১ গৃত্সমদ (আঙ্গিরসঃ শৌনহোত্রঃ পশ্চাদ্) ভার্গবঃ শৌনকঃ।ইন্দ্রঃ, ৬ ইন্দ্রসোমৌ, ৮(পূর্বাঽর্ধর্চ স্য)। সরস্বতী, ৯ বৃহস্পতিঃ, ১১ মরুতঃ। ত্রিষ্টুপ্, ১১ জগতী।

ঋতং দেবায় কৃণ্বতে সবিত্র ইন্দ্রায়াহিঘ্নে ন রমন্ত আপঃ ।
অহরহর্যাত্যক্তুরপাং কিয়াত্যা প্রথমঃ সর্গ আসাম্ ॥১॥

30.2

যো বৃত্রায় সিনমত্রাভরিষ্যৎ প্র তং জনিত্রী বিদুষ উবাচ ।
পথো রদন্তীরনু জোষমস্মৈ দিবেদিবে ধুনয়ো যন্ত্যর্থম্ ॥২॥

30.3

ঊর্ধ্বো হ্যস্থাদধ্যন্তরিক্ষে ঽধা বৃত্রায় প্র বধং জভার ।
মিহং বসান উপ হীমদুদ্রোৎ তিগ্মায়ুধো অজয়চ্ছত্রুমিন্দ্রঃ ॥৩॥

30.4

বৃহস্পতে তপুষাশ্নেব বিধ্য বৃকদ্বরসো অসুরস্য বীরান্ ।
যথা জঘন্থ ধৃষতা পুরা চিদেবা জহি শত্রুমস্মাকমিন্দ্র ॥৪॥

30.5

অব ক্ষিপ দিবো অশ্মানমুচ্চা যেন শত্রুং মন্দসানো নিজূর্বাঃ ।
তোকস্য সাতৌ তনয়স্য ভূরেরস্মাঁ অর্ধং কৃণুতাদিন্দ্র গোনাম্ ॥৫॥

30.6

প্র হি ক্রতুং বৃহথো যং বনুথো রধ্রস্য স্থো যজমানস্য চোদৌ ।
ইন্দ্রাসোমা যুবমস্মাঁ অবিষ্টমস্মিন্ ভয়স্থে কৃণুতমু লোকম্ ॥৬॥

30.7

ন মা তমন্ন শ্রমন্নোত তন্দ্রন্ন বোচাম মা সুনোতেতি সোমম্ ।
যো মে পৃণাদ্ যো দদদ্যো নিবোধাদ্ যো মা সুন্বন্তমুপ গোভিরায়ৎ ॥৭॥

30.8

সরস্বতি ত্বমস্মাঁ অবিড্ঢি মরুত্বতী ধৃষতী জেষি শত্রূন্ ।
ত্যং চিচ্ছর্ধন্তং তবিষীয়মাণমিন্দ্রো হন্তি বৃষভং শণ্ডিকানাম্ ॥৮॥

30.9

যো নঃ সনুত্য উত বা জিঘত্নুরভিখ্যায় তং তিগিতেন বিধ্য ।
বৃহস্পত আয়ুধৈর্জেষি শত্রূন্ দ্রুহে রীষন্তং পরি ধেহি রাজন্ ॥৯॥

30.10

অস্মাকেভিঃ সত্বভিঃ শূর শূরৈর্বীর্যা কৃধি যানি তে কর্ত্বানি ।
জ্যোগভূবন্ননুধূপিতাসো হত্বী তেষামা ভরা নো বসূনি ॥১০॥

30.11

তং বঃ শর্ধং মারুতং সুম্নয়ুর্গিরোপ ব্রুবে নমসা দৈব্যং জনম্ ।
যথা রয়িং সর্ববীরং নশামহা অপত্যসাচং শ্রুত্যং দিবেদিবে ॥১১॥