Sukta 29

29.1

7 kurmo gartsamado, gritsamado va, vishvedevah, trishtup

धृत॑व्रता॒ आदि॑त्या॒ इषि॑रा आ॒रे मत् क॑र्त रह॒सूरि॒वाग॑ः ।
शृ॒ण्व॒तो वो॒ वरु॑ण॒ मित्र॒ देवा॑ भ॒द्रस्य॑ वि॒द्वाँ अव॑से हुवे वः ॥१॥

Dhritavrata aditya ishira are mat karta rahasurivagah
Shrinvato vo varuna mitra deva bhadrasya vidvam avase huve vah

यू॒यं दे॑वा॒ः प्रम॑तिर्यू॒यमोजो॑ यू॒यं द्वेषां॑सि सनु॒तर्यु॑योत ।
अ॒भि॒क्ष॒त्तारो॑ अ॒भि च॒ क्षम॑ध्वम॒द्या च॑ नो मृ॒ळय॑ताप॒रं च॑ ॥२॥

Yuyam devah pramatiryuyamojo yuyam dveshansi sanutaryuyota
Abhikshattaro abhi cha kshamadhvamadya cha no mrilayataparam cha

किमू॒ नु व॑ः कृणवा॒माप॑रेण॒ किं सने॑न वसव॒ आप्ये॑न ।
यू॒यं नो॑ मित्रावरुणादिते च स्व॒स्तिमि॑न्द्रामरुतो दधात ॥३॥

Kimu nu vah krinavamaparena kim sanena vasava apyena
Yuyam no mitravarunadite cha svastimindramaruto dadhata

ह॒ये दे॑वा यू॒यमिदा॒पय॑ः स्थ॒ ते मृ॑ळत॒ नाध॑मानाय॒ मह्य॑म् ।
मा वो॒ रथो॑ मध्यम॒वाळृ॒ते भू॒न्मा यु॒ष्माव॑त्स्वा॒पिषु॑ श्रमिष्म ॥४॥

Haye deva yuyamidapayah stha te mrilata nadhamanaya mahyam
Ma vo ratho madhyamavalrite bhunma yushmavatsvapishu shramishma

प्र व॒ एको॑ मिमय॒ भूर्यागो॒ यन्मा॑ पि॒तेव॑ कित॒वं श॑शा॒स ।
आ॒रे पाशा॑ आ॒रे अ॒घानि॑ देवा॒ मा माधि॑ पु॒त्रे विमि॑व ग्रभीष्ट ॥५॥

Pra va eko mimaya bhuryago yanma piteva kitavam shashasa
Are pasha are aghani deva ma madhi putre vimiva grabhishta

अ॒र्वाञ्चो॑ अ॒द्या भ॑वता यजत्रा॒ आ वो॒ हार्दि॒ भय॑मानो व्ययेयम् ।
त्राध्वं॑ नो देवा नि॒जुरो॒ वृक॑स्य॒ त्राध्वं॑ क॒र्ताद॑व॒पदो॑ यजत्राः ॥६॥

Arvancho adya bhavata yajatra a vo hardi bhayamano vyayeyam
Tradhvam no deva nijuro vrikasya tradhvam kartadavapado yajatrah

माहं म॒घोनो॑ वरुण प्रि॒यस्य॑ भूरि॒दाव्न॒ आ वि॑दं॒ शून॑मा॒पेः ।
मा रा॒यो रा॑जन् त्सु॒यमा॒दव॑ स्थां बृ॒हद् व॑देम वि॒दथे॑ सु॒वीरा॑ः ॥७॥

Maham maghono varuna priyasya bhuridavna a vidam shunamapeh
Ma rayo rajan tsuyamadava stham brihad vadema vidathe suvirah