Sukta 30

30.1

11 gritsamada (angirasah shaunahotrah pashchad) bhargavah shaunakah, indrah, 6 indrasomau, 8(purvardharcha sya), sarasvati, 9 brihaspatih, 11 marutah, trishtup, 11 jagati

ऋ॒तं दे॒वाय॑ कृण्व॒ते स॑वि॒त्र इन्द्रा॑याहि॒घ्ने न र॑मन्त॒ आप॑ः ।
अह॑रहर्यात्य॒क्तुर॒पां किया॒त्या प्र॑थ॒मः सर्ग॑ आसाम् ॥१॥

Ritam devaya krinvate savitra indrayahighne na ramanta apah
Aharaharyatyakturapam kiyatya prathamah sarga asam

30.2

यो वृ॒त्राय॒ सिन॒मत्राभ॑रिष्य॒त् प्र तं जनि॑त्री वि॒दुष॑ उवाच ।
प॒थो रद॑न्ती॒रनु॒ जोष॑मस्मै दि॒वेदि॑वे॒ धुन॑यो य॒न्त्यर्थ॑म् ॥२॥

Yo vritraya sinamatrabharishyat pra tam janitri vidusha uvacha
Patho radantiranu joshamasmai divedive dhunayo yantyartham

30.3

ऊ॒र्ध्वो ह्यस्था॒दध्य॒न्तरि॒क्षे ऽधा॑ वृ॒त्राय॒ प्र व॒धं ज॑भार ।
मिहं॒ वसा॑न॒ उप॒ हीमदु॑द्रोत् ति॒ग्मायु॑धो अजय॒च्छत्रु॒मिन्द्र॑ः ॥३॥

Urdhvo hyasthadadhyantarikshe dha vritraya pra vadham jabhara
Miham vasana upa himadudrot tigmayudho ajayachchhatrumindrah

30.4

बृह॑स्पते॒ तपु॒षाश्ने॑व विध्य॒ वृक॑द्वरसो॒ असु॑रस्य वी॒रान् ।
यथा॑ ज॒घन्थ॑ धृष॒ता पु॒रा चि॑दे॒वा ज॑हि॒ शत्रु॑म॒स्माक॑मिन्द्र ॥४॥

Brihaspate tapushashneva vidhya vrikadvaraso asurasya viran
Yatha jaghantha dhrishata pura chideva jahi shatrumasmakamindra

30.5

अव॑ क्षिप दि॒वो अश्मा॑नमु॒च्चा येन॒ शत्रुं॑ मन्दसा॒नो नि॒जूर्वा॑ः ।
तो॒कस्य॑ सा॒तौ तन॑यस्य॒ भूरे॑र॒स्माँ अ॒र्धं कृ॑णुतादिन्द्र॒ गोना॑म् ॥५॥

Ava kshipa divo ashmanamuchcha yena shatrum mandasano nijurvah
Tokasya satau tanayasya bhurerasmam ardham krinutadindra gonam

30.6

प्र हि क्रतुं॑ वृ॒हथो॒ यं व॑नु॒थो र॒ध्रस्य॑ स्थो॒ यज॑मानस्य चो॒दौ ।
इन्द्रा॑सोमा यु॒वम॒स्माँ अ॑विष्टम॒स्मिन् भ॒यस्थे॑ कृणुतमु लो॒कम् ॥६॥

Pra hi kratum vrihatho yam vanutho radhrasya stho yajamanasya chodau
Indrasoma yuvamasmam avishtamasmin bhayasthe krinutamu lokam

30.7

न मा॑ तम॒न्न श्र॑म॒न्नोत त॑न्द्र॒न्न वो॑चाम॒ मा सु॑नो॒तेति॒ सोम॑म् ।
यो मे॑ पृ॒णाद् यो दद॒द्यो नि॒बोधा॒द् यो मा॑ सु॒न्वन्त॒मुप॒ गोभि॒राय॑त् ॥७॥

Na ma tamanna shramannota tandranna vochama ma sunoteti somam
Yo me prinad yo dadadyo nibodhad yo ma sunvantamupa gobhirayat

30.8

सर॑स्वति॒ त्वम॒स्माँ अ॑विड्ढि म॒रुत्व॑ती धृष॒ती जे॑षि॒ शत्रू॑न् ।
त्यं चि॒च्छर्ध॑न्तं तविषी॒यमा॑ण॒मिन्द्रो॑ हन्ति वृष॒भं शण्डि॑कानाम् ॥८॥

Sarasvati tvamasmam aviddhi marutvati dhrishati jeshi shatrun
Tyam chichchhardhantam tavishiyamanamindro hanti vrishabham shandikanam

30.9

यो न॒ः सनु॑त्य उ॒त वा॑ जिघ॒त्नुर॑भि॒ख्याय॒ तं ति॑गि॒तेन॑ विध्य ।
बृह॑स्पत॒ आयु॑धैर्जेषि॒ शत्रू॑न् द्रु॒हे रीष॑न्तं॒ परि॑ धेहि राजन् ॥९॥

Yo nah sanutya uta va jighatnurabhikhyaya tam tigitena vidhya
Brihaspata ayudhairjeshi shatrun druhe rishantam pari dhehi rajan

30.10

अ॒स्माके॑भि॒ः सत्व॑भिः शूर॒ शूरै॑र्वी॒र्या॑ कृधि॒ यानि॑ ते॒ कर्त्वा॑नि ।
ज्योग॑भूव॒न्ननु॑धूपितासो ह॒त्वी तेषा॒मा भ॑रा नो॒ वसू॑नि ॥१०॥

Asmakebhih satvabhih shura shurairvirya kridhi yani te kartvani
Jyogabhuvannanudhupitaso hatvi teshama bhara no vasuni

30.11

तं व॒ः शर्धं॒ मारु॑तं सुम्न॒युर्गि॒रोप॑ ब्रुवे॒ नम॑सा॒ दैव्यं॒ जन॑म् ।
यथा॑ र॒यिं सर्व॑वीरं॒ नशा॑महा अपत्य॒साचं॒ श्रुत्यं॑ दि॒वेदि॑वे ॥११॥

Tam vah shardham marutam sumnayurgiropa bruve namasa daivyam janam
Yatha rayim sarvaviram nashamaha apatyasacham shrutyam divedive